Read Kalanga Jeremiya 20 Bible Online

Jeremiya 20 - Kalanga bible

Jeremiya 20

¹Kwakati mpirisiti Pashihuri nkololo wa Imeri wakabe ali ntungamili mu Ng'umba ya Yahwe kahwa kuti Jeremiya wakabe elebesambeli ngekwe zwithu izwezwi.

²Ipapo Pashihuri kaloba Jeremiya nlebesambeli kansungilila makumbo mu bhangwana lakabe lili tjapezhugwi ku Nkoba wa Bhenjamini we Ng'umba ya Yahwe.

³Tjimuka kwakati Pashihuri esunungula Jeremiya mu bhangwana Jeremiya kandwa kati, “Yahwe abatjakudana Pashihuri botjikudana ‘Ndziyidzi mbizho dzose.’

⁴Ngoti Yahwe bakati, ‘Bona ndowokuthama ndziyidzi kukuli ne ku bakwinya babo bose. Banowobulawa nge thumo le zwita zwabo iwe wakalingilila. Ndowolonga Juda yose mu maboko a mambo we Bhabhiloni, unowobatapila ku Bhabhiloni, ngono unowobabulaya nge thumo.

⁵Pezhugwi kwa ipapo ndowolonga fumwa yose ye nzi nkulu ne mimwiso yawo yose ne zwija zwawo zwe ntengo upezhugwi ne zose zwe matula a bomambo be Juda mu maboko e zwita zwabo, banowozwitola bakazwitapa bakazwisengela ku Bhabhiloni.

⁶Ngono iwe Pashihuri na bose banogala mu ng'umba iyo mowotapigwa ku Bhabhiloni iko mokuyenda mukanofila ikoko ngono banowomubiganyila ikoko, imwi ne bakwinya benyu bose ibo bawakalebesambeli manyepkhwa ku bali.’ ”

⁷Imwi Yahwe makanditjengedza, ngono atjengedzeka, nenguba makasima kundipinda, kakale makandikunda. Ndatjibe tjiseko zhuba lose, mmwe ne mmwe unondidadila.

⁸Ngoti tjibaka ne tjibaka andilebeleka ndomimila, ndimimila nditi, “Phiphiti ne golomodzo!” Ngoti dama la Yahwe landizhisila, kutukiwa ne kugongobogwa zhuba lose.

⁹Ha nditi, “Anditjofa ndabakumbula, kene alebeleka ngekwe zina labo,” ngakunge moto unopisa mu moyo wangu, moto wakazhaliligwa mu mafupa angu. Ndanyadziwa ngo dzikitadza, ngono andingatjatubule.

¹⁰Ngoti ndohwa kunyebezela kunjinji, zogwadza zwizhele mbizho dzose. “Muntjeteni, ngati ntjeteni!” Bakwinya bangu bose bandinotjila nabo bakalingilila kuwa kwangu. “Pamwe unowotjengedzeka, ipapo tikankunda, ngono tikazwibgwilizila mu nli.”

¹¹Koga Yahwe banami bali mbayani unotjisa, ndizo badziyidzi bangu banowokuthiwa, abangandikunde. Banowobhakhwa nge shoni kwazo, ngoti abatowobhudilila. Kulengudzika kwabo kusingapele akutowokanganika.

¹²Imwi Yahwe Masimbawose molika nlulwami, mobona tjimu moyo ne mu nkumbulo, imani ndibone kubgwilizila kwenyu mu bali, ngoti ndamupa ndebo yangu.

¹³Mbilani Yahwe, kudzani Yahwe! Ngoti basunungula butjilo gwe unosheta, mu luboko gwe mbiimbi.

¹⁴Bhiso ngalibe mu zhuba landakazwagwa nalo! Zhuba la mme bangu labakandizwala ngalisikombolegwe!

¹⁵Bhiso ngalibe mu nthu wakawodwa tate bangu eti, “Wazwaligwa nkololo,” ethama kuti bashathe kwazo.

¹⁶Nthu iwoyu ngaange mizi mikulu, yakakolomogwa ndi Yahwe basina ngoni, Ngaahwe tjililo mangwanana, ne lunyanga gunotjenjedza masikati zhuba lili pa thongoma,

¹⁷ngoti azondibulayila mu tjibumbilo, kuti ndizo mmeyangu babe ikumbu tjangu, ipapo bakabe bowogala bakazwisenga tjatjose.

¹⁸Ini ndakabhuda mu tjibumbilo, kuti ndiwobona kudziyidzika ne buyendasi, ne kugala mazhuba angu ndilengudzika kene?