Read Kalanga Jeremiya 3 Bible Online

Jeremiya 3 - Kalanga bible

Jeremiya 3

¹“Ha nlume elamba nkadzi uwe, nkadzi ebe etogwa ne mmwe nlume, ebe nkadzi we nlume upoga, apa nlume unga tjabgwilila kunli kakale wali? Apa ikoku akungatemapadze shango kwakapindilila? Makafukula ne zwamba zwinjinji apa mungatjabgwilila kundili kene? Kojalo Yahwe

²Milidzilani mesho enyu kwakatuthumala kusina tjimwe mubone! Ndingayi kwamusakawalilanila ko kene? Hwunde ne dzizila makagala makalindila zwamba se N'arabu ali mu tjilambanyika. Makatemapadza shango nge bufukula gwenyu kwakayipa.

³Ndizo wali vula yadzibiwa vula ye nsewulo aizobuya, ne kwakajalo tjiso tjitjo tjoboneka bufukula, unolamba kubhakhwa nge shoni.

⁴Apa auzondidana ngwenu uti, ‘Tate bangu, nzwalani wangu kudwa mu butjetjana gwangu,

⁵apa banowondigwadzila moyo nge kusingapele kene, apa banowobe ne shungu kunoti ku bupelo kene?’ Bona, waleba uijalo ngono wakathama zose zwakabipa sekwa wakatubula.”

⁶Kwakati mu misi ya Mambo Josiya Yahwe bakati, “Apa wakabona tjaakathama kene, iwouje usingagalikemoyo, iye Iziraela kene? Kuti wakatatha matuthu mamwe ne mamwe kayenda tjini kusi kwe nti mmwe ne mmwe ntala ethama bufukula kene?

⁷Ndakakumbula nditi, ‘Shule kwe athama zose izwezwi unowoshandukila kundili,’ koga aazoshanduka ngono ne hama iye isina malebeswa Juda wakakubona ikoku.

⁸Wakabona kuti mu bupongwe gose gwa iwouje usingagalikemoyo iye Iziraela, ndakantatila ku tjena nge nkwalo we kunlamba koga hama iye isina malebeswa Juda, aazotja, ndizo na iyobo ikathama bufukula.

⁹Ngoti bufukula gwakabe gusi tjimwe muili, yakatemapadza shango, ithama bupongwe ne mabgwe ne miti.

¹⁰Koga ngekwa ikoku hama iye isina malebeswa Juda aizoshandukila kundili nge moyo wayo wose yakazwithama yashanduka, kojalo Yahwe.”

¹¹Ipapo Yahwe bakati kundili, “Iziraela usingagalikemoyo wakazwilakidza akalulwama muna Juda usina malebeswa.

¹²Yenda, kalebe matama iyawa ku bunandzwa uti, “‘Shandukani kaa, Iziraela isingagalikemoyo, kojalo Yahwe. Anditowomulinga nge kugwadzamoyo, ngoti ndina ngoni, anditowogwadzilamoyo tjatjose, kojalo Yahwe.

¹³Koga amutjilani nlandu wenyu, kuti makapandukila Yahwe Ndzimu wenyu, mukazwipa midzimu ipoga kusi kwe nti mmwe ne mmwe ntala mukasibhulutane hwi langu, kojalo Yahwe.

¹⁴Shandukani kaa imwi bana basingagalikemoyo, kojalo Yahwe, ngoti ndi tetshi wenyu. Ndowomutola, nn'gompela kudwa mu nzi nkulu ne babili kudwa mu nsha, ngono ndowomuzhisa ku Ziyoni.

¹⁵“‘Ipapo ndowomupa balisi kuyenda nge moyo wangu, banowomufudza nge luzibo ne hwisiso.

¹⁶Mu mazhuba iyawo mowoti matjiwanda kakale mapaphidzika mu shango, kojalo Yahwe, abatjowobe batjati, “Bhokisi le Tjidumano tja Yahwe.” Akutowozha mu njalakang'wa dzabo kene kuli kukumbugwa kene kushubiwa, kene kuthamiwa kakale.

¹⁷Mu tjibaka itjetjo Jerusalema inowodang'wa tjiala tje bushe tja Yahwe, zwitjaba zose zowokubunganila kuili, mbeli kwa Yahwe mu Jerusalema ngono abatjowotobela nge bukomba mimoyo yabo yakabipa.

¹⁸Mu mazhuba iyawo ng'umba ya Juda inowobhatana nge ng'umba ya Iziraela ngono bose banowozha kudwa ku shango ye bunandzwa beyenda ku shango yandakapa botate benyu ili thaka.

¹⁹“‘Ndakakumbula kuti ndowomubhata se bakololo bangu tjini ndikamupa shango yakanaka, thaka mbuya mu zwitjaba zose, akumbula nditi pamwe swiyo mowondidana Tate, mukasiletje kunditobela.

²⁰Nge malebeswa, koga se nkadzi usingagalikemoyo esiya nlume uwe ndiko sekwa musakagalikamoyo kundili imwi Baiziraela, kojalo Yahwe.’ ”

²¹Hwi lohwika pezhugwi kwe matuthu, kulila ne kumbila kwe bathu be Iziraela, ngoti bakapambuka mu zila yabo, bakakangang'wa Yahwe Ndzimu wabo.

²²“Shandukani kaa, imwi bathu basingagalikemoyo, ndowopodza kusagalikamoyo kwenyu.” “Bonani, tozha ku muli ngoti ndimwi Yahwe Ndzimu wedu.

²³Nge malebeswa zhoba yeku matuthu manyepkhwa koga, butjebeli guku matombo. Nge malebeswa Yahwe Ndzimu wedu ba jidzo le Iziraela.

²⁴“Koga kudwa mu butjetjana gwedu midzimu inobhatisa shoni yakaja mitjelo ye masimba a botate bedu, mbudzi ne pkhwizi dzabo ne ng'ombe dzabo ne bakololo ne bakololokadzi babo.

²⁵Ngati lingeni pasi tibhakhwe nge shoni, kulengudzika kwedu ngakutifukidze, ngoti takatjinyila Yahwe Ndzimu wedu, iswi na botate bedu kudwa tjose mu butjetjana gwedu kuswika zhuba la nasi, atizobhulutana hwi la Yahwe Ndzimu wedu.”