Read Kalanga Jeremiya 26 Bible Online

Jeremiya 26 - Kalanga bible

Jeremiya 26

¹Mukutangisa kwe kubusa kwa Jehoyakimu nkololo wa Josiya, mambo we Juda, dama ileli lakadwa kuna Yahwe liti,

²“Yahwe bakati, ‘Yenda ume mu nsha we Ng'umba ya Yahwe ngono usumikile ku mizi mikulu yose ye Juda inozha kuwonamata mu Ng'umba ya Yahwe matama andinokudwa kuti ualebe, usitongo siya ndodwa ne dama ling'ompela.

³Pamwe swiyo bangateedza mmwe ne mmwe wabo kashandukila zila iye mbiimbi. Ipapo abuza moyo asizhise mbatsha dzandabe ndakalongolosa ngekwe mishingo yabo mibiibi yabakathama.’

⁴“Ubadwe uti, ‘Yahwe bakati: Amusinga nditeedze, mukatobela nlayo wangu wandakabiga mbeli kwenyu,

⁵kakale amusingateedze matama e balanda bangu balebesambeli ibo bandakatumila kumuli ndipaphulula nenguba musakabateedza,

⁶ipapo ndowothama ng'umba iyeyi ikanga Shilo, ndowothama nzi nkulu iwoyu bhiso mu zwitjaba zose zwe shango.’ ”

⁷Bapirisiti ne balebesambeli ne bathu bose bakahwa Jeremiya elebeleka matama iyawa mu Ng'umba ya Yahwe.

⁸Ngono Jeremiya wakati apedza lebeleka kose kwaadwiwa ndi Yahwe kuti akubudze bathu, bapirisiti ne balebesambeli ne bathu bose bakambhata bakati, “Wakafanila kufa!

⁹Ini usumikila nge zina la Yahwe uti, ‘Ng'umba iyeyi inowonga Shilo ne nzi nkulu iwoyu unowobe dongo usina bagali muuli kene?’ ” Ipapo bathu bose bakakomba Jeremiya mu Ng'umba ya Yahwe.

¹⁰Kwakati makulukota e Juda behwa ngekwe zwithu izwezwi, bakazha bedwa ku ng'umba ya mambo bezha ku Ng'umba ya Yahwe bakagala pa nkoba we Nkoba ntshwa we Ng'umba ya Yahwe.

¹¹Ipapo bapirisiti ne balebesambeli bakabe bedwa makulukota ne bathu bose beti, “Nlume iwoyu wakafanila kusumikilisigwa lufu ngoti wasumikila ebhayana ne nzi nkulu iwoyu koga sekwa mazwihwigwa nge zibe dzenyu.”

¹²Ipapo Jeremiya kalebeleka ne makulukota ne bathu bose eti, “Yahwe bandituma kuti ndisumikile ngekwe ng'umba ne nzi nkulu iwoyu matama wose amahwa.

¹³Ndizo ke, lulwamisani zila dzenyu ne mishingo yenyu mubhulutana hwi la Yahwe Ndzimu wenyu ngono Yahwe banowobuza moyo mu mbatsha dzabamulingisanya.

¹⁴Koga nge kwangu, bonani, ndi mu maboko enyu. Thamani nge kwangu tjamunobona tjakamunakila kakale tjakamululwamila.

¹⁵Koga makafanila zibani nge lebeswa kuti amundibulaya, mozwitilika nlandu we lopa lisina nlandu imwi ne nzi nkulu ne bagali bawo, ngoti nge malebeswa Yahwe bakandituma ku muli kuti ndilebeleke matama wose iyawa mu zebe dzenyu.”

¹⁶Ipapo makulukota ne bathu bose bakadwa bapirisiti ne balebesambeli beti, “Nlume iwoyu aazofanila kusumikiligwa lufu ngoti walebeleka naswi nge zina la Yahwe Ndzimu wedu.”

¹⁷Sholotjena dzimwe dze shango dzikamilika dzikalebeleka ne gubungano lose le bathu dziti,

¹⁸“Mika we Moresheti wakalebesambeli mu mazhuba a Hezekiya mambo we Juda, edwa bathu bose be Juda eti, “ ‘Yahwe Masimbawose bakati: Ziyoni inowoligwa se nnda, Jerusalema inowobe duluthulu le magwada, Dombo le Ng'umba ye Ndzimu lowobe ishaka.’

¹⁹“Apa Hezekiya mambo we Juda ne Juda yose bakambulaya kene? Apa aazotja Yahwe kakumbila mahwilongoni muna Yahwe, ngono Yahwe bakabuza moyo mukuthama mbhatsha dzabakabe babalingisanya kene? Koga iswi toshaka kuzwizhisila mbatsha dzingapa kene!”

²⁰Kwakabe kuna nlume wakabe elebesambeli nge zina la Yahwe edang'wa Uriya nkololo wa Shemaya kudwa ku Kiriatijarimu. Wakalebesambeli ngekwe nzi nkulu iwoyu ne ngekwe shango iyeyi nge matama anonga a Jeremiya.

²¹Ngono kwakati Mambo Jehoyakimu ne babhayani babe bose ne makulukota wose behwa matama awe wose, mambo kashaka kumbulaya, kukati Uriya ehwa nge kwako katja ngono katizha katizhila ku Egipiti.

²²Ipapo Mambo Jehoyakimu katuma balume bo Elinathani nkololo wa Akibori ne bamwe ku Egipiti,

²³bakanotola Uriya ku Egipiti bakan'zhisa kuna Mambo Jehoyakimu, iye kambulaya ne thumo kalashila itumbu tjitje ku makomba e bathu koga.

²⁴Koga Ahikamu nkololo wa Shafani kama na Jeremiya, ndizo kasilongwe mu maboko e bathu kuti abulawe.