Read Kalanga Jeremiya 14 Bible Online

Jeremiya 14 - Kalanga bible

Jeremiya 14

¹Dama la Yahwe lakazha kuna Jeremiya ngekwe zhala liti,

²“Juda inolila, mikoba yayo yakawomelela, inolilila shango, tjililo tjohwika kudwa mu Jerusalema.

³Banokudziwa banotuma balanda babo kunotjela vula, banoswika ku matshime ngono bakashaya vula, banobgwilila ne hali dzabo dzisina tjimwe, bakaswaba bakabhapkhwa nge shoni, bakazwifukidza misholo yabo.

⁴Ngoti shango yakakwakwalala, ngoti kusina vula mu shango, balimi banobhakhwa nge shoni, bakazwifukidza misholo yabo.

⁵Nanga phala mu shango inofupatila bana bayo, ngoti kusina bushwa.

⁶Madonki e shango amile mu matuthu asina miti, anofema phepo akalembedza lulimi se phungubgwe, mesho awo aatjabonesesa, ngoti akuna fulo.

⁷“Nenguba matjinyo edu epa butendeki nge kwedu, bhatshani kaa Yahwe ngekwe zina lenyu, ngoti kuyenda tiwa kwedu ku njinji takamutjinyila.

⁸Imwi kugalabgwe kwe Iziraela, ntjidzi wayo mu tjibaka tje mang'oni, ini mungabe se ntaya mu shango, se mwezi unolala gwe hwope koga kene?

⁹Ini munga nthu wapelegwa nge nkumbulo, se mbhayani wakasima usingake kabhatsha wali? Koga imwi Yahwe mupakati kwedu, kakale todang'wa nge zina lenyu, musitifupatile.”

¹⁰Yahwe bakati ngekwe bathu ibaba, “Bakada kudziyidzika sa ikoko, abazodziba makumbo abo, ndizo Yahwe abatobaamutjila, ngwenu banowokumbula matjinyo abo, ngono banowobaloba shamu ngekwe zwibi zwabo.”

¹¹Yahwe bakandidwa bakati, “Usitongotembezelela mamuko e bathu ibaba.

¹²Kene bakazwinyima zojiwa, anditohwa tjililo tjabo kene bakadusa tjibhayilo tjinopisiwa ne tjibhayilo tje tjipo andingazwiamutjile koga ndowozwikolomodza nge thumo nenge bhamba ne bugwele.”

¹³Ipapo ndakati, “Awo, She Yahwe, bonani balebesambeli banobadwa beti, ‘Amutowobona thumo kene mukabe mu bhamba, koga ndowomupa kunyalala kwakapelela mu magalo iyawa.’ ”

¹⁴Yahwe bakandidwa bakati, “Balebesambeli banolebeselambeli manyepkhwa nge zina langu, andizobatuma kene kuli kubadwa tjimwe kene kuti balebeleke nabo. Banolebesambeli kukuli mbono ye manyepkhwa ne bung'anga ne butjebeli gwe mikumbulo yabo.

¹⁵Ndizo Yahwe bakati ngekwe balebesambeli banolebesambeli mu zina langu nenguba ndisakabatuma beti, ‘Thumo ne bhamba azwitowozha mu shango iyeyi,’ nge thumo ne bhamba balebesambeli ibabo banowoloba.

¹⁶Ngono ku bathu babanolebesela mbeli banowoposegwa mu dzizila dze Jerusalema zwitumbu zwafa zwibulawa nge bhamba ne thumo ngono kusina ungababiganya, bakadzi babo ne bakololo babo be bakololokadzi babo. Ndowotebulila bubi gwabo pezhugwi kwabo. Ngono ubabudze dama yeli,

¹⁷“Mesho angu ngaaunge mishodzi siku ne sikati, ‘Ngono ngaisitongoma, ngoti mwanadi tjianadi tje bathu bangu tjabe ne banga lisishoma, walobgwa kukulukulu kwazo.

¹⁸Ha ndibhudila ku shango, bonani ndowana bakalobgwa nge thumo! Ha ndingina mu nzi nkulu, bonani, njigwele dzinozhisiwa ne bhamba! Ngoti nlebesambeli ne mpirisiti banozwithamila zwithu zwabo, mu shango basina hwisiso yakwako.’ ”

¹⁹Apa makalasha Juda tjoselele? Apa molingila pasi nzi nkulu we Ziyoni kene? Apa matilobelani nge masimba mangapa kudzina kushaya bhodzo mutili kene? Takashaka kunyalala koga akuzozha, nge tjibaka tje bhodzo bonani mang'oni woga.

²⁰Toamutjila bubiibi gwedu imwi Yahwe, ne matjinyo abo bobatategulu bedu, ngoti takamuthamila tjibi.

²¹Musitongotilingila pasi ngekwe zina lenyu, musitongolengudza tjigalo tjenyu tjakanaka, kumbulani musitjuluke tjidumano tjenyu tjamakathama naswi.

²²Apa kuna mmwe we midzimu isina nshingo ye shango inganisa vula kene? Kene zhuzhugwi kunganisa vula ngekwako kene? Aa, ndimwi koga, imwi Yahwe Ndzimu wedu. Takabiga kugalabgwe kwedu mu muli, ngoti ndimwi munothama zwithu zose.