Read Kalanga Jeremiya 25 Bible Online

Jeremiya 25 - Kalanga bible

Jeremiya 25

¹Dama lakazha kuna Jeremiya ngekwe bathu bose be Juda mu gole le bunna la Jehoyakimu nkololo wa Josiya mambo we Juda lakabe lili ilo gole le kutanga la Nebukadineza mambo we Bhabhiloni.

²Ndizo Jeremiya nlebesambeli kabudza bathu bose be Juda na bose banogala mu Jerusalema eti,

³“Dama la Yahwe tjinga kwalakazha kundili kudwa mu gole le bugumi lina butatu (13) la Josiya nkololo wa Amoni mambo we Juda kuswikilila zhuba la nasi kwatjibe makole ali makumi mabili ana butatu (23) ndakabhata ndilebeleka namwi ndakalonga meya mu nyama koga amuzoteedza.

⁴Amuzoteedza kene kuzhula zebe dzenyu kuhwa nenguba Yahwe bakabe bakabhata betumila bose balanda babo bapirisiti,

⁵beti, ‘Mmwe ne mmwe wenyu ngaashandukile zila dzidze mbimbi ne mishingo iye mibiibi ngono agale mu shango yamakapiwa ndi Yahwe imwi na bobatategulu benyu kudwa tjose ntolo ne nge kusingapele.

⁶Musitobele midzimu ipoga kuti ndizo muishingile ne kuinamata kene kunditanga kundigwadzisa moyo nge mishingo ye maboko enyu. Ipapo anditowothama tjimwe tjakabipa.

⁷Koga amuzonditeedza makanditanga kundigwadzisa moyo nge mishingo ye maboko enyu, muzwizhisila mbipo.’ Kojalo Yahwe.

⁸“Ndizo Yahwe Masimbawose bakati, ‘Ngoti amuzobhulutana matama angu,

⁹bonani, ndowotumila ku njudzi dzose dze bunandzwa ne kuna Nebukadineza mambo we Bhabhiloni nlanda wangu, ndibatola ndibazhisa ngeno kuti bagwe ne shango iyeyi ne bagali bayo ne zwitjaba zose zwakaipoteleka. Ndowobakolomola tjoselele ndikabathama tjithu tjinopalusa moyo ne madado ne golomodzo lisingapele.

¹⁰Pezhugwi kwa ipapo ndowodusa mubali misindo ye kushatha ne mpululu ne mahwi e unolobogwa ne e nloboli ne nsindo we gwiyo ne tjedza tje luvone

¹¹Shango iyeyi yose inowobe dongo ikasala yakathukudzika ngono zwitjaba izwezwi zose zowoshingila mambo we Bhabhiloni makole ali makumi ali kutendeka (70).

¹²Ipapo kowoti makole ali makumi ali kutendeka asinowila, ndowoloba shamu mambo we Bhabhiloni ne itjaba itjetjo, shango ye Bakhaladiya, ngekwe jinyo labo ndithama shango dukuthuku lisingapele, kojalo Yahwe.

¹³Ndowoshingikadzila shango iyeyo matama wose andakalebela nge kwayo, matama wose akakwagwa mu lukwalo igogu, akalebgwa ndi Jeremiya ngekwe zwitjaba zose.

¹⁴Ngobe zwitjaba zwinjinji na bomambo bakasima banowobathama balanda, ngono ndowobabgwilizila kuyendidzana nge mishingo yabo nenge mishingo ye maboko abo.’ ”

¹⁵Ngoti Yahwe Ndzimu we Iziraela bakandidwa beti, “Tola mu luboko gwangu bhepe le nkumbi we bushongola ngono uthame kuti zwitjaba zose zwandinokutuma kuzwili zwiung'we.

¹⁶Zowong'wa zwikatshatsharika zwikapenga ngekwe thumo landinowotumila pakati kwabo.”

¹⁷Ndizo ndakatola bhepe mu luboko gwa Yahwe athama kuti zwitjaba zose Yahwe zwaba ndituma kuzwili bang'we mulili,

¹⁸Jerusalema ne mizi mikulu ye Juda, bomambo bayo ne makulukota kuzwithama dukuthuku ne dongo ne tjithu tjinopalusa moyo ne madado ne bhiso sekwa zwili izo ngwenu.

