Read Kalanga Jeremiya 32 Bible Online

Jeremiya 32 - Kalanga bible

Jeremiya 32

¹Dama lakazha kuna Jeremiya lidwa kuna Yahwe mu gole le bugumi la Zedekiya mambo we Juda lili gole le bugumi lina zhanakadzi la Nebukadineza.

²Mu tjibaka itjetjo babhayani be mambo we Bhabhiloni bakabe bakakomba Jerusalema, ngono Nlebesambeli Jeremiya wakabe akazhaliligwa mu nsha we nlindi wakabe uli mu ng'umba ye bumambo ye mambo we Juda.

³Ipapo Zedekiya mambo we Juda wakabe akanzhalilila ikoko eti, “Ini ulebesambeli uti, ‘Yahwe bakati, “Bonani ndolonga nzi nkulu iwoyu mu luboko gwe mambo we Bhabhiloni ngono unowoutola.

⁴Zedekiya mambo we Juda aangapudzumuke mu luboko gwe Babhabhiloni ngono unowolongwa mu maboko a mambo we Bhabhiloni, unowolebeleka naye bakalingisana nge mesho awe.

⁵Unowotolela Zedekiya ku Bhabhiloni ngono unowogala ikoko kuswikila ndizwilingisanya naye, koleba Yahwe. Nenguba mungagwa ne Bakhaladiya amungakunde.” ’ ”

⁶Ngono Jeremiya kabe eti, “Dama la Yahwe lakazha kundili liti,

⁷‘Bona Hanameli nkololo wa Shalumu batatenini babo banowozha kukuli beti, “Tenga nnda wangu uku Anatoti ngoti se uli gamu lipejo una fanilo ne ndingisanyo kuwotenga.”

⁸Ipapo Hanameli nkololo wa batatenini kazha kundili ku nsha we nlindi kuyendidzana ne dama la Yahwe ngono kandidwa kati, “Tenga nnda wangu uku Anatoti mu shango ye Bhenjamini ngoti fanilo ne ndingisanyo dzekuti uwotenge nde dzidzo, zwitengele iwo.” Ipapo ndakaziba kuti ikoku kwakabe kuli dama la Yahwe.

⁹Ndizo ndakatenga nnda ku Anatoti mu mwana wa batatenini Hanameli ngono an'lizanyidza shekele dze siliva dzili gumi lina dzili tendeka (17).

¹⁰Ndakakwala lukwalo, atuna adana ne batendeki alizanyila siliva mu zwiyelo.

¹¹Ndakatola lukwalo gwe thengo gwandakatuna kuyendidzana nge nlayo ne zwinoshakika kose ne gwandisakatuna guli ntutshi,

¹²ndakagupa Bharuku nkololo wa Neriya, Neriya ali nkololo wa Maheseya mbeli kwa Hanameli mwana wa batatenini na mbeli kwe batendeki bakabiga tjinyala mu lukwalo gwe thengo kakale na mbeli kwe Bajuta bose bakabe baligele mu nsha we nlindi.

¹³“ ‘Ndakadwa Bharuku mbeli kwabo nditi,

¹⁴“Yahwe Masimbawose, Ndzimu we Iziraela bakati, tola mikwalo iyeyi ye thengo lukwalo gwandakatuna ne ntutshi we gwandisakatuna udzibige mu jegwa le ntapkhwi kuti ndizo dzibe ne butjilo gulefu.

¹⁵Ngoti Yahwe Masimbawose, Ndzimu we Iziraela bakati, ng'umba ne minda ne minda ye mizhambi inowotengwa kakale mu shango iyeyi.” ’

¹⁶“Ndakati ndisinopa Bharuku nkololo wa Neriya lukwalo gwe thengo ndakatembezela kuna Yahwe nditi,

¹⁷‘Awo She Yahwe, ndimwi makathama zhuzhugwi ne shango nge simba lenyu gulu nenge luboko gwenyu kwakatambunuka! Akuna tjakamusimila,

¹⁸makalakidza ludo gusingazunguzike kuna bali tjiwulu koga mozhisa shamu ngekwe milandu ya botate ku bana babo banobatobela, imwi bankulu kakale Ndzimu wakasima imwi zina lenyu ndi Yahwe Masimbawose,

¹⁹mu nkulu mukukumbuludza, makasima mu nshingo. Mesho enyu akazhukila zila dzose dze bathu, molipa mmwe ne mmwe kuyendidzana ne mazwibhato awe nenge mishingo iye yakanfanila.

²⁰Makashinga zwilakidzo zwinotjenamisa ne makaabadzo ku Egipiti kakale makaadwililisa kuswikila zhuba la nasi, mu Iziraela ne mu bathu bose, makazwithamila zina na nasi kose.

²¹Makadusa bathu benyu Baiziraela mu shango ye Egipiti nge zwilakidzo ne matjenamiso, nge luboko gwenyu gwakasima nenge luboko gwenyu gwakatambunuka nenge kupalusa moyo kukulu kwazo,

²²makabapa shango iyeyi, iyo yamakatuna kuna bobatategulu babo kuti mowobapa iyo, shango inowunga nkaka ne butji gwe nyutji,

²³ngono bakangina muili bakaitola. Koga abazobhulutana hwi lenyu kene bakayenda kuyendidzana nge nlayo wenyu, akuna tjabakathama tja zose zwamakati bathame. Ndizo makazhisa mbatsha idzedzi mubali.

