Read Kalanga Jeremiya 10 Bible Online

Jeremiya 10 - Kalanga bible

Jeremiya 10

¹Ihwani dama la Yahwe labanomudwa imwi Baiziraela.

²Yahwe bakati, “Musizwidiye zila dze Bezwitjaba kene kupalusiwa moyo nge zwilakidzo zwe zhuzhugwi, nenguba zwitjaba zwizwitja.

³Ngoti mipanga ye bathu manyepkhwa. Nti unodwa mu ishaka utemegwa pasi, ukabezhiwa nge mbezhwana nge maboko e mbezhi.

⁴Banounakisa nge siliva ne golide, bakaukothomela nge hamuli ne zwipikiri, kuti ndizo usizunguzike.

⁵Midzimu yabo inonga dato mu nnda we mabisi, aitolebeleka, yakafanila kusengwa, ngoti aitoyenda. Isimupaluse moyo, akuna tjibiibi tjaingamuthama, kene ikathama tjimwe tjibuya.”

⁶Akuna mmwe unonga imwi Yahwe, mu nkulu kwazo, ne zina lenyu ligulu lina masimba.

⁷Ndiani usakafanila kumutja kene, imwi mambo we zwitjaba? Ngoti itjetjo nditjo tjakamufanila. Mu batjenjedu bose Bezwitjaba, ne mu mibuso yabo, akuna unonga imwi.

⁸Bose abana mikumbulo bazwilengwe, ndayo dze midzimu makuni asina nshingo!

⁹Siliva yakathugwa inozhisiwa kudwa ku Tashishi, golide kudwa ku Ufazi. Midzimu yakabezhiwa mishingo ye maboko e nthuli, zwiambalo zwayo matyila e mbala we gova ne e bushaba gwakabondelela, wose akathamwa nge nyambi dze bashingi,

¹⁰koga Yahwe ba Ndzimu we lebeswa, ba Ndzimu unotjila ba mambo unogalila tjose. Mu kugwadzamoyo kwabo shango inotengenyeka, zwitjaba azwinga mililane ne bushongola gwabo.

¹¹Lebani nge kwayo muti, “Midzimu isakathama kudzimu ne shango inowokolomoka mu shango na pasi kwe zhuzhugwi.”

¹²Ndibo bakathama shango nge simba labo, ndibo bakagadzika lubumbo nge butjenjedu gwabo, nge hwisiso yabo bakatalabudza zhuzhugwi,

¹³ha bemilidza hwi labo vula dze zhuzhugwi dzomidukana, banothama kuti fulele imilidze kudwa mu phelelo dze shango. Bakathama lupenyo gwe vula, bakadusa phepo mu matula abo.

¹⁴Nthu mmwe ne mmwe tjilengwe kakale aana luzibo, nthuli mmwe ne mmwe we golide unobhatisiwa shoni ne midzimu iye, ngoti zwifano zwizwe manyepkhwa, kakale azwina meya mu zwili.

¹⁵Azwina nshingo, zwithu koga zwe madado, mu tjibaka tjazo tjekulobgwa shamu zowoloba.

¹⁶Ngono iye we gobe la Jakubo aazojalo, ngoti ndiye wakabumba zwithu zose, Iziraela ludzi gwe thaka iye, Yahwe Masimbawose ndilo zina labo.

¹⁷Kubunganyani zwitolombaje zwenyu mubhude mu shango, imwi munogala makakombiwa.

¹⁸Ngoti Yahwe bakati, “Bonani, ndowolashila kutjena bagali be shango nge tjibaka itjetji, ngono ndowozhisa buyendasi mu bali, kuti ndizo baguhwe.”

¹⁹Yee mme wee! Ndapalala ngekwe hwubadzi dzangu! Mabanga angu ndeasingapole! Ngono ndakadwilila ndizwidwa nditi, “Bugwele koga gwandakafanila dzikitadzila.”

²⁰Nshasha wangu wakolomogwa, tshi dzangu dzose dzathubugwa, bana bangu bandifupatila abatjipo, akuna wasala kubamba nshasha wangu, kene kuthama ntutshi wangu.

²¹Ngoti balisi bazwilengwe, abatoshakisisa muna Yahwe, ndizo abazobhudilila, mbudzi ne pkhwizi dzabo dzakapalala.

²²Bhulutanani! Mbiko yaswika kushangashangana kukulu kunodwa mu shango ye bunandzwa! Kowothama mizi mikulu ye Juda ikathukudzika, ikabe mazwimba e phungubgwe.

²³Ndoziba imwi Yahwe kuti zila ye nthu aazoibiga munli, kuti akute kuli mu nthu kuti alaule thambo dzidze.

²⁴Munditjemele imwi Yahwe kwakalizanila koga, kusi ngekwe kugwadzamoyo kwenyu, kungadwa mundithama ndisala ndisi watjimwe.

²⁵Tebulilani bushongola gwenyu mu zwitjaba zwisingamuzibe, ne mu bathu bose basingadane zina lenyu, ngoti bakaja Jakubo, bakanja bakampeleledza, bakathukudza mizi iye.