Read Kalanga Jeremiya 35 Bible Online

Jeremiya 35 - Kalanga bible

Jeremiya 35

¹Dama lakazha kuna Jeremiya lidwa kuna Yahwe mu misi ya Jehoyakimu nkololo wa Josiya mambo we Juda liti,

²“Yenda ku nsha we Bareka ngono uswike ulebeleke nabo ngono ubazhise ku ng'umba ya Yahwe, ku mmwe we mimwe misha uswike ubapa nkumbi we zhambi kuti bang'we.”

³Ndizo ndakatola Jaazaniya nkololo wa Jeremiya, nkololo wa Habaziniya ne hama dzidze ne bakololo babe bose ne nsha wose we Bareka.

⁴Ndakabazhisa ku ng'umba ya Yahwe ku nsha we bakololo ba Hanani nkololo wa Igidaliya nlume we Ndzimu. Nsha wakabe uli pejo ne ng'umba ye makulukota yakabe ili pezhugwi kwe ya Maaseya nkololo wa Shalumu ntjengeti we nkoba.

⁵Ipapo abiga mapepe alizhele nkumbi we zhambi ne kopi mbeli kwe balume be nsha we Barekabi abadwa ndikati, “Ing'wani nkumbi we zhambi.”

⁶Koga bakashandula beti, “Atitong'wa nkumbi we zhambi ngoti batategulu bedu Jonadabu nkololo bakati laya beti, ‘Musitongofa mang'wa nkumbi we zhambi imwi ne bakololo benyu.

⁷Kakale musitongobaka ng'umba kene kuli kudzwala mbewu kene kulima mizhambi, musitongothuwa tjimwe tje zwithu izwezwi koga makafanila gala mu mishasha. Ndizo mowotjila lubaka gulefu mu shango yamuli bataya muili.’

⁸Takateedza hwi la Jonadabi nkololo wa Rekabi tate bedu mu tjimwe ne tjimwe tjabakatidwa, kuti tising'we nkumbi we zhambi mu misi yedu, iswi ne bakadzi bedu ne bakololo bedu kene bakololokadzi bedu,

⁹ne kuti tisibake ng'umba kugala mudzili. Atina minda dze mizhambi kene minda kene mbewu,

¹⁰koga togala mu mishasha kakale takateedza tikathama kose kwatakadwiwa ndi Jonadabi tate bedu.

¹¹Koga kwakati Nebukadineza mambo we Bhabhiloni wonginilila shango takati, ‘Buyani, ngatiyendeni ku Jerusalema titja babhayani be Bakhaladiya ne babhayani be Basiriya.’ Ndizo tiligele mu Jerusalema.”

¹²Ipapo dama la Yahwe likazha kuna Jeremiya liti,

¹³“Yahwe Masimbawose, Ndzimu we Iziraela bakati, ‘Yenda unodwa balume be Juda ne bagali be Jerusalema uti, “Apa amutoshaka kutjemegwa ne kuhwa matama angu kene?” Kojalo Yahwe.

¹⁴Nlayo wa Jonadabi nkololo wa Rekabi waakapa bakololo babe kuti basing'we nkumbi we zhambi wakalondolodziwa, na nasi kose abatong'wa, ngoti bakateedza ndaulo ya tate babo. Ndakalebeleka namwi ndisisithila koga amuzonditeedza.

¹⁵Ndakamutumila balanda bose bangu balebesambeli, ndibatumila ndakalonga meya mu nyama nditi, “Mmwe ne mmwe wenyu ngaashandukile zila iye mbimbi ngono alulwamise zwiyito zwizwe, musitobele midzimu ipoga kuishingila, ngono ndizo mowogala mu shango yandakapa bobatategulu benyu.” Koga amuzobhulutana kene kuli kunditeedza.

¹⁶Zwizekugwana zwa Jonadabi nkololo wa Rekabi zwakashingikadza ndaulo ya zwakapiwa ndi bobatategulu bazo, koga bathu ibaba abazonditeedza.’

¹⁷“Ndizoke Yahwe Ndzimu Masimbawose, Ndzimu we Iziraela bakati, ‘Bonani, ndozhisila Juda ne bagali bose be Jerusalema bubi gose gwandakaleba ndigulingisanya nabo, ngoti ndakalebeleka nabo abazoteedza, ndakabadana ngono abazodabila.’ ”

¹⁸Koga ku nsha we Bareka Jeremiya kabe eti, “Yahwe Masimbawose, Ndzimu we Iziraela bakati, ‘Ngoti makalondolodza ndaulo ya Jonadabi tate benyu mukatobela ndayo dzidze dzose mukathama tjimwe ne tjimwe tjaakamudwa,

¹⁹ndizoke Yahwe Masimbawose, Ndzimu we Iziraela bakati, “Jonadabi nkololo wa Rekabi aatowofa ashaya nthu we lutshinga gugwe unowondishingila.” ’ ”