Read Kalanga Jeremiya 36 Bible Online

Jeremiya 36 - Kalanga bible

Jeremiya 36

¹Mu gole le bunna la Jehoyakimu nkololo wa Josiya, mambo we Juda, dama ileli likazha kuna Jeremiya lidwa kuna Yahwe liti,

²“Tola lukwalo ngono ukwale muguli matama andaleba nawe ngekwe Iziraela ne Juda nenge zwitjaba zose, kudwa mu zhuba landakalebeleka nawe, kudwa mu misi ya Josiya kunoti nasi.

³Pamwe swiyo ng'umba iyeyije ye Juda inowohwa bubi gose gwandakazwimisila kubathamila igo, kuti ndizo mmwe ne mmwe ashandukile zila dzidze dzakabipa, ndizo ndibazwiibhatigwe matjinyo abo ne zwibi zwabo.”

⁴Ipapo Jeremiya kadana Bharuku nkololo wa Neriya ngono Bharuku kakwala mu lukwalo kose kwalebgwa ndi Jeremiya ali matama wose a Yahwe abakalebeleka naye.

⁵Jeremiya kadwa Bharuku kati, “Ndakamanikana, anditotubula kuyenda ku ng'umba ya Yahwe,

⁶ndizo wakafanila kuyenda ko mu zhuba le kuzwinyima zojiwa ngono uswike ubale matama a Yahwe kudwa mu lukwalo gwawakwala sekwa ndabe ndikudwa. Wakafanila kuabalila balume bose be Juda badwa ku mizi yabo mikulu.

⁷Pamwe swiyo banowozhisa mitembezelo yabo kuna Yahwe ngono mmwe ne mmwe kashandukila zila dzidze mbimbi, ngoti kugwadzamoyo ne bushongola gwa Yahwe zwabalebela bathu ibabo zwikulu kwazo.”

⁸Bharuku nkololo wa Neriya kathama kose kwaadwiwa ndi Jeremiya nlebesambeli kuti akuthame, kubala matama wose a Yahwe kudwa mu lukwalo eabalila mu ng'umba ya Yahwe.

⁹Mu gole le bushanu la Jehoyakimu nkololo wa Josiya, mambo we Juda, mwedzi we buzhanalume, bathu bose mu Jerusalema ne bathu bose bakabe bedwa ku mizi mikulu ye Juda bakadanigwa kuzwinyima zojiwa mbeli kwa Yahwe.

¹⁰Kudwa pa ng'umbana ya Gemariya nkololo wa Shafani we nkwalili, yakabe ili ku nsha utja pezhugwi ku nkoba we Nkoba Ntshwa we ng'umba ya Yahwe, Bharuku kabala matama a Jeremiya kudwa mu lukwalo.

¹¹Kwakati Mikaya nkololo wa Gemariya, nkololo wa Shafani ehwa matama wose a Yahwe kudwa mu lukwalo,

¹²kadelukila ku ng'umba ya mambo ku ng'umbana ye nkwalili, makulukota wose akabe aligele ipapo ili Elishama nkwalili na Delaya nkololo wa Shemaya na Elinathani nkololo wa Akibori na Gemariya nkololo wa Shafani na Zedekiya nkololo wa Hananiya ne makulukota wose mamwe.

¹³Ngono Mikaya kababudza matama wose aakabe ahwa ha Bharuku eabalila bathu kudwa mu lukwalo.

¹⁴Ipapo makulukota wose katuma Jehudi nkololo wa Nethaniya, nkololo wa Shelamiya, nkololo wa Khushi bakanon'dwa bakati, “Lukwalo gwawabalila bathu gutole nge luboko uzhe nago ngeno!” Bharuku nkololo wa Neriya katola bhuka nge luboko akayenda ku bali.

¹⁵Ngono bakan'dwa bakati, “Gala pasi ugubale.” Ndizo Bharuku kababalila igo.

