Read Kalanga Jeremiya 1 Bible Online

Jeremiya 1 - Kalanga bible

Jeremiya 1

¹Matama a Jeremiya nkololo wa Hilikiya, wakabe ali mmwe we bapirisiti bakabe bali mu Anatoti mu shango ye Bhenjamini.

²Dama la Yahwe lakazha kunli mu gole le bugumi lina matatu (13) ekubusa kwa Josiya nkololo wa Amoni wakabe ali mambo we Juda.

³Lakazha kakale mu misi ya Jehoyakimu nkololo wa Josiya wakabe ali mambo we Juda, kuyenda kunoti ku bupelo gwe gole le bugumi lina ling'ompela la Zedekiya nkololo wa Josiya wakabe ali mambo we Juda, kudzina kunoti mu kutapiwa kwe Jerusalema mu mwedzi we bushanu.

⁴Dama la Yahwe lakazha kundili liti,

⁵“Ndakati ndisathu akubumba mu tjibumbilo ndakakuziba, wakati usathu ukazwagwa ndakakushalula, ndakakubiga nlebesambeli ku zwitjaba.”

⁶Ipapo ndikabe nditi, “Awu, She Yahwe! Bonani, anditoziba lebeleka ngoti nditji ntjetjana.”

⁷Koga Yahwe bakati kundili, “Usiti, ‘Nditji ntjetjana,’ wakafanila kuyenda kuna bose bandinokutuma kubali, tjimwe ne tjimwe tjandinokulaya wakafanila kutjileba.

⁸Usibatje ngoti ndinawe kukusunungula,” kojalo Yahwe.

⁹Ipapo Yahwe bakatambunudza luboko gwabo bakabhata nlomo wangu ngono Yahwe bakati kundili, “Bona ndalonga matama angu mu nlomo uwo.

¹⁰Bona, mu zhuba ileli ndakubiga kuti ube ne simba mu zwitjaba ne pezhugwi kwe mibuso kuti utshindunule kakale uvunile pasi, ukolomole kakale upitule, ubake kakale udzwale.”

¹¹Kakale dama la Yahwe lakazha kundili liti, “Jeremiya unobonani?” Adabila nditi, “Ndobona lukombo gwe nti we alimondi.”

¹²Ipapo Yahwe bakati kundili, “Wabona zubuyanana, ngoti ndakalingilila kubona dama langu lishingikadziwa.”

¹³Dama la Yahwe lakazha kundili gwe bubili liti, “Unobonani?” Adabila nditi, “Ndobona hali inobila yakaleleka kudwa ku bunandzwa.”

¹⁴Ipapo Yahwe bakati kundili, “Kudwa ku bunandzwa bubi gowowila bagali bose be shango.

¹⁵Ngoti bona, ndodana njudzi dzose dze mibuso ye bunandzwa,” kojalo Yahwe. “Ipapo dzowozha ngono mmwe ne mmwe unowobiga tjigalo tjitje tje bushe ku manginilo e nkoba we Jerusalema, banowobhayana ne makuma wose ayo akapoteleka ne mizi yose ye Juda.

¹⁶Ndowodusa sumikiliso dzangu nge kwabo ngekwe bubi gwabo gose gwe kundifupatila, bakapisila motsha midzimu ipoga bakanamata mishingo ye maboko abo.

¹⁷Koga iwe, uzwilulwamise! Milika ubabudze tjimwe ne tjimwe tjandinokudwa. Basikupaluse moyo, kuti ndizo ndisikupaluse moyo mbeli kwabo.

¹⁸Ngono imi, bona, ndokuthama mu zhuba la nasi nzi we dizhilo, phanda ye butale, guma le phangula kubhayana ne shango yose ne kubhayana na bomambo be Juda ne makulukota ayo ne bapirisiti bayo nenge bathu be shango.

¹⁹Banowogwa nawe koga abangakukunde ngoti ndinawe kakale ndowokugwila,” koleba Yahwe.