Read Kalanga Jeremiya 24 Bible Online

Jeremiya 24 - Kalanga bible

Jeremiya 24

¹Yahwe bakandilakidza mbono, ndakabona zwitundu zwili zwibili zwina phaya zwakabigwa mbeli kwe Ng'umba ya Yahwe, kwakabe kuli shule kwa Nebukadineza mambo we Bhabhiloni asinotapa kudwa mu Jerusalema Jekoniya nkololo wa Jehoyakimu mambo we Juda kose ne makulukota e Juda ne babezhi ne bathuli be butale ebayisa ku Bhabhiloni.

²Itundu tjimwe tjakabe tjina phaya dzakanaka dzinga phaya dzinobidwa kutanga koga itundu tjimwe tjakabe tjina phaya dzinobipa, dzibipa kwadzakabe dzisingake dzikajika.

³Ngono Yahwe bakati kundili, “Unobonani Jeremiya?” Adabila nditi, “Phaya, phaya dzakanaka dzakanakilila ne phaya dzakabipa, dzakabipa kwazo kwadzisingake dzikajika.”

⁴Ipapo dama la Yahwe likazha kundili liti,

⁵“Yahwe Ndzimu we Iziraela bakati, ‘Koga se phaya idzedzi dzakanaka ndowotola batapiwa banodwa mu Juda se bakanaka, ili bandakatata mu bugalo igogu ndibatatila ku shango ye Bakhaladiya.

⁶Ndowobalonga mesho kubathamila zwakalulwama, ndowobabgwiliza mu shango iyeyi. Ndowobabaka asibapalulanye, ndowobalima asibadzikunule.

⁷Ndowobapa meya dze kuziba kuti ndimi Yahwe ngono ibo banowobe bathu bangu imi abe Ndzimu wabo ngoti banowoshandukila kundili nge mimoyo yabo yose.’

⁸“Koga Yahwe bakati, ‘Koga se phaya dzinobipa, dzinobipa kwadzisingake dzikajika, ndiko sekwa kwandiwobhata Zedekiya mambo we Juda ne makulukota awe ne malimbelimbe e Jerusalema anowobe asala mu shango iyeyi na bose banogala mu shango ye Egipiti.

⁹Ndowobathama badziyidzi ku mibuso yose mu shango, ndowobathama madado ne tjiseko ne bhiso mu magalo wose andinobatatila ko.

¹⁰Ndowotumila thumo ne bhamba ne bugwele kubhayana nabo kuswikila bakolomogwa mu shango yandinobapa ibo na botate babo.’ ”