Read Kalanga Jeremiya 31 Bible Online

Jeremiya 31 - Kalanga bible

Jeremiya 31

¹“Mu tjibaka itjetjo,” koleba Yahwe, “ndowobe ndili Ndzimu we misha yose ye Iziraela ngono banowobe bathu bangu.”

²Yahwe bakati, “Bathu bakatjila mu thumo, bawana mahwilo ngoni mu tjilambanyika, ndowozha kupa Iziraela kunyaluluka.”

³Yahwe bakazha kundili mu tjibaka tjapinda beti, “Ndakakuda nge ludo gusingapele, ndakadwilila kukulakidza kugalamoyo kwangu mukuli.

⁴Ndowokubaka kakale, ngono unowobakika, iwe mwanadi Iziraela! Unowozwinakisa kakale nge zwilidzo zwe dzithamborini, unowobhuda ukazana nzano wekushatha.

⁵Unowolima minda dze mizhambi, pezhugwi kwe matombo e Samariya, balimi banowolima, banowoshathila mitjelo yabo.

⁶Ngoti kowobe ne zhuba linoti balindi bakamimila, mu matombo e Ifureimi bakati, ‘Izhani, ngatitathileni ku Ziyoni, kuna Yahwe Ndzimu wedu.’ ”

⁷Ngoti Yahwe banolebeleka bakati, “Mbilani Jakubo nge shatho, shathani ngekwa she we zwitjaba. Gudzo lenyu ngalihwike muti, ‘imwi Yahwe, matjidza bathu benyu, ilo limbelimbe le Iziraela.’

⁸Bonani, ndowobabgwiliza kudwa mu shango ye bunandzwa, abakubunganya kudwa ku phelelo dze shango, pakati kwabo mapofu ne banoshudza, ne bakadzi bakazwisenga ne bakadzi bamu zwibhayo, bose koga mbunga nkulu, banowobgwilila ipapa.

⁹Banowozha nge tjililo, banowozha nge mitembezelo andibabgwiliza. Ndowobatungamilila ku wobana dze vula, mu zila yakatambunuka yabasingake bakakuthiwa, ngoti ndimi tate kuna Iziraela, Ifureimi i mbano yangu.

¹⁰“Ihwani dama la Yahwe imwi zwitjaba, mukulebe ku misupho ye gungwa kulekule, muti, ‘Iye wakapaladza Iziraela unowoikubunganya, unowoitjengeta se nlisi elisa mbudzi ne pkhwizi dzidze.’

¹¹Ngoti Yahwe badzutunula Jakubo, bakansunungula mu luboko gwe wakasima kunpinda.

¹²Banowozha bepululudza ku Dombo le Ziyoni, banowoshathila makombolelo a Yahwe, beshathila mathunde ne nkumbi we zhambi ne mafuta, ne mbudzana ne pkhwizana ne ng'ombe, matjilo abo anowonga nnda unodilidzigwa, abatjowobe mu buyendasi kakale.

¹³Ipapo baanadi banowoshatha bakazana, ne bazhuzha ne bawola banowoshatha. Ndowoshandula tjililo tjabo tjikabe lushatho, ndowobanyaladza ndikabapa kushatha mu bumo gwe buyendasi,

¹⁴Ndowonyalulusa mimoyo ye bapirisiti nge mafuta, bathu bangu banowogutshiwa nge makombolelo angu,” kojalo Yahwe.

¹⁵Yahwe bakati, “Hwi lohwika ku Rama, tjililo ne kuhwazogwadza kukulu. Rahele unolilila bana babe, unolamba kunyaladziwa ngekwe bana babe, ngoti batjisipo.”

¹⁶Yahwe bakati, “Dziba hwi lekulila kuko, ne mishodzi ye mesho awo, ngoti nshingo unowolipiwa, kojalo Yahwe. Banowobuya kudwa mu shango ye tjita.

¹⁷Kuna kugalabgwe mu bumangwana gugo, kojalo Yahwe. Bana babo banowobgwilila ku shango yabo.

¹⁸Nge malebeswa ndakahwa Ifureimi elila eti, ‘Makanditjemela se mbotana isakakatha, ndakatjemegwa. Mundibgwilize mu tjimo ndowobgwilila, ngoti ndimwi Yahwe Ndzimu wangu.

¹⁹Ndakati ndabhuda mu zila, ashanduka, ndakati ndisino kuhwisisa, abhakhwa nge shoni, alonga nsholo, ngoti ndakasengana ne kulengudzika kwe butjetjana gwangu.’

²⁰Apa Ifureimi nkololo wangu unodika kene? Apa mwana wangu wandinoshathila kene? Nenguba ndigala ndileba nge kubhayana naye, ndowonkumbula ne kwakajalo zwako. Ndizo mazwiwo angu anodziyidzika nge kukwe, nge malebeswa ndowon'hwila zogwadza,” kojalo Yahwe.

