Read Kalanga Jeremiya 12 Bible Online

Jeremiya 12 - Kalanga bible

Jeremiya 12

¹Imwi Yahwe mogala makalulwama, ha nding'ong'ola ku muli. Koga ndoshakabhuzwa ngekwe ndebo yangu nditi, Ini babiibi bebhudilila kene? Ini basina bugalimoyo bali gele bakashalanduka?

²Makabadzwala bakamela midzi, banokula bakazwala mitjelo. Mogala muli pa milomo yabo, koga muli kule ne mimoyo yabo.

³Koga mundiziba imi Yahwe, mondibona mukalika mikumbulo yangu nge kwenyu. Mubakwebele kutjena se pkhwizi inonobhayiwa. Mubabigile ntome mubabigila zhuba le kubhayiwa.

⁴Kowotola tjibaka tjingapani shango ili mu tjililo, ne bushwa gwe shango yose gubuna kene? Ngoti ibabo banogala muili babiibi, phuka ne nyuni dzakafa. Ngoti bathu banoti, “Aatobona bhelelo ledu.”

⁵“Ha wakatongo phikidzana ngo labuka ne bathu, bakamusiya mungaphikidzana ne mbizi tjini wali? Ha mu shango yakabakililika musakadzikama, mungatubula tjini mu ishaka tje Jorodani wali?

⁶Nanga hama dzenyu iyo ng'umba ya tate benyu, bakamuthamila bupitipiti, banolila nge kwenyu, musitongo bagalabgwe, nenguba bangamuleba bubuya.

⁷“Ndakafupatila ng'umba yangu. Ndakalasha thaka yangu. Ndakalonga tjido tje moyo wangu, mu maboko e zwita zwizwe.

⁸Thaka yangu yatjindishandukila, yonga shumba mu ishaka, inondibombela, ndizo ndotjibenga.

⁹Apa thaka yangu yotjinga phele kundili, apa nyuni dzakagupoteleka kugunginilila kene? Yendani munokubunganya phuka dze shango, mudzizhise kuti dzowoja.

¹⁰Balisi banjinji bakakolomola nnda wangu we mizhambi, bakakanyangila pasi gobe langu, bakathama gobe langu lakanaka tjilambanyika tjakathukudzika.

¹¹Bakalithama likathukudzika kwakabangalala, lolilila kundili. Shango yose yakathukudzika, ngono nthu aana hanya nge kwako.

¹²Pezhugwi kwe matuthu asina miti mu tjilambanyika, bakolomoli bazha, ngoti thumo la Yahwe loja, akuna nthu wakabakililika.

¹³Banowodzwala korong ngono bakavuna mmihwa, banozwinyadzila suli ngono bakasivune tjimwe. Banowobhakhwa nge shoni ngekwe zwawavuna, ngekwe kugwadzamoyo kukulu kwa Yahwe.”

¹⁴Yahwe banoleba ngekwe babakidzani bangu babiibi, ibo banobhatabhata thaka yandakapa bathu bangu Iziraela kuti ibe yabo beti, “Bonani, ndowobadzikunula mu shango yabo ne ng'umba ye Juda ndowoidzikunula pakati kwabo.

¹⁵Ndowoti ndisinokubadzikunula ndowoti kakale abahwila ngoni, abgwiliza mmwe ne mmwe ku thaka iye ne mmwe ne mmwe ku shango iye.

¹⁶Ngono banowoti bezwidiya zila dze bathu bangu, betuna nge zina langu beti, ‘Nge malebeswa Yahwe banotjila,’ sekwa bakadiya bathu bangu kutuna na Bhaale ipapo banowodzikamisiwa pakati kwe bathu bangu.

¹⁷Koga ha itjaba tjimwe tjisingandihwilile ipapo ndowotjidzikunula tjoselele atjikolomodza, kojalo Yahwe.”