Read Kalanga Jeremiya 13 Bible Online

Jeremiya 13 - Kalanga bible

Jeremiya 13

¹Yahwe bakandidwa bakati, “Yenda unotenga mwandabula we jila, ngono usunge thunji dzidzo ndiwo, usitongo udubika mu vula.”

²Ndizo ndikanotenga mwandabula koga dama la Yahwe sekwa lakabe laleba ngono asunga thunji dzangu nawo.

³Dama la Yahwe lakazha kundili gwe bubili liti,

⁴“Tola mwandabula wawatenga, iwo wawakasunga thunji dzidzo ndiwo ngono milika, yenda ku Yufuratesi unowusumbika ikoku mu phaswa dze shongwe.”

⁵Ndizo ayenda anousumbika ku Yufuratesi Yahwe koga sekwa bakandidwa.

⁶Shule kwe mazhuba manjinji Yahwe bakandidwa beti, “Milika, yenda ku Yufuratesi unotola mwandabula wandakakudwa kuti unowusumbika ko.”

⁷Ipapo ndakayenda ku Yufuratesi atsha ngono atola mwandabula pathu pandakabe ndausumbika. Ngono bonani, mwandabula wakabe washakala usitjina nshingo.

⁸Ipapo dama la Yahwe likazha kundili liti,

⁹“Yahwe bakati, ‘Nge zila inofanana na iyeyi ndowokolomola mazwikudzo e Juda ne mazwikudzo e Jerusalema.

¹⁰Bathu ibaba babiibi, banolamba kuhwa matama angu, banotobela bukomba gwe mimoyo yabo, betobela midzimu ipoga kakale beishingila, basala benga mwandabula iwoyu, basina ndodwa ne nshingo!

¹¹Koga se mwandabula usungigwa mu thunji dze nthu ndosungila ng'umba ye Iziraela ne ng'umba yose ye Juda kundili,’ koleba Yahwe, ‘kuti babe bathu bangu ne zina ne dendo ne gudzo, koga abangandihwilile.’

¹²“Lebeleka nabo ubadwe dama eli uti, ‘Yahwe Ndzimu we Iziraela bakati, “Hali imwe ne imwe inowozhadziwa ne nkumbi we zhambi.” ’ Ngono ibo banowoti kukuli, ‘Apa atitoziba kuti hali imwe ne imwe inowozhadziwa ne nkumbi we zhambi kene?’

¹³Ipapo ubadwe uti, ‘Yahwe bakati, “Bonani, ndowogutsha bagali bose be shango iyeyi ngolaladza ibo bomambo banogala mu tjigalo tja Dafite tje bumambo ne bapirisiti ne balebesambeli ne bagali bose be Jerusalema.

¹⁴Ngono ndowobakwiya mmwe mu mmwe, botate ne bakololo ngofanana, kojalo Yahwe. Anditowoletjedza mahwilongoni kene ngoni kene mahwilozogwadza kundidziba kuti ndisibalobese.” ’ ”

¹⁵Ihwani ngono muzhule zebe, musizwikudze, ngoti Yahwe balebeleka.

¹⁶Ipani Yahwe Ndzimu wenyu dendo, basathu bakazhisa zhalima, makumbo enyu asathu kasodzoloka, mu matuthu kubhata, muti mutjashaka tjedza, bebe tjishandula tjibe lima.

¹⁷Koga amusingawoteedza, meya yangu inowomulilila mu ikohwa ngekwe mazwikudzo enyu, mesho angu anowolila kwazo katebula mishodzi, ngoti Yahwe be ngubi batapiwa.

¹⁸Leba kuna mambo na mmeyabe uti, “Delukani mu zwigalo zwenyu zwe bumambo, ngoti zwiala zwenyu zwakanaka, zowowa mu misholo yenyu.”

¹⁹Mizi mikulu ye Negebu inowozhaligwa, ngono akuna unowoizhula. Juda yose inowotapiwa, ikatolegwa yose ku butapiwa.

²⁰“Milidza mesho awo ubone, ibabo banodwa ku bunandzwa. Ingayi ngubi yawakabe wapiwa, ngubi iyo yakanaka kene?

²¹Unowotini ha bebiga botetshi mukuli, ibabo iwe bawakadiya kuti babe bakwinya babo? Apa zogwadza ha zwingakuwile, se nkadzi umu zwibhayo zwe kutshibama kene?

²²Ngono auzwibhuzwa uti, ‘Ini ikoku kundishingikalila kene?’ Ndi ngekwe bukulu gwe jinyo lilo, kwayita kuti thako dzidzo dzipaluke, mbili uwo ulengudzike.

²³Apa Nkhushi ungazwishandula mbala we ganda lile, kene ngwe mabala ayo kene? Namwibo ha mungathame tjibuya, imwi matjiwolobela thama tjakabipa.

²⁴“Ndowomupaladza se bunye, gututudziwa nge phepo inodwa mu tjilambanyika.

²⁵Ndiyo thaka iyo, gobe landakulizanyila,” koleba Yahwe, “ngoti wakandikangang'wa ukagalabgwe midzimu isi ye malebeswa.

²⁶Ndowokuambula thako iyo ndizwimba buso gugo, kuti ndizo ubhakhwe nge shoni.

²⁷Ndakabona zwithu zwizo zwinoshimisa mu minda bupongwe gugo gunobhatisa shoni, Yee mme wee wapalala iwe Jerusalema! Kowotola tjibaka tjingapani kuti utjenapadziwe kene?”