¹⁹Faro mambo we Egipiti ne balanda bose ne makulukota awe ne bathu babe bose,

²⁰ne bathu be shango dzipoga bapakati kwabo, na bomambo be shango ye Uzi na bomambo bose be shango ye Bafilisitiya (Ashikeloni ne Gaza ne Ekironi ne malimbelimbe e Ashidodi),

²¹Edomu ne Moabu ne bakololo ba Amoni,

²²na bo mambo be Tire ne Sidoni, bomambo be kutjekelo dze shango seli kwe gungwa,

²³Dedani ne Tema ne Bhuzi na bose banotesela theswi dze mavudzi abo,

²⁴bomambo bose be Arabiya na bomambo be njudzi dzakashangana banogala mu tjilambanyika

²⁵na bomambo bose be Zimiri na bomambo bose be Elamu na bomambo bose be Mediya,

²⁶na bomambo bose be ku bunandzwa bakule ne bapejo ngotobedzana kwabo ne mibuso yose ye lubumbo imu shango. Shule kwabo bose kowotobela mambo we Bhabhiloni ngono unowong'wa bo.

²⁷“Ipapo ubadwe uti, ‘Yahwe Masimbawose, Ndzimu we Iziraela bakati, “Ingwani mulaladze muthwe, iwani ngono musitongotjamuka kakale ngekwe thumo landinotumila pakati kwenyu.” ’

²⁸“Koga abelamba amutjila bhepe mu luboko gugo kuti bang'we ipapo ubadwe uti, ‘Yahwe Masimbawose bakati, “Makafanila ng'wa!

²⁹Ngoti bonani, ndotangisa zhisa mbatsha ku nzi nkulu wandakadana nge zina langu ngono moti mowobhuda koga musalobgwa shamu kene? Amungabhude musalobgwa shamu, ngoti ndodana thumo kubhayana ne bagali bose be shango,” kojalo Yahwe Masimbawose.’

³⁰“Ngono iwe, lebeselambeli matama iyawa wose kubhayana nabo uti kubali, “ ‘Yahwe banowobomba kudwa pezhugwi, banowodadamula kudwa mu bugalo gwabo gwakayengemala, bakabomba kwakabangalala kubhayana ne shango yabo. Banowomimila sa ibabo banokanyanga zhambi, bakamimila bebhayana na bose bagali be shango.

³¹Nsindo unowohwika ku phelelo dze shango, ngoti Yahwe bana ndebo ne zwitjaba, banosumikilisa bathu bose, ngono babiibi banowobulawa nge thumo,’ kojalo Yahwe.

³²Yahwe Masimbawose bakati, ‘Bonani, mbhatsha dzoandama, kudwa mu itjaba kunoti ku itjaba, dutu lisishoma lomilidza, kudwa mu phelelo dze shango!’

³³“Ibabo banowobe babulaiwa ndi Yahwe mu zhuba ilelo banowowang'wa ku lubizho gumwe gwe shango kunoti kuli lubizho gumwe gwe shango, abatowoliligwa kene kuli dusiwa pabayapo kene kuli kubiganyiwa banowobe bakaandama se malala mu shango.

³⁴“Lilani imwi balisi, lilani, mubumbuluke mu nlota imwi beni be pkhwizi ne mbudzi, ngoti mazhuba ekubhayiwa kwenyu aswika, mowowa mukapkhwanyika se hali dzakanaka.

³⁵Balisi akuna kwabangatizhila, batungamili be pkhwizi ne mbudzi akuna magalo e dizhilo,

³⁶Ihwani tjililo tje balisi, guwo le batungamili be ngubi, ngoti Yahwe batjinya mafudzilo abo.

³⁷Matanga akabe ali mu mbakiso athukudzika, ngekwe bushongola bukulu gwa Yahwe.

³⁸Se shumba inosiya guwu layo, shango yabo inowothukudzika, ngekwe thumo le ntshambilidzi, ne ngekwe bushongola gwakabangalala gwa Yahwe.”