Read Kalanga Jeremiya 2 Bible Online

Jeremiya 2 - Kalanga bible

Jeremiya 2

¹Dama la Yahwe lakazha kundili liti,

²“Yenda unoleba mu zebe dze Jerusalema uti, ‘Yahwe bakati, “Ndokumbula kuzwipa kwe butjetjana gugo ne ludo gugo gwakabe gunga gwe nlongo, ugala wakandisala shule mu tjilambanyika, mu shango isakadzwagwa tjimwe.

³Iziraela yakabe yakayengemala kuna Yahwe, ntjelo we kutanga we kuvuna kukwe. Bose bakabatja bakazwibona nlandu bubi gukabawila,” ’ ” koleba Yahwe.

⁴Ihwani dama la Yahwe imwi ng'umba ya Jakubo ne misha yose ye ng'umba ye Iziraela.

⁵Yahwe bakati, “Nlandu wakawang'wa ndi bobatategulu benyu mu ndili ndiupi, wakayita kuti bayendile kule nami, basale shule midzimu isina bhatsho ngono bakabe basi betjimwe kundili kene?

⁶Abazobhuzwa beti, ‘Yahwe bangayi kene, ibo bakatidusa mu shango ye Egipiti, ibo bakatitungamila mu tjilambanyika, mu shango yakakwakwalala ina makomba, mu shango ye bhamba ne zhalima demadema, mu shango isina unoipalama, kusina nthu unogala muili kene?’

⁷Ndakamuzhisa mu shango ye bhokonyogwa, kuti muje mitjelo yayo na zose zwayo zwakanaka. Koga makati mungina muili mukatemapadza shango yangu, mukathama thaka yangu tjinoshimisa.

⁸Bapirisiti abazobhuzwa beti, ‘Yahwe bangayi kene?’ Ibo bakabe beshinga nge nlayo bakabe basinga ndizibe, balauli bakandipandukila, balebesambeli belebelekelambeli na Bhaale, bakasala shule midzimu isina bhatsho.

⁹“Ndizo ndina ndebo namwi,” koleba Yahwe. “Nenge bana be bana benyu ndowobe ne ndebo nabo.

¹⁰Tjulukilani ku tjekelo dze Khitimu mubone, kene tumani bathu ku Kedari banolingisisa nge njele, mubone kuti kwakatongobe ne tjakajali kene.

¹¹Apa itjaba tjakatongo teetshanya midzimu yatjo, nenguba isi midzimu dumbu kene? Koga bathu bangu bakateetshanya gudzo labo, nge midzimu isina bhatsho.

¹²Kaabalani imwi mazhuzhugwi ngekwa itjetji, Lobgwani ne hana musale musina mate,” koleba Yahwe.

¹³“Ngoti bathu bangu bathama zwibi zwibili, bakandifupatila, imi tshime le vula ye butjilo, bakazwitshila matshime abo, matshime ana mikhwe asingabhate vula.

¹⁴“Apa Iziraela i nlanda kene? Apa wakazwaligwa mu bulanda kene? Ini ngono abe thundu inotapiwa?

¹⁵Shumba dzakambombela, dzakabombela pezhugwi. Dzakathama kuti shango iye ithukudzike, mizi mikulu iye matongo asina bagali.

¹⁶Pezhugwi kwa ipapo balume be Memifisi ne Tahefanesi bakapkhwanya ipepe tje nsholo uwo.

¹⁷Apa amuzozwizhisila itjetji pezhugwi kwenyu, nge kufupatila Yahwe Ndzimu wenyu, tjibaka tjabakabe bakamutungamila mu zila kene?

¹⁸Ngwenu mobuyigwa ngeni kuyenda ku Egipiti, kunong'wa vula dze Naili kene? Kene mobuyigwa ngeni ngoyenda ku Asiriya kunong'wa vula dze Yufuratesi kene?

¹⁹Bubi gwenyu gowomuloba shamu, kuzwilasha kwenyu kowomutjemela. Zibani kakale bonani kuti kwakabipa kakale kobaba kufupatila She Yahwe wenyu, kunditja akupo mu muli,” koleba Yahwe Ndzimu Masimbawose.

