Read Kalanga Jeremiya 15 Bible Online

Jeremiya 15 - Kalanga bible

Jeremiya 15

¹Ipapo Yahwe bakandidwa beti, “Nenguba Mushe na Samuele bangama mbeli kwangu bekumbilila bathu ibaba, andingahwile ngoni bathu ibaba. Baduse mbeli kwangu, ubaletje bayende.

²Ha bekubhuzwa beti, ‘Tiyende ngayi?’ Ubadwe uti, ‘Yahwe bakati, “ ‘Ibabo bakalingisana ngofa nge bugwele ngabayende ku bugwele, ibabo bakalingisana ngofa nge thumo ngabayende ku thumo, ibabo bakalingisana ngofa nge bhamba ngabayende ku bhamba, ibabo bakalingisana nge busungwa ngabayende ku busungwa.’

³“Ndowobatumila zwikolomoli zwinna, kojalo Yahwe, thumo kubulaya ne mbgwa kubaluma ne nyuni dze phepo ne phuka dze shango kuja ne kukolomola.

⁴Ndowobathama tjithu tjinopalusa moyo ku mibuso yose ye shango ngekwe tjakathamiwa mu Jerusalema ndi Manase nkololo wa Hezekiya mambo we Juda.

⁵“Ndiani unowokuhwilangoni iwe Jerusalema, kene ndiani unowokulilila? Ndiani unowotjebuka, kabhuzwa ngekwe mamuko awo kene?

⁶Makandifupatila kojalo Yahwe, mogala makabgwilila shule koga, ndizo ndakatambunudza luboko gwangu kukukolomodza, ndanyadziwa nge kumuhwila ngoni.

⁷Ndakabawulusa nge luselo, ku mikoba ye mizi mikulu ye shango. Ndakazhisa tjililo mu bali, ndakakolomola bathu bangu, ngono abazoshandukila mipanga yabo.

⁸Ndakathama tjilikadzi dzabo dzikabe njinji, kupinda nsetje we gungwa, Ndakazhisa nkolomodzi, kuna bomme be bazhuzha masikati, Ndakazhisa buyendasi ne kupalukamoyo kukulu, kuti kubawile tjinyolotjo.

⁹Iye wakazwala bali kutendeka unotimbama, unofema lile le bupelo, zhuba lile lammilila kutji masikati, wakabhakhwa ne shoni kalengudzika. Bose basala ndowobapila thumo, mbeli kwe zwita zwabo, koleba Yahwe.”

¹⁰Yee mme wee ndapalala imi, mmeyangu kuti mube makandizwala, nthu we kudziyidzila ne ngwa mu shango yose. Andizoadzima kene kuli kuadzimiwa tjimwe koga bose banondilonga bhiso.

¹¹Yahwe bakati, “Nge malebeswa ndowokutjidzila bubuya, ndowothama kuti zwita zwizo zwikukumbile mu zwibaka zwe mang'oni ne zwibaka zwe manikano.

¹²Apa nthu ungavuna butale, gunodwa ku bunandzwa ne phangula kene?

¹³“Fumwa yenyu ne thundu dzenyu ndowothama kuti dzitapiwe, kusina ndipo, ngekwe zwibi zwenyu mituthu yenyu yose.

¹⁴Ndowothama kuti mushingile zwita zwenyu mu shango yamusingazibe, ngoti moto unothuta nge kugwadzamoyo kwangu, unowothuta nge kusingapele.”

¹⁵Koziba imwi, imwi Yahwe, mundikumbule mundikumbe, mundigwile muna banondidziyidza. Musibe ne moyo nlefu mubali kuti badzine bandibulaye, kumbulani kuti ndakamililana ne masapa abo tjini nge kwenyu.

¹⁶Ndakati ndiwana matama enyu aaja, kashathisa moyo wangu, ngoti ndodang'wa nge zina lenyu, imwi Yahwe Ndzimu Masimbawose.

¹⁷Andizotongogala pakati kwe bakashatha, kene kuli kushatha nabo, Ndakagala ndoga ngoti luboko gwenyu guli pezhugwi kwangu, ngoti makandizhadza ne bushongola.

¹⁸Ini zogwadza zwangu zwisingapele, ne mabanga angu ali asingapole? Apa mowonga nkuku unotjengedza kene, se vula isingagalikebgwe kene?

¹⁹Ndizo Yahwe bakati, “Ha ungashanduka, ndowokubgwiliza mu tjimo, ngono unowoma mbeli kwangu, Ha uleba tjibuyanana kusi matama asina nshingo, unowobe nlebelekeli wangu. Banowoshandukila kukuli, ngono iwe autowoshandukila kubali.

²⁰Ndowokuthama dizhilo le guma le phangula ku bathu ibaba, banowogwa nawe, koga abangakukunde, ngoti ndinawe, kukusunungula ne kukutjidza,” koleba Yahwe.

²¹“Ndowokusunungula mu luboko gwe mbimbi, akudzutunula muna botetshi bakabipa moyo.”