Read Kalanga Jeremiya 16 Bible Online

Jeremiya 16 - Kalanga bible

Jeremiya 16

¹Dama la Yahwe lakazha kundili liti,

²“Usitongolobola kene kuli kube ne bakololo kene bakololokadzi mu bugalo igogu.”

³Ngoti Yahwe bakati ngekwe bakololo ne bakololokadzi banozwaligwa mu bugalo igogu nenge kwa bomme bakabatshibama na botate bakabazwalila mu shango iyeyi,

⁴“Banowobulawa nge bugwele gwakabangalala. Abatowoliligwa kene kubiganyiwa, banowonga nthudze mu minda. Banowolobesiwa nge thumo ne zhala, zwitumbu zwabo zowobe zojiwa zwe nyuni dze zhuzhugwi ne phuka dze shango.”

⁵Ngoti Yahwe bakati, “Usitongo ngina mu ng'umba ye tjililo kene kuli kunolila nabo kene kuli kubanyaladza, ngoti ndakadusila kutjena mbakiso yangu pakati kwe bathu ibaba,” koleba Yahwe. “Ndakadusa ludo gwangu gusingazunguzike ne mahwilo ngoni.

⁶Bose bakulu ne batukununu banowofila mu shango iyeyi, abatowobiganyiwa akuna unowobalilila kene kazwitjeka kene kuzwitesela nge kwabo.

⁷Abatowobhikila wafigwa zojiwa kene kuli kun'nyaladza, akuna unowon'tjelela vula ye nyaladzo ngekwa tate babe kene na mme babe.

⁸“Usitongongina mu ng'umba ye nzano ukagala nabo ukaja ukang'wa nabo.

⁹Ngoti Yahwe Masimbawose, Ndzimu we Iziraela bakati, ‘Bonani, ndowopedza nsindo we mpululu ne we kushatha ne mahwi e nloboli ne nlongo mu bugalo igugo.

¹⁰“ ‘Ha ubudza bathu ibaba kose ikoku bebe bekubhuzwa beti, “Ini Yahwe batisumikilisa nge zwithu izwezwi zwibiibi kene? Jinyo ledu ini? Tjibi tjatakathamila Yahwe Ndzimu wedu nditjipi?”

¹¹Ipapo ubadwe uti, “Ngoti bobatategulu benyu bakandifupatila,” koleba Yahwe, “ngono bakatobela midzimu ipoga bakaishingila kakale bakaithigamila. Bakandifupatila, bakasilondolodze nlayo wangu.

¹²Koga imwi makathama bubi gunopinda gwa bobatategulu benyu, ngoti bonani, mmwe ne mmwe wenyu unotobela bukomba gwe bubi gwe moyo uwe, elamba kunditeedza,

¹³ndizo wali ndowomulashila kuzhe kwe shango iyeyi ndikanomulashila ku shango isakatongoti imwi kene bobatategulu benyu bakaiziba, ikoko mowoshingila midzimu ipoga siku ne sikati ngoti imi anditowolakidza lubu mumuli.”

¹⁴“ ‘Ndizo bonani mazhuba aswika,’ kojalo Yahwe, ‘kunowoti kukasheteka unoti, “Na Yahwe banotjila, bakadusa Baiziraela mu shango Egipiti,”

¹⁵koga banowoti, “Na Yahwe banotjila, bakadusa Baiziraela mu shango ye bunandzwa ne mu shango dzose dzabakabatatila ko.” Ngoti ndowobabgwiliza ku shango yabo yandakapa bobatategulu babo.

¹⁶“ ‘Bonani ndotumila babhati be hwobe banjinji kojalo Yahwe, ngono banowobabhata, shule kwa ipapo ndowotumila bavimi banjinji ngono banowobavima mu matuthu mamwe ne mamwe ne mu matombo mamwe ne mamwe ne mu phaswa dze shongwe.

¹⁷Ngoti mesho angu akalinga zila dzose dzabo. Abanga ndibgwatile.

¹⁸Ndipo ye matjinyo ne zwibi zwabo ndoiwatsha kabili, ngoti bakazhadza shango yangu shambgwa nge zwitumbu zwe midzimu yabo inoshimisa, bakazhadza thaka yangu nge zwithu zwabo zwinoshimisa.’ ”

¹⁹Imwi Yahwe, simba langu, dizhilo langu, mabgwatilo angu mu zhuba le mang'oni, ku muli shango dzose dzowozha, dzidwa ku phelelo dze shango dziti, “Bobatategulu bedu akuna tjabakathuwa kuzhe kwe midzimu ye manyepkhwa, zwithu zwisina nshingo zwisina mbuzilo.

²⁰Apa nthu ungazwithamila midzimu? Ee, koga ate ili midzimu.

²¹“Ndizo ndowobadiya ngwenu ndowobadiya simba langu ne matatabuko angu. Ipapo banowoziba, kuti zina langu ndi Yahwe.”