¹⁶Bakati behwa matama wose bakalingana nge lutjo ngono bakadwa Bharuku bakati, “Takafanila zibisa mambo matama iyawa wose.”

¹⁷Ipapo bakabhuzwa Bharuku bakati, “Tibudze kwakazha tjini kuti ukwale kose ikoku? Apa Jeremiya ndiye wakakudwa?”

¹⁸Bharuku kabadabila kati, “Wakandidwa matama iyawa wose, ha imi ndakabe ndiakwala ne inki mu lukwalo.”

¹⁹Ipapo makulukota bakadwa Bharuku bakati, “Endani munobgwata iwe na Jeremiya, kushete waziba kwamuyoko.”

²⁰Bakabiga lukwalo mu ng'umbana ya Elishama we nkwalili, bakayenda kuna mambo ku nsha ngono bakanobika tjimwe ne tjimwe ku nli.

²¹Ipapo mambo katuma Jehudi kunotola lukwalo, ngono kanogutola ku ng'umbana ya Elishama we nkwalili ngono Jehudi kagubalila mambo ne makulukota wose akabe ali mile kubapa na mambo.

²²Kwakabe kuli mwedzi we buzhanalume, ngono mambo wakabe ali gele mu ng'umbana ye mbaba kuna moto wakabe uthuta mu hali ye moto mbeli kukwe.

²³Kwakabe kuti Jehudi asinobala zebe dzili thatu kene nna, mambo unowobe edzipalula nge mpanga edzilashila mu hali ye moto kudzina lukwalo gose gwatshwa nge moto.

²⁴Mambo ne balanda babe bakati behwa matama iyawa kukashaya wabo walobgwa nge hana, kene kuli kupalula zwiambalo zwabo.

²⁵Nenguba Elinathani na Delaya na Gemariya bakakumbila mambo kuti basipise lukwalo ngono kasibateedze.

²⁶Naikobo mambo kadwa Jerahemeli nkololo wa mambo na Seraya nkololo wa Aziriele na Shelemiya nkololo wa Seraya nkololo wa Aziriele na Shelemiya nkololo wa Abideli kuti basunge Bharuku nkwalili wa Jeremiya nlebesambeli koga Yahwe bakabe babasumbika.

²⁷Shule kwe kuti mambo bapise lukwalo gwakabe guna matama akakwagwa ndi Bharuku eadwiwa ndi Jeremiya, dama la Yahwe liti,

²⁸“Tola lukwalo gumwe ukwale muguli matama wose abe ali mu lukwalo gwe kutanga igo gwapisiwa ndi Jehoyakimu mambo we Juda.

²⁹Kakale udwe Jehoyakimu mambo we Juda uti, Yahwe bakati, ‘Wapisa lukwalo igogu uti, “Ini wakwala mu guli kuti nge lebeswa mambo we Bhabhiloni unowozha kakolomola shango iyeyi kakale kapedzisa bathu ne zwithuwo zose muili?”

³⁰Ndizoke Yahwe bakati ngekwa Jehoyakimu mambo we Juda, “Akutowobe ne mmwe unowogala tjigalo tje bumambo gwa Dafite, nenge kuti itumbu tjitje tjowolashigwa munopisa masikati tjikalashigwa muna makaa busiku.

³¹Ndowon'loba shamu ne bana babe ne balanda babe ndowobalobela matjinyo abo. Ndowodelusila mubali ne mu bagali be Jerusalema ne mu balume be Juda bubi gose gwandakaleba kuti ndowobathamila igo, koga bakasiteedze.” ’ ”

³²Ipapo Jeremiya katola gumwe lukwalo kagupa Bharuku we nkwalili, nkololo wa Neriya, Bharuku kakwala matama wose e lukwalo gwakabe gwapisigwa mu moto ndi Jehoyakimu Mambo we Juda, ngono gukapaphiwa nge matama manjinji.