Read Kalanga Jeremiya 40 Bible Online

Jeremiya 40 - Kalanga bible

Jeremiya 40

¹Dama lakazha kuna Jeremiya lidwa kuna Yahwe shule Nebuzaradani ntungamili we balindi asino kun'sunungula kuti ayende ku Rama. Wakatola Jeremiya akasungwa nge dziketani ali pakati kwe basungwa bose be Jerusalema ne be Juda bakabe betapigwa ku Bhabhiloni.

²Ntungamili we balindi wakatola Jeremiya ngono kandwa kati, “Yahwe Ndzimu uwo baleba nge kwakayipa ngekwe pathu ipapa,

³naikobo Yahwe bazhisa kakale bashingikadza sekwa bakaleba ngoti makatjinyila Yahwe, amuzoteedza hwi labo, ndizo bubi gwa muwila.

⁴Ngwenu bona, ndokusunungula mu ketani dzi mu maboko awo. Ha kwakakululwamila mbeli kuko kuti uzhe nami ku Bhabhiloni, izha, ndowokutjengeta ngono ha kusakakululwamila mbeli kuko kuyenda ku Bhabhiloni, letja! Bona, shango yose i mbeli kuko, yenda kwakalulwama mbeli kuko.”

⁵Ne kwakajalo kwati Jeremiya wakati asathu kati unoyenda Nebuzaradani kapapha kati, “Yenda kuna Gedaliya nkololo wa Ahikamu, nkololo wa Shafani iye mambo we Bhabhiloni waakabiga kutungamila mizi mikulu ye Juda, unogala naye pakati kwe bathu kene uyende kumwe ne kumwe kwaunoshaka.”

⁶Ipapo Jeremiya kayenda kuna Gedaliya nkololo wa Ahikamu ku Mizipa kanogala naye pakati kwe bathu bakabe basala mu shango.

⁷Ngwenu kwakati batungamili be babhayani bakabe bali ku shango, ibo ne balume babo behwa kuti mambo we Bhabhiloni wakabiga Gedaliya nkololo wa Ahikamu nlauli we shango kakale wambiga ntungamili we balume ne bakadzi ne bana bakabe bali bashayi basina tjabo mu shango bakabe basatapigwa ku Bhabhiloni,

⁸bakayenda kuna Gedaliya ku Mizipa, kwakabe kuli bo Ishimaeli nkololo wa Nethaniya na Johanani nkololo wa Kareya na Seraya nkololo wa Tanihumeti ne bakololo ba Efayi we Netofa na Jezaniya nkololo wa Maaka ne balume babo.

⁹Gedaliya nkololo wa Ahikamu, nkololo wa Shafani katuna kugadzikanya mimoyo yabo ne balume babo eti, “Musitje kushingila Bakhaladiya. Galani mu shango, shingilani mambo we Bhabhiloni, ngono kowomululwamila.

¹⁰Koga nge kwangu, ndowogala ku Mizipa kumumilila mbeli kwe Bakhaladiya banowozha kutili, koga imwi kubunganyani nkumbi we zhambi ne mitjelo ye tjilimo ne mafuta ngono muzwibiganye mu hali dzenyu, mugale mu mizi yenyu mikulu yamatapa.”

¹¹Kwakati Bajuta bose mu Moabu ne Amoni ne Edomu ne shango dzimwe behwa kuti mambo we Bhabhiloni wasiya limbelimbe mu Juda kakale wabiga Gedaliya nkololo wa Ahikamu, nkololo wa Shafani kube nlauli wabo,

¹²bakabgwilila bose ku shango ye Juda kuna Gedaliya ku Mizipa bedwa ku shango dzose dzabakabe bapalalila kudzili. Ngono bakakubunganya nkumbi we zhambi ne mitjelo ye tjilimo minjinji kwazo.

¹³Johanani nkololo wa Kareya ne batungamili bose be babhayani bakabe bali ku shango, bakazha kuna Gedaliya ku Mizipa

¹⁴ngono bakandwa bakati, “Apa unoziba kuti Bhaalisi mambo we Baamoni batumila Ishimaeli nkololo wa Nethaniya kuti akubulaye kene?” Koga Gedaliya nkololo wa Ahikamu kasibadume.

¹⁵Ipapo Johanani nkololo wa Kareya kalebeleka nge kwakasumbikala na Gedaliya ku Mizipa kati, “Ima ndiyende ndinobulaya Ishimaele nkololo wa Nethaniya kusina unoziba nge kwako. Ini akafanila kukubulaya kuti Bajuta bose bakakukubunganila bapalale, ne limbelimbe le Juda lilobe kene?”

¹⁶Koga Gedaliya nkololo wa Ahikamu kadwa Johanani nkololo wa Kareya kati, “Usithame uijalo! Ngoti tjaunoleba ngekwa Ishimaele ate malebeswa.”