Read Kalanga Jeremiya 4 Bible Online

Jeremiya 4 - Kalanga bible

Jeremiya 4

¹“Ha mungashanduka imwi Iziraela, mungashandukila ku ndili, kojalo Yahwe, ha mudusila kutjena midzimu yenyu inoshimisa mbeli kwangu, mube musingatjalashike,

²ha mutuna muti, ‘Yahwe tjose banotjila,’ mu malebeswa ne mu ndulamo ne kutambunuka, ipapo zwitjaba zose zowozwikombolela nge kwabo, ngono mu bali zwowozwikudza.”

³Ngoti ku bathu be Juda ne ku bagali be Jerusalema Yahwe bakati, “Palulani shango yenyu ye gombo, musidzwale pakati kwe mimihwa.

⁴Thumbilani Yahwe, dusani ganda le mimoyo yenyu, imwi bathu be Juda ne bagali be Jerusalema, kusakajalo bushongola gwangu gungatebuka gukapisa se moto, upisa kusina ungaudzima, ngekwe bubi gwe mishingo yenyu.”

⁵Zibisa mu Juda, ulebeleke mu Jerusalema uti, “Lidzani lunyanga shango yose, lililani pezhugwi ngono muti,” “Kubunganani, ngatitizhileni ku mizi ye matizhilo!

⁶Milidzani tjilakidzo kuti bathu batizhile ku Ziyoni. Tizhani musinonoke! Ngoti ndowozhisa mbipo kudwa ku bunandzwa, ne kukolomola kukulu kwazo.

⁷Shumba yabhuda mu ishaka tjayo, nkolomodzi we zwitjaba wamilika mu magalo awe kuthama kuti shango yenyu ithukudzike, mizi yenyu mikulu inowobe matongo ikasala isina bagali.

⁸Nge kwa ikoku ambalani jila le saka, lilani mubokolele, ngekwe kugwadza moyo kukulu kwa Yahwe kwakashandukila pezhugwi kwedu.”

⁹“Mu zhuba ilelo, kojalo Yahwe, bomambo ne makulukota banowopelegwa nge simba, bapirisiti banowotjenama ne balebesambeli bakasala bakakaabala.”

¹⁰Ipapo ndakati, “Awo She Yahwe, nge malebeswa makatjengela bathu ibaba dumbu kose nenge Jerusalema muti, ‘Mowobe ne mbakiso,’ ngono dumbu thumo latjitola matjilo edu.”

¹¹Mu tjibaka itjetjo kowodwiwa bathu ibaba ne Jerusalema kuyi, “Phepo inopisa inodwa ku matombo asina tjimwe amu tjilambanyika izha ku nkololokadzi we bathu bangu, isi inowulusa kene kupepa,

¹²phepo yakasima kwazo kupinda mishingo iyeyo inowodwa ku ndili. Ngwenu ndodusa sumikiliso nge kwabo.”

¹³“Bonani unozha se makole, koloyi dzidze dze ngwa dzonga tjampupudze, mbizi dzidze dzomadzuka se madzu. Yee mme wee! Tapalala ngobe towokolomogwa.

¹⁴Iwe Jerusalema, suka moyo uwo mu bubi kuti ndizo utjidziwe. Apa kuwodzina kukabe tjibaka tjingapani njalakang'wa dzidzo dzakabipa dzigala mu kuli kene?

¹⁵Ngoti hwi lohwika kudwa ku Dani loleba mbipo inodwa ku Dombo le Ifureimi.

¹⁶Tjenjedzani zwitjaba kuti waswika, budzani Jerusalema muti, ‘Bakumbi banodwa ku shango ikulekule, bakalonga mima ngekwe mizi mikulu ye Juda.

¹⁷Se balindi be nnda bakaipoteleka, ngoti bakandipandukila,’ kojalo Yahwe.

¹⁸“Mipanga yenyu ne zwiyito zwenyu, zwazhisa ikoku pezhugwi kwenyu. Ikoku i shamu yenyu ngono inogwadza, yamubhaya pa moyo.”

¹⁹Zogwadza zwangu, zogwadza zwangu, ndotshinda ndili mu kugwadzika! Moyo wangu unopaluka na pakati, moyo wangu unolobela pezhugwi kwazo, ngokong'wa nge kunyalala, ngoti ndahwa nsindo we lunyanga, gunotjenjedza kuti ngwa yaswika.

²⁰Mbatsha dzotobela mbatsha, shango yose yatjithukudzika. Tjinyolotjo mishasha yangu yakolomogwa, zwisitilo zwangu nge tjibakana tjifupi.

²¹Ndowobona tjilakidzo ne kuhwa nsindo we lunyanga kuswika lini?

²²“Ngoti bathu bangu bazwilengwe, abato ndiziba, bana basakatjenjela abana hwisiso Banyambi dze kuthama bubi, koga abatoziba kuthama bubuya.”

²³Ndakalinga mu shango, bonani ndakawana yakashangashangana isina mbumbiko, ku zhuzhugwi kusina tjedza.

²⁴Ndakalinga matombo, bonani akabe ezunguzika, ne matuthu wose akabe eyenda yeno na yeno.

²⁵Ndakalinga bonani, kukabe kuna kusina nthu, ne nyuni dzose dzinowuluka dzakabe dzawuluka.

²⁶Ndakalinga bonani, shango yakakola yakabe yabe tjilambanyika, ne mizi mikulu yose yawo yatjibe matongo mbeli kwa Yahwe, ngekwe kugwadzika kwawo kukulu.

²⁷Ngoti Yahwe bakati, “Shango yose inowothukudzika koga ne kwakajalo andinga ikolomodze tjose.

²⁸Nge kwaikoku shango inowolila, zhuzhugwi pezhugwi kowobe kutema, Ngoti imi ndaleba, ndashingikadza, ndapedzisa andingatja bgwilile shule.”

²⁹Nzi wose wakatizha zhoba ye bataswi be mbizi ne baposi be matati, banobgwata mu ishaka, betatha mu mabgwe, akuna nthu unogala muili.

³⁰Koga iwe, iwe wakathukudzika, unodwani nge kuambala jila le mbala we bushaba gwakabondelela uzwinakisa ne zwinakiso zwe golide kene? Uzutula mesho awo nge ntapkhwi kene? Unozwinakisila suli. Zwamba zwizo zokuling'ila pasi, tjabanoshaka butjilo gugo.

³¹Ngoti ndakahwa tjililo tjinonga tje nkadzi ali mu zwibhayo zwe kutshibama, zogwadza se nkadzi etshibama mwana we kutanga, tjililo tje nkololokadzi we Ziyoni, wakadzipikana, aka senga maboko mu nsholo eti, “Yee mme wee! Ndotimbama mbeli kwe babulayi.”