²⁰“Ngoti kwatjibe tjibaka makavuna jokwi lenyu makathubula misungo yenyu, ngono muti, ‘Atitowomushingila.’ Ee, mu duthu limwe ne limwe lefulefu, ne kusi kwe miti mimwe ne mimwe mitala mukalala pasi se fukula.

²¹Ngono imi ndakamudzwala muli nzhambi mbuyanana, muli mbewu yakanaka dumbu. Kwakazha tjini kuti mundishandukile mube bakabola mube nzhambi we shango kene?

²²Nenguba mungula nge isipa mukashingisa isipa tjinjinji, kubasa kwe jinyo lenyu kutji mbeli kwangu, koleba She Yahwe.

²³Mungaleba tjini wali muti, ‘Atizotemapala atizotobela bo Bhaale?’ Bonani kuti makazwibhata tjini ku nkuku, bonani zwamakathama, monga kamela hadzi, inolabuka iyenda yeno na yeno itjuluka zila ishaka ndume,

²⁴monga donki tje shango tjakawolobela tjilambanyika, tjinuhwidza phepo tjikwiyigwa, ndiyani ungadziba njemulo dzatjo wali? Bose banotjishaka akuna unozwinyadza nge kwatjo, mu tjibaka tje kukwiyigwa banowotjibona.

²⁵Musitizhe kudzina matshambo enyu esubuka ne hwulo dzenyu dzikawomelela nge nyota. Koga makati, ‘Akutobhatsha, ngoti takada midzimu ipoga, ngono towoitobela.’

²⁶“Koga se mbava inobhakhwa nge shoni yabhakhwa ne ng'umba ye Iziraela bo inobhakhwa nge shoni, ibo na bomambo babo ne makulukota abo ne bapirisiti babo ne balebesambeli babo,

²⁷ibo banoti ku guni, ‘U tate bedu,’ ku bgwe bakati, ‘Makatizwala,’ ngoti bakandifupatila pana kuti bashandukile kundili, koga abali mu mang'oni banoti, ‘Milikani mutitjidze!’

²⁸Midzimu yenyu ingayi, iyo yamakazwithamila kene? Ngaimilike ha ingamutjidza, mu tjibaka tje mang'oni enyu, ngoti koga se bunji gwe mizi yenyu ne midzimu yenyu minji bo, imwi Bajuda.

²⁹“Ini mung'ong'ola nge kwangu? Makandipandukila, koleba Yahwe.

³⁰“Bana benyu ndakabalobela suli, abazo tjemeleka, mathumo enyu anolobesa balebesambeli benyu se shumba inozandabula.

³¹Koga tjizekugwana ndimwi bhulutanani dama la Yahwe. Apa ndakatongobe tjilambanyika ku Iziraela kene, kene abe shango ye ishaka tjakati tshi? Ngono ini bathu bangu beti, ‘Takasununguka, atingazhe kumuli kene?’

³²Apa mwanadi ungakangang'wa zwizholo zwizwe, kene nlongo thako iye ye ndobolo kene? Bathu bangu bakandikangang'wa, kwe mazhuba asina mbalo.

³³“Moziba seni zila yenyu yekushaka ludo bakadzi be zwinyanya bangazwidiya mu muli.

³⁴Ne mu zwiambalo zwenyu kowanika malopa e bashayi basina nlandu, koga musakabawana bepkhwanya ng'umba, ne kwakajalo,

³⁵moti, ‘Atina nlandu, nge malebeswa gwadzamoyo kwabo kwashanduka patili.’ Bonani, ndowomuzhisa kuti musumikilisiwe, ngoti makati, ‘Amuzo thama tjibi.’

³⁶Ini mugala mushandula zila dzenyu tjinyolotjo? Mowobhatisiwa shoni ne Egipiti sekwa makabhatisiwa shoni ne Asiriya.

³⁷Ne muili mowobhuda koga, makasenga maboko mu misholo yenyu, ngoti Yahwe balamba ibabo bamunogalabgwe, ngono amutowobhudilila nge kwabo.