²⁴“ ‘Bona dziduduma dze mavu dzakabakwa kupoteleka nzi nkulu kuti utogwe, ngekwe thumo ne bhamba ne bugwele nzi nkulu walongwa mu maboko e Bakhaladiya banobhayana nawo. Tjawakaleba tjakashingikala sekwa unobona.

²⁵Koga She Yahwe bakandidwa bakati, “Tenga nnda nge siliva, dana batendeki nenguba nzi nkulu ulongwa mu maboko e Bakhaladiya.” ’ ”

²⁶Dama la Yahwe lakazha kuna Jeremiya liti,

²⁷“Bona, ndimi Yahwe Ndzimu we bathu bose, apa kuna tjakandisimila kene?

²⁸Ndizo Yahwe banolebeleka bakati, ‘Bona, ndolonga nzi nkulu iwoyu mu maboko e Bakhaladiya ne mu luboko gwa Nebukadineza mambo we Bhabhiloni, ngono unoitola.

²⁹Bakhaladiya banobhayana ne nzi iwoyu nkulu banowozha bakabhatidza nzi iwoyu bakaupisa nge moto, nenge ng'umba dzakati matenga adzo kapisigwa motsha upisigwa Bhaale ne zwipo zwe zwing'o zwakapiwa midzimu ipoga kuthama kuti ndigwadzemoyo.

³⁰Ngoti bakololo be Iziraela ne bakololo be Juda akuna tjabakathama kuzhe kwe mbipo mbeli kwangu kudwa tjose mu butjetjana gwabo, bakololo be Iziraela akuna tjabakathama kuzhe kwe kuthama kuti ndigwadzisiwe moyo nge mishingo ye maboko abo, koleba Yahwe.

³¹Nzi nkulu iwoyo wakasendedzela kugwadzamoyo kwangu ne bushongola gwangu, kudwa tjose zhuba lawakasikiwa kudzina kunoti nasi kuti ndizo ndiuduse mu mesho angu,

³²ngekwe bubi gose gwe bakololo be Iziraela ne bakololo be Juda gwabakathama kundigwadzisa moyo kuti ndibe ne bushongola ibo na bomambo babo ne makulukota abo ne bapirisiti babo ne balebesambeli babo ne bathu be Juda ne bagali be Jerusalema.

³³Bakandifupatila bakasindilinge, nenguba ndakabadiya ndipaphulula ngono bakasiteedze kene kuli kusala shule ndayo.

³⁴Bakabiga zwithu zwabo zwinoshimisa mu ng'umba inodang'wa nge zina langu kuitemapadza.

³⁵Bakabakila Bhaale magalo a pezhugwi mu nkuku we Hinomu kupisila Moleki bakololo babo ne bakololokadzi babo nenguba ndisakabadwa kuti bathame saikoko, kakale akuzotongozha mu nkumbulo wangu kuti bangathama tjithu itjetji tjinoshimisa kukwebela Juda mu tjibi.’

³⁶“Ndizo ngwenu Yahwe Ndzimu we Iziraela bakati ngekwe nzi iwoyu nkulu iwo wamunoti, ‘Wakalongwa mu luboko gwa mambo we Bhabhiloni nge thumo nenge bhamba ne bugwele, Yahwe bakati,

³⁷Bonani ndowobakubunganya kudwa mu shango dzose dzandakabatatila kudzili kuti bashandukile ku bugalo igogu ngono ndowobathama kuti bagale nge mbakililo.

³⁸Banowobe bathu bangu, imi ndowobe Ndzimu wabo.

³⁹Ndowobapa moyo nng'ompela nenge zila ili nng'ompela kuti ndizo banditjile tjatjose, kuti ndizo batjile zwibuyanana ne bana babo bo banozha shule kwabo batjile zwibuyanana.

⁴⁰Ndowothama nabo tjidumano tjisinga pele tjekuti anditowofa ndaletja kubathamila bubuya ngono ndowolonga kunditja mu mimoyo yabo kuti ndizo basindifupatile.

⁴¹Ndowoshathila kubathamila bubuya ngono ndowobalima mu shango iyeyi nge kugalikabgwe nge moyo wangu wose nenge nkumbulo wangu wose.

⁴²“Ngoti Yahwe bakati, ‘Koga sekwa ndakazhisa mbatsha idzedzi dzingapa mu bathu ibabo ndowobazhisila kose kubuya kwandakaba gadzabgwe.

⁴³Minda inowotengwa mu shango yamunoti tjilambanyika koga tjisina nthu kene ng'ombe, yalongwa mu maboko e Bakhaladiya.

⁴⁴Minda inowotengwa nge mari, hwalo dze thengo dzowobigwa tjinyala dzikazhaligwa dzikabe ne batendeki mu shango ye Bhenjamini ne mizana yakapoteleka Jerusalema ne mizi ye Juda mu mizi ye shango ye matuthu neye yakakungulukila ne mu mizi mikulu ye Negebu ngoti ndowobgwiliza fumwa yabo,’ koleba Yahwe.”