Read Kalanga Jeremiya 41 Bible Online

Jeremiya 41 - Kalanga bible

Jeremiya 41

¹Mu mwedzi we butendeka, Ishimaele nkololo wa Nethaniya, nkololo wa Elishama ali mmwe we bumambo ne we batungamili be babhayani, kazha ne balume bali gumi kuna Gedaliya nkololo wa Ahikamu ku Mizipa. Ngono bakati batjaja zojiwa bose ku Mizipa,

²Ishimaele nkololo wa Nethaniya ne balume bali gumi bakabe banaye bakamilika bakabhaya Gedaliya nkololo wa Ahikamu, nkololo wa Shafani nge thumo bakambulaya, iye wakabe abigwa ndi mambo we Bhabhiloni kuti abe nlauli mu shango.

³Ishimaele kakale kabulaya Bajuta bakabe bana Gedaliya ku Mizipa kose ne babhayani be Bakhaladiya bakabe bali ipapo.

⁴Mu zhuba shule kwe kubulayiwa kwa Gedaliya kusathu kukabe ne wakaziba nge kwako,

⁵kukaswika balume bali makumi ali zhanakadzi (80), bedwa ku Shekemu ne Shilo ne Samariya bakatesegwa ndendu dzabo ne zwiambalo zwe makandana, bakazwitjeka mibili yabo bezha bowozhisa zwipo zwe mathunde ne motsha kuzwidusila Ng'umba ya Yahwe.

⁶Ishimaele nkololo wa Nethaniya kazha kabashangamidza ngono kati kubali, “Izhani kuna Gedaliya nkololo wa Ahikamu.”

⁷Ngono bakati basinoswika pakati kwe nzi nkulu, Ishimaele nkololo wa Nethaniya ne balume bakabe banaye bakababulaya bakabalashila mu tshime.

⁸Koga kwakabe kuna balume bali gumi mubali bakadwa Ishimaele bakati, “Usitibulaye ngoti tina matula e mathunde e korong ne bhali ne mafuta ne butji gwe nyutji zwakasumbikwa mu minda.” Ndizo kazwidziba kasibabulaye ibo ne bakwinya babo.

⁹Tshime Ishimaele laakabe alashila zwitumbu zose zwe balume kose ne tja Gedaliya lakabe lili ilo Mambo Asa laakabe athama lili zila yekuzwibakilila muna Bhaasha mambo we Iziraela. Ishimaele nkololo wa Nethaniya kalizhadza nge zwitumbu.

¹⁰Ipapo Ishimaeli katapa bathu bose bakabe bali ku Mizipa, bakololokadzi ba mambo ne bathu bose bakabe basala ku Mizipa, ibo Nebuzaradani ntungamili we balindi baakabe ababigila Gedaliya nkololo wa Ahikamu kube nlauli wabo. Ishimaeli nkololo wa Nethaniya kabatapa kayenda nabo kutjulukila ku Baamoni.

¹¹Koga kwakati Johanani nkololo wa Kareya ne batungamili bose be babhayani bakabe banaye behwa bubi gose gwakathamwa ndi Ishimaele nkololo wa Nethaniya,

¹²bakatola balume babo bakayenda bakanogwa na Ishimaele nkololo wa Nethaniya. Bakazha kunli ku dziba gulu liku Gibiyoni.

¹³Ngono kwakati bathu bose bakabe bana Ishimaele bebona Johanani nkololo wa Kareya ne batungamili bose be balauli be babhayani baakabe anabo bakashatha.

¹⁴Ndizo bathu bose bakabe batapiwa ndi Ishimaele ku Mizipa bakashanduka bakabgwilila bakayenda na Johanani nkololo wa Kareya.

¹⁵Koga Ishimaele nkololo wa Nethaniya kasiya Johanani ana balume bali zhanakadzi etizhila ku Baamoni.

¹⁶Ipapo Johanani nkololo wa Kareya ne batungamili be balauli be babhayani bakabe banaye bakatola malimbelimbe wose e bathu bakabe batapiwa mu Mizipa ndi Ishimaele nkololo wa Nethaniya shule kwe abulaya Gedaliya nkololo wa Ahikamu; Babhayani ne bakadzi ne bana ne ngomwa ibo Johanani baakabe atola ku Gibiyoni.

¹⁷Bakayenda bakanogala ku Geruti Khimuhamu kubapa ne Bhetelehema, mazwimisilo ili kuyenda ku Egipiti

¹⁸ngekwe Bakhaladiya ngoti bakabe bebatja, ngoti Ishimaele nkololo wa Nethaniya wakabe abulaya Gedaliya nkololo wa Ahikamu iye wakabe abigwa nlauli we shango ndi mambo we Bhabhiloni.