Read Kalanga Jeremiya 11 Bible Online

Jeremiya 11 - Kalanga bible

Jeremiya 11

¹Dama lakazha kuna Jeremiya lidwa kuna Yahwe liti,

²“Ihwa matama e Tjidumano itjetji ngono uabudze bathu be Juda ne bagali be Jerusalema.

³Ubabudze kuti Yahwe Ndzimu we Iziraela bakati, ‘Una bhiso nthu mmwe ne mmwe usingalondolodze matama e Tjidumano itjetji,

⁴tjandakadwa bobatategulu benyu kuti batjilondolodze pandakabadusa mu shango ye Egipiti ndibadusa mu butale gunopisa kwakabangalala nditi, “Munditete kakale muthame tjimwe ne tjimwe tjandinomudwa ndizo mowobe bathu bangu ngono imi ndowobe Ndzimu wenyu,

⁵kuti ndizo ndishingikadze kutuna kwandakatuna kuna bobatategulu benyu kuti ndowobapa shango inowunga nkaka ne butji gwe nyutji, shango yamuili nasi.” ’ ” Ipapo adabila nditi, “Ngakujalo, Yahwe.”

⁶Yahwe bakandidwa bakati, “Zibisa matama iyawa wose mu mizi mikulu ye Juda ne mu dzizila dze Jerusalema uti, ‘Bhulutanani matama e Tjidumano ngono muashingikadze.

⁷Ngoti ndakalaya bobatategulu benyu kwazo zhuba landabadusa mu shango ye Egipiti, ndikabakowomesedza kwazo nanga na nasi dumbu nditi, “Bhulutanani hwi langu!

⁸Nenguba kwakajalo abazondihwa kene kuli kube ne njele nge kwako koga mmwe ne mmwe wabo wakatobela mimoyo yabo mibiibi yakakukutala. Ndizo ndakabazhisila pezhugwi kwabo matama wose e Tjidumano itjetji, iwo andakabadwa kuti baalondolodze, koga bakasithame sa ikoku.” ’ ”

⁹Kakale Yahwe bakati kundili, “Kuna bupitipiti pakati kwe bathu be Juda ne bagali be Jerusalema gwabanosunga.

¹⁰Bakabgwilila ku matjinyo a bobatategulu babo, ibo bakalamba kuhwa matama angu, bakatobela midzimu kuti baishingile, ng'umba ye Iziraela ne ng'umba ye Juda yakatjuluka tjidumano tjangu tjandakathama na bobatategulu babo.

¹¹Ndizo wali Yahwe bakati, ‘Bonani, ndozhisa bubi pezhugwi kwabo gwabasingake bakasiya, nenguba bangalila kundili andingabateedze.

¹²Ipapo mizi mikulu ye Juda ne bagali be Jerusalema banowoyenda, belilila midzimu yabanopisila motsha, koga aingabatjidze mu tjibaka tje mang'oni abo.

¹³Ngoti midzimu yenyu yabe minji se mizi yenyu mikulu iwe Juda, zwibeso zwinopisigwa Baale motsha zwabe zwinji se dzizila dze Jerusalema.’

¹⁴“Ndizo ke usitembezelele bathu ibaba, kene kuli milidzila tjililo ke ntembezelo mu bumo gwabo, ngoti andingateedze abe danilila kundili mu tjibaka tje mang'oni abo.

¹⁵“Ndinge kutini ha tjido tjangu tjithama njalakang'wa dze bupitipiti mu Ng'umba yangu kene? Apa mafuta ne nyama yakayengemala ingakupambusa kulashika kuko mukuli kene? Apa ungapululudza kene?

¹⁶Yahwe bakakudana beti, ‘Ntoba ntala, wakanaka una mitjelo yakanaka, koga nge nsindo nkulu unowolonga moto muuli thabi dzawo dzowovunika.

¹⁷Ndzimu masimbawose ibo bakakugadzika baleba bubiibi nge kuko, ngekwe bubi gwakathamwa nge ng'umba ye Iziraela ne ng'umba ye Juda nge kundigwadzisa moyo ngopisila Bhaale motsha.’ ”

¹⁸Yahwe bakandizibisa ngono ndotjiziba, bakanditjenjedza mishingo yabo yakabipa.

¹⁹Koga ndakabe ndinga pkhwizana yakawila zwilopa, yakatungamiligwa kunobhayiwa. Ndakabe ndisingazibe kuti bakandibigila bhuzhu beti, “Ngatitemeni nti ne mitjelo yawo, ngati n'duseni mu shango ye batjili, kuti ndizo zina lile lisatjakumbulukigwe.”

²⁰Koga imwi Yahwe Masimbawose imwi munosumikilisa nge ndulamo, imwi munolika nkumbulo ne njalakang'wa, nge kwenyu ndamubikila ndebo yangu.

²¹Ndizo wali Yahwe bakati ngekwe bathu be Anatoti, ibo banoshaka butjilo gugo beti, “Usilebesembeli nge zina la Yahwe ngoti ungadwa ufila mu maboko edu.”

²²Ndizoke Yahwe Masimbawose bakati, “Bona ndowobaloba shamu bazhuzha banowobulawa nge thumo, bakololo babo ne bakololokadzi babo banowobulawa nge bhamba,

²³akuna wabo unowosala. Ngoti ndowozhisa bubi mu bathu be Anatoti mu gole le kulobgwa shamu kwabo.”