²¹“Uzwibigile matjwawo e zila, biga zwinolakidza kwaunoyenda. Yela njele zila hwulu, zila yaunotobela. Shanduka iwe mwanadi Iziraela, bgwilila ku mizana iyo.

²²Unowodzungaila kwe tjibaka tjingapani, iwe nkololokadzi usingagalikebgwe? Ngoti Yahwe babumba tjithu tjitshwa mu shango, nkadzi unotjengeta nlume.”

²³Yahwe Masimbawose, Ndzimu we Iziraela bakati, “Ndowoti ndibashandusa kudwa mu kutapiwa, banowoshingisa matama iyawa mu shango ye Juda ne mu mizana yayo beti, “ ‘Yahwe ngabakukombolele, iwe n'gali we ndulamo, iwe dombo lakayengemala!’

²⁴“Ngono Juda ne mizi mikulu yose inowobakidzana ne balimi na ibabo banodzungaila ne mbudzi ne pkhwizi dzabo.

²⁵Ngoti ndowonyalulusa bakanyala mikumbulo ne bakatemeka mafupa.”

²⁶Ipapo amuka mu hwope alingalinga, hwope dzangu dzakabe dzindizipila.

²⁷“Bonani, misi yaswika,” koleba Yahwe, “yandinowolima ng'umba ye Iziraela ne ng'umba ye Juda nge mbewu ye bathu neye ng'ombe.

²⁸Koga sekwa ndakabe ndakalonga meya mu nyama ndibadzikunula ne kubapkhwanya ne kubatshindunula ne kubakolomola ndi bahwisa zogwadza ndowolonga meya mu nyama ndibabaka kakale ndibadzwala kojalo Yahwe.

²⁹Mu mazhuba iyawo abatjofa bati, “ ‘Botate bakaja zhambi dzinoshababa, ndizo meno e bana abe ne gwadzila,’

³⁰“Koga mmwe ne mmwe unowofila tjibi tjitje, nthu mmwe ne mmwe unoja zhambi dzinoshababa, meno awe anowobe ne gwadzila.

³¹ “Bonani, misi yaswika,” koleba Yahwe, “yandinowoti athama tjidumano tjitshwa ne ng'umba ye Iziraela neye Juda,

³²tjisingafanane ne tjidumano tjandakathama na bobatategulu babo pandakabadusa nge luboko ndibadusa mu shango ye Egipiti, tjidumano tjangu tjabakatjuluka nenguba ndakabe ndili nlume wabo, kojalo Yahwe.

³³Koga itjetji tjowobe tjidumano tjandinowothama ne ng'umba ye Iziraela mu misi iyeyo, kojalo Yahwe, ndowolonga nlayo wangu mubali, ndowoukwala mu mimoyo yabo ngono ndowobe Ndzimu wabo ibo banowobe bathu bangu.

³⁴Akutjina nthu ungadiya mbakidzani naye kene nthu kadiya hama iye eti, ‘Ziba Yahwe!’ Ngoti banowobe bendiziba kudwa muna ntukununu kunoti nkulu tjose,” kojalo Yahwe, “ngoti ndowobazwiibhatigwa matjinyo abo kakale anditjowokumbula tjibi tjabo kakale.”

³⁵Yahwe bakati, ibo banothama zhuba kuti livoneke masikati, ibo banolaula mwedzi ne nyenyedzi, kuti dzipenye busiku, ibo banodzonga gungwa, kuti ndizo mapundu alo amilike, Yahwe Masimbawose ndilo zina labo.

³⁶“Ha ndaulo idzedzi ndingabhuda mbeli kwangu,” koleba Yahwe, “zwizekugwana zwa Iziraela zowomisa kobe itjaba mbeli kwangu.”

³⁷Yahwe bakati, “Ha zhuzhugwi kungalizanyiwa, ne thiwa dze shango dzingatendebudziwa, ndowofupatila zwizekugwana zose zwa Iziraela ngekwe tjabakathama,” koleba Yahwe.

³⁸“Bonani, misi yaswika,” kojalo Yahwe, “yakunowoti nzi nkulu iwoyu ukamusigwa Yahwe kudwa pa thungamakole ye Hananeli kunoti ku ndzibo we Nkoba.

³⁹Nsungo unotambunudza unowoyendila kule wakatambunuka kunoti ku Dombo le Garebu udwapo utendebukila ku Goya.

⁴⁰Nkuku wose we zwitumbu ne milota ne minda kunoti ku nkuku we Kidironi kuyendila ku ndzibo we Nkoba we Mbizi ku bhezhuba kowobe kwakayengemala kwa Yahwe. Akutjowofa kwadzikunugwa kene kupkhwanyiwa nge kusingapele.”