Read Kalanga Jeremiya 33 Bible Online

Jeremiya 33 - Kalanga bible

Jeremiya 33

¹Dama la Yahwe lakazha kuna Jeremiya gwe bubili tjibaka tjaakabe akazhaliligwa mu nsha we balindi liti,

²“Yahwe bakathama shango, Yahwe bakasika shango bakaidzikamisa, Yahwe ndilo zina labo ngono bakati,

³‘Undidane ngono ndowokudabila, ndowokubudza zwithu zwikulu zwakasumbikala zwa usingazibe.

⁴Ngoti Yahwe Ndzimu we Iziraela bakati ngekwe ng'umba dze nzi nkulu iwoyu ne ng'umba dza bomambo we Juda dzakaligwa kuti ndizo dzibe mavikilo mu dziduduma dze mavu ne thumo,

⁵Bakhaladiya baswika kuwogwa ne kudzizhadza ne zwitumbu zwe bathu ibo bandinowobe ndabulaya mu kugwadzamoyo kwangu ne mu bushongola gwangu, ngoti ndakasumbikila nzi nkulu iwoyu tjiso tjangu ngekwe bubi gwabo.

⁶Bonani, ndowouzhisila mamuko ne bhodzo, ndowobapodza abazumbunulila bunji gwe kubhudilila ne mbakililiko.

⁷Ndobgwiliza mu tjimo fumwa ye Juda ne fumwa ye Iziraela ngono ndowodzimusa dzikanga sekwa dzakabe dzili iko kutanga.

⁸Ndowobatjenapadza mu tjibi tjabo tjose tjabakandithamila, ngono ndowozwiibhatigwa tjibi tjabo ne bupanduki gwabo kundili.

⁹Nzi nkulu iwoyu unowondizhisila ntutshi ne kushatha ne gudzo ne kutetiwa mbeli kwe zwitjaba zose mu shango zwinohwa zwithu zwibuya zwandino ithamila ngono banowotja bakatetema ngekwe zwithu zose zwibuya ne kubhudilila kwandinoupa.’

¹⁰“Yahwe bakati, ‘Mu bugalo igogu gwamunoti, tjilambanyika koga tjakathukudzika tjisina nthu kene phuka.’ Mu mizi mikulu ye Juda ne mu dzizila dze Jerusalema dzowofulukwa dzisala dzisina nthu kene bagali kene phuka kowohwika kakale

¹¹misindo ye kushatha ne mpululu, mahwi e nlongo ne nloboli ne mahwi a ibabo banozhisa zwipo zwe mboko ku Ng'umba ya Yahwe beti, “ ‘Tendani Yahwe Masimbawose ngoti Yahwe bakalulwama, ngoti ludo gwabo gusingazunguzike gugele tjatjose!’

¹²“Yahwe Masimbawose bakati, ‘Mu pathu ipapa pakathukudzika kusina nthu kene phuka mu muzi yose yawo kowobe ne bagali be balisi kakale kubuthisa mbudzi ne pkhwizi dzabo.

¹³Mu mizi ye matombo, mu mizi yakakungulukila ne mu mizi ye Negebu, mu shango ya Bhenjamini ne mu mizi yakapoteleka Jerusalema ne mizi ye Juda mbudzi ne pkhwizi dzowopinda kakale hwonde ne unodzibala. Kojalo Yahwe.

¹⁴“ ‘Bonani mazhuba aswika,’ ” koleba Yahwe, “ ‘andinowoshingikadza kugadzabgwe kwandagadzabgwe ng'umba ye Iziraela ne ng'umba ye Juda.

¹⁵Mu mazhuba iyawo ne mu tjibaka itjetjo ndowothama kuti Lutabi gwakalulwama guthinilile Dafite, ngono unowothama tjakatambunuka nenge ndulamo mu shango.

¹⁶Mu mazhuba iyawo Juda unowotjidziwa ne Jerusalema inowogala yakabakililika. Ngono zina ileli ndilo lainowodang'wa ndilo kuyi, “Yahwe ndibo ndulamo yedu.” ’ ”

¹⁷Ngoti Yahwe banolebeleka bakati, “Dafite aangafe asheta nthu unogala mu tjigalo tjitje tje bumambo mu ng'umba ye Iziraela,

¹⁸kene nanga bapirisiti be Balevi abangashete nthu unowoma mbeli kwangu kudusa zwipo zwinopisiwa ne kupisa zwipo zwe mathunde ne kugala bedusa zwibhayilo.”

¹⁹Dama la Yahwe lakazha kuna Jeremiya liti,

²⁰“Yahwe banolebeleka bakati, ‘Amunga tjuluka tjidumano tjangu tjandakathama ne zhuba nenge tjidumano tjangu tjandakathama ne busiku kuti ndizo masikati ne busiku zwisingobepo mu zwibaka zwazo,

²¹ipapo tjidumano tjangu na Dafite nlanda wangu ne tjidumano tjangu ne Balevi be bapirisiti banoshinga bali mbeli kwangu tjingatjulukwabo ngono Dafite aatowobe ne nkololo ungabusa ali mu tjigalo tjitje.

²²Ndowothama zwizekugwana zwa Dafite nlanda wangu ne Balevi banoshinga mbeli kwangu kuti babe banji se nyenyedzi dze zhuzhugwi ne nsetje we gungwa usina tjilizanyo.’ ”

²³Dama la Yahwe lakazha kuna Jeremiya liti,

²⁴“Apa auna njele kuti bathu ibaba bakati, ‘Yahwe bafupatila misha mibili yabakabe bashalula kene?’ Ndizo banolingila pasi bathu bangu abatjabatola se itjaba.

²⁵Yahwe banolebeleka bakati, ‘Ndakathama tjidumano tjangu ne busiku ne masikati ndakabiga milayo ye kudzimu ne shango,

²⁶ipapo ndowofupatila zwizekugwana zwa Jakubo na Dafite nlanda wangu ngono anditowoshalula mmwe we zwizekugwana zwizwe kubusa zwizekugwana zwa Abhurahama na Isaki na Jakubo. Ngoti ndowobgwiliza fumwa yabo ndikabe ne ngoni mu bali.’ ”