Read Kalanga Jeremiya 21 Bible Online

Jeremiya 21 - Kalanga bible

Jeremiya 21

¹Dama lakazha kuna Jeremiya lidwa kuna Yahwe, tjibaka tja Mambo Zedekiya tjabakatumila Pashihuri nkololo wa Malikhiya na Zefaniya we mpirisiti nkololo wa Maasiya kunli liti,

²“Tibhuzwile Yahwe, ngoti Nebukadineza mambo we Bhabhiloni unogwa naswi, pamwe swiyo Yahwe banowotithamila mishingo yabo yose inotjenamisa bakathama kuti atiletjedze.”

³Ipapo Jeremiya kati kubali,

⁴“Idwani Zedekiya muti, ‘Yahwe Ndzimu we Iziraela bakati, “Bonani, ndowoshandusa mathumo e ngwa amu maboko enyu amunoshingisa kugwa na mambo we Bhabhiloni ne kugwa kwe Bakhaladiya bakamukomba kuzhe kwe makuma, ngono ndowobakubunganyila pakati kwe nzi iwoyu nkulu.

⁵Imi nge kwangu ndowogwa namwi nge luboko gwakatambunuka gwakasima mu kugwadzamoyo kunothuta ndina bushongola gwakabangalala.

⁶Ndowobulaya bagali be nzi iwoyu, bathu kose ne zwithuwo zowobulawa nge bugwele bukulu kwazo.

⁷Kudwa ipapo, koleba Yahwe, Zedekiya mambo we Juda ne makulukota awe ne bathu be nzi iwoyu nkulu banowobe basiya bugwele ne thumo ne bhamba, ndowobalonga mu maboko a Nebukadineza mambo we Bhabhiloni, mu maboko a ibabo bagala beshaka butjilo gwabo. Unowobaloba nge mpitsho we thumo, aatowobe ne ngoni mu bali kene kubasiya kene kubahwilazogwadza.” ’

⁸“Ngono ku bathu ibaba ubadwe uti, ‘Yahwe bakati, “Bonani, ndobiga zila ye butjilo ne zila ye lufu mbeli kwenyu.

⁹Iye unogala mu nzi iwoyu nkulu unowofa nge thumo nenge bhamba ne bugwele koga iye unobhuda kazwipa ku Bakhaladiya bakamukomba unowotjila kawana butjilo gugwe guli igo mbhailo we ngwa.

¹⁰Ngoti ndakalingisana ne kubhayana ne nzi nkulu iwoyu we mbipo usi we bubuya, kojalo Yahwe. Unowolongwa mu maboko a mambo we Bhabhiloni ngono akawupisa nge moto.” ’

¹¹“Kakale udwe be ng'umba ya mambo we Juda uti, ‘Ihwa dama la Yahwe,

¹²Iwe ng'umba ya Dafite! Yahwe bakati, “ ‘Sumikilisani nge ndulamo mu mangwanana, munsunungule mu luboko gwe ntshambilidzi, iye wakatolegwa, kuyita kuti bushongola gwangu gusithute se moto, kungadwa kusheta ungagudzima, ngekwe mishingo yenyu mibiibi.’

¹³Bona ndobhayana nawe, iwe n'gali we nkuku, iwe shongwe yakawala, koleba Yahwe, iwe unoti, ‘Ndiyani ungazha katinginilila, kene ungangina mu magalo edu wali?’

¹⁴Ndowokuloba shamu kuyendidzana nge mitjelo ye mishingo iyo, koleba Yahwe. Ndowobhatidza moto mu ishaka tjitje, ngono unowoja tjimwe ne tjimwe tjakampoteleka.”