Read Kalanga Jeremiya 37 Bible Online

Jeremiya 37 - Kalanga bible

Jeremiya 37

¹Zedekiya nkololo wa Josiya wakathamwa mambo ndi Nebukadineza mambo we Bhabhiloni ngono kabusa mu bumo gwa Koniya nkololo wa Jehoyakimu.

²Koga iye ne balanda babe kene bathu be shango bakateedza matama a Yahwe abakalebeleka nge Nlebesambeli Jeremiya.

³Mambo Zedekiya wakatuma Jehukali nkololo wa Shelemiya na Zefaniya we mpirisiti, nkololo wa Maaseya kuna Jeremiya nlebesambeli kunoti, “Utitembezelele kuna Yahwe Ndzimu wedu.”

⁴Ipapo Jeremiya wakabe atjakasununguka kuzha ne kuyenda yenda pakati kwe bathu ngoti wakabe asathu kalongwa mu ng'umba ye busungwa.

⁵Babhayani ba Faro bakabhuda mu Egipiti, kukati Bakhaladiya bakabe bakakomba Jerusalema behwa mbiko nge kwabo bakabhuda mu Jerusalema.

⁶Ipapo dama la Yahwe likazha kuna Jeremiya nlebesambeli liti,

⁷“Yahwe Ndzimu we Iziraela bakati: Budzani mambo we Juda iye wamutuma kuwondibhuzwa muti, ‘Babhayani ba Faro bazha kowomubhatsha banowobgwilila ku shango yabo, ku Egipiti.

⁸Ipapo Bakhaladiya banowoshanduka bakanginilila nzi nkulu iwoyu, banowotola bakaupisa.’

⁹Yahwe bakati, ‘Musizwitjebele muti, “Nge malebeswa Bakhaladiya banowogala kule naswi,” abangake.

¹⁰Nenguba mungabe mungakunda babhayani bose be Bakhaladiya banogwa namwi kukasala balume koga bakakubala mmwe ne mmwe unobhuda mu nshasha uwe kawopisa nzi nkulu iwoyu nge moto.’ ”

¹¹Ipapo kukati babhayani be Bakhaladiya basinobhuda mu Jerusalema ngekwe babhayani ba Faro,

¹²Jeremiya kabhuda mu Jerusalema kayenda ku shango ye Bhenjamini kunotola gobe lile le thundu mu bathu ikoku.

¹³Koga wakati eswika pa Nkoba we Bhenjamini ntungamili we balindi wakabe edang'wa Irija nkololo wa Shelemiya, nkololo wa Hananiya bakansunga bakabe beti, “Unoshakathobela ku Bakhaladiya.”

¹⁴Ngono Jeremiya kabe eti, “Ate malebeswa, anditopandukila ku Bakhaladiya.” Koga Irija kasinteedze kabhata Jeremiya kan'yisa ku makulukota.

¹⁵Makulukota kagwadzila moyo Jeremiya ngono bakanloba bakanlonga mu ng'umba ye busungwa, mu ng'umba ya Jonathani nkwalili, ngoti yakabe yathamwa ng'umba ye busungwa.

¹⁶Kukati Jeremiya asinongina mu ng'umba ye busungwa ikusi kusi, kagala ikoko mazhuba manjinji.

¹⁷Ipapo Mambo Zedekiya kati an'danigwe ngono kan'amutjila. Mambo kan'bhuzwisisa mu kwakasumbikala mu ng'umba iye kati, “Apa kuna dama linodwa kuna Yahwe kene?” Jeremiya kashandula eti, “Ee, liyapo.” Ipapo kabe eti, “Mowolongwa mu luboko gwe mambo we Bhabhiloni.”

¹⁸Jeremiya kakale kabe eti kuna Mambo Zedekiya, “Ndakamutjinyilani imwi ne balanda benyu kene bathu ibaba kunoyita kuti mundilonge mu ng'umba ye busungwa kene?

¹⁹Bangayi balebesambeli benyu bakamulebesela mbeli beti, ‘Mambo we Bhabhiloni aatobhayana namwi nenge shango iyeyi kene’?

²⁰Koga ngwenu, tetshi wangu mambo, ndomukumbila nge kuzwiyisa pasi mbeli kwenyu, musindibgwilize ku ng'umba ya Jonathani nkwalili, pamwe swiyo ndingadwa ndinofila ko.”

²¹Mambo Zedekiya kadusa ndaulo kuti Jeremiya alongwe mu nsha we balindi kakale apiwe tjiwunga tjing'ompela ne zhuba tjinozha ne batengesi be zila kuswikila tjiwunga mu nzi nkulu tjapela. Ndizo Jeremiya kagala mu nsha we balindi.