Read Kalanga Jeremiya 38 Bible Online

Jeremiya 38 - Kalanga bible

Jeremiya 38

¹Ngono kwakati Shefatiya nkololo wa Matani na Gedaliya nkololo wa Phashihuri na Jukali nkololo wa Shelemiya na Phashihuri nkololo wa Malikhiya behwa matama akabe elebgwa ndi Jeremiya ku bathu bose eti,

²“Yahwe bakati, ‘Iye unosala mu nzi nkulu iwoyu unowobulawa nge thumo kene ne bhamba kene nge bugwele, koga iye unoyenda ku Bakhaladiya unowotjila, unowowana butjilo gugwe guli ndipo ye ngwa ngono katjila.’

³Yahwe bakati, ‘Nge malebeswa nzi nkulu iwoyu unowolongwa mu luboko gwe babhayani be mambo we Bhabhiloni ngono unowotapiwa.’ ”

⁴Ipapo makulukota kadwa mambo kati, “Nlume iwoyu wakafanila kuti abulawe. Unonyadza moyo babhayani basala mu nzi iwoyu nkulu nenge bathu bose nge zwithu zwaanoleba ku bali. Nlume iwoyu aatoshakila bathu ibaba bubuya koga unoshaka kubalobesa.”

⁵Mambo Zedekiya kashandula eti, “Bonani umu maboko enyu, ngoti mambo akuna tjabangamuthama.”

⁶Ndizo bakatola Jeremiya bakanlashila mu tshime la Malikija nkololo wa mambo, lakabe lili mu nsha we balindi. Bakalonga Jeremiya nge mitjili mu tshime, lakabe lisina vula kuzhe kwe dope koga ngono Jeremiya kanyumbgwila mu dope.

⁷Ngono kukati Ebedimeleki we N'topiya ngomwa yakabe ishinga mu ng'umba ya mambo ehwa kuti bakalonga Jeremiya mu tshime, ipapo mambo kabe aligele ku nkoba we Nkoba we Bhenjamini,

⁸Ebedimeleki kadwa pa ng'umba ya mambo ngono kanodwa mambo eti,

⁹“Tetshi wangu mambo, balume ibaba bathama tjakabipa muna zose zwabathamila Jeremiya nlebesambeli, banlashila mu tshime, iko kwaanofila ko ebulawa nge zhala ngoti akutjina zojiwa mu nzi nkulu.”

¹⁰Ipapo mambo kadwa Ebedimeleki we N'khushi kati, “Tola balume bali makumi matatu (30) bayende nawe unodusa Jeremiya nlebesambeli mu tshime asathu akafa.”

¹¹Ndizo Ebedimeleki katola balume ibabo akangina mu ng'umba ya mambo ku mabiganyilo e zwiambalo ngono katola masaka makulukugwe ne zwiambalo zwikulukugwe ngono kazwilashila kuna Jeremiya mu tshime nge misungo.

¹²Ebedimeleki we N'khushi wakadwa Jeremiya kati, “Longa masaka ne zwiambalo mu apkhwa dzidzo ne misungo kusi kwazo.” Jeremiya kathama sa ikoku.

¹³Ipapo bakakweba Jeremiya ne misungo bakan'dusa mu tshime. Jeremiya kagala kakale mu nsha we babhayani.

¹⁴Mambo Zedekiya katuma bathu kuti ban'danile Jeremiya we nlebesambeli ngono bakan'zhisa ku nkoba we butatu we Ng'umba ya Yahwe. Ngono mambo bakadwa Jeremiya bakati, “Ndowokubhuzwa tjimwe, usitongondisumbikila tjimwe.”

¹⁵Jeremiya kadwa Zedekiya kati, “Ha ndimubudza matama, atenditi mowondibulaya? Kakale nenguba ndingamukumbuludza amunganditeedze.”

¹⁶Koga Mambo Zedekiya katuna kuna Jeremiya ngekwa kasumbikala kati, “Ha Yahwe batjatjila, ibo bakathama butjilo gwedu, andingakubulaye kene kukulonga mu maboko e balume ibaba banoshaka butjilo gugo.”

¹⁷Ipapo Jeremiya kadwa Zedekiya kati, “Yahwe Ndzimu Masimbawose, Ndzimu we Iziraela bakati, ‘Aungamilidza maboko ukazwipa ku balauli be babhayani be mambo we Babhabhiloni ipapo butjilo gugo gowotjengetiwa ne nzi iwoyu aungatjapisiwe nge moto ngono iwe ne be nsha uwo mowotjila.

¹⁸Koga ausingamilidze maboko awo ukazwipa ku balauli be babhayani be mambo we Bhabhiloni nzi iwoyu nkulu unowolongwa mu maboko e Bakhaladiya ngono banowoupisa nge moto, iwe aungapudzumuke mu maboko abo.’ ”

¹⁹Mambo Zedekiya kadwa Jeremiya kati, “Ndotja Bajuta bakathoba beyenda ku Bakhaladiya pamwe swiyo bangadwa bendilonga mu maboko abo kuti bandidziyidze.”

²⁰Jeremiya kashandula eti, “Abanga mulonge mu maboko abo, teedzani hwi la Yahwe muna tjandinomubudza ngono kowomululwamila koga ne butjilo gwenyu gowotjengetiwa.

²¹Koga amusinga milidze maboko enyu mukazwipa kuna mbono iyeyi Yahwe yabandilakidza:

²²Bakadzi bose bakasala mu ng'umba ye bumambo ya mambo we Juda banowotolegwa ku balauli be babhayani be Bhabhiloni. Bakadzi ibabo banowoti kukuli, “ ‘Bakwinya babo banogalikabgwe, bakakudiyila ntome. Makumbo awo atjimwila mu dope, bakwinya babo bakufupatila.’

²³“Bakadzi babo bose ne bana banowoyisiwa ku Bakhaladiya ngono iwe nge kuko aungapudzumuke mu maboko abo koga unowobhakhwa nge mambo we Bhabhiloni ne nzi iwoyu nkulu unowopisiwa nge moto.”

²⁴Ipapo Zedekiya kadwa Jeremiya kati, “Kushete wawabudza ngekwe ndebeleko iyeyi kusaka jalo unowofa.

²⁵Ha balauli be babhayani bangahwa kuti ndalebeleka nawe bebe bezha kukuli beti, ‘Tibudze tjawabudza mambo ne tjawadwiwa ndi mambo, usitisumbikile kusaka jalo towokubulaya,’

²⁶ipapo ubadwe uti, ‘Ndabe ndikumbila mambo kuti basindibgwilize ku ng'umba ya Jonathani kunofila ko.’ ”

²⁷Balauli bose be babhayani bakazha kuna Jeremiya kuwombhuzwisisa ngono kababudza kose kwaadwiwa ndi mambo kuti akulebe. Ndizo bakasiti tjimwe ku nli ngoti akuna wakabe ahwa ndebeleko ya Jeremiya na mambo.

²⁸Jeremiya kagala ku nsha we balindi kuswikila zhuba Jerusalema layaka tapiwa.