Read Kalanga Jeremiya 27 Bible Online

Jeremiya 27 - Kalanga bible

Jeremiya 27

¹Mu kutangisa kwe kubusa kwa Zedekiya nkololo wa Josiya mambo we Juda, dama ileli likazha kuna Jeremiya lidwa kuna Yahwe liti,

²Yahwe bakati kundili, “Zwithamile misungo ne majokwi ngono uatilike mu ntshibha uwo.

³Utumile dama kuna mambo we Edomu ne kuna mambo we Moabu ne kuna mambo we Baamoni ne kuna mambo we Tire ne kuna mambo we Sidoni nge batumwa bakazha ku Jerusalema kuna Zedekiya mambo we Juda.

⁴Ngono ubalaile kuna botetshi babo uti, ‘Yahwe Masimbawose Ndzimu we Iziraela bakati: Idwani botetshi benyu muti:

⁵“Ndimi nge simba langu gulu nenge luboko gwangu kwakatambunuka ndakathama shango ne bathu bayo ne phuka dzimu ili, ndoipa mmwe ne mmwe wandinoshaka.

⁶Ngwenu ndalonga shango idzedzi dzose mu luboko gwe nlanda wangu Nebukadineza mambo we Bhabhiloni, naikobo ndampa ne phuka dze shango kuti dzin'shingile.

⁷Zwitjaba zose zowon'shingila kose ne bakololo babe ne bana be bakololo babe kuswikila tjibaka tje shango iye na itjobo tjaswika, ipapo zwitjaba zwinjinji nabo mambo bakulu banowon'thama nlanda wabo.

⁸“ ‘ “Koga ha itjaba kene mbuso ungasishingile Nebukadineza mambo we Bhabhiloni kene kuli kulonga ntshibha wawo mu jokwi la mambo we Bhabhiloni, ndowoloba shamu itjaba itjetjo nge thumo nenge bhamba nenge bugwele, kojalo Yahwe, kuswikila ndatjikolomola tjose nge luboko gugwe.

⁹Ndizo musiteedze balebesambeli benyu ne bakandili benyu ne bawoloti benyu ne hwosana dzenyu ne mashabi enyu banomudwa beti, Musishingile mambo we Bhabhiloni.

¹⁰Ngoti manyepkhwa itjetjo tjabanolebela mbeli kumuli, kunoyita kuti bamuyise kulekule ne shango yenyu kuti bamutate ngono mukaloba.

¹¹Koga itjaba tjinowolonga ntshibha watjo mu jokwi la mambo we Bhabhiloni kakale kan'shingila, ndowoletja itjaba itjetjo tjikasala mu shango yatjo kuti tjiilime kakale tjigale muili.” ’ ”

¹²Ndakapa ndayidzo iyeyi zwayo Zedekiya mambo we Juda nditi, “Longani mitshibha yenyu mu jokwe la mambo we Bhabhiloni kakale mu nshigile kose ne bathu babe ngono mutjile.

¹³Ini iwe ne bathu babo mungafa nge thumo nenge bhamba nenge bugwele Yahwe sekwa bakaleba ngekwe itjaba tjisingawoshingila mambo we Bhabhiloni kene?

¹⁴Musiteedze matama e balebesambeli banoti kumuli, ‘Musishingile mambo we Bhabhiloni,’ ngoti manyepkhwa abanomulebeselambeli.

¹⁵Andizobatuma kojalo Yahwe koga banolebesambeli manyepkhwa nge zina langu, kunoyita kuti ndibatatile kutjena ngono bakaloba, iwe ne balebesambeli banomulebeselambeli.”

¹⁶Ipapo ndakalebeleka ne bapirisiti ne bathu bose nditi, “Yahwe bakati: Musitongoteedza matama e balebesambeli banomulebeselambeli beti, ‘Bonani, zwija zwe Ng'umba ya Yahwe zwabe pejo ne bgwiliziwa kudwa mu Bhabhiloni,’ ngoti manyepkhwa abanolebesambeli ku muli.

¹⁷Musibateedze, shingilani mambo we Bhabhiloni ndizo mutjile. Ini nzi nkulu iwoyu ungabe dongo kene?

¹⁸Ha bali balebesambeli, ha kuna dama la Yahwe mu bali ngabakumbile muna Yahwe Masimbawose kuti zwitjaba zwakasala mu Ng'umba ya Yahwe ne mu ng'umba ya mambo we Juda ne mu Jerusalema zwisiyende ku Bhabhiloni.

¹⁹Ngoti Yahwe Masimbawose bakati ngekwe phanda ne gungwa ne zwigadziko zwe makumbgwana ne zwija zose zwakasala mu nzi iwoyu nkulu,

²⁰zwakabe zwisatogwa ndi Nebukadineza mambo we Bhabhiloni paakatapa Jekoniya nkololo wa Jehoyakimu mambo we Juda ne makulukota e Juda ne Jerusalema kudwa mu Jerusalema ebayisa ku Bhabhiloni,

²¹ee Yahwe Masimbawose Ndzimu we Iziraela bakati ngekwe zwija zwakasala mu Ng'umba ya Yahwe ne mu ng'umba ye mambo we Juda ne mu Jerusalema:

²²Zowotolegwa ku Bhabhiloni ngono zowogalako kudzina zhuba landinowobe ne hanya nge kwazo, kojalo Yahwe. Ipapo ndowozwibgwiliza azwibiga mu tjimo mu bugalo igogu.”