Read Kalanga Jeremiya 43 Bible Online

Jeremiya 43 - Kalanga bible

Jeremiya 43

¹Kwakati Jeremiya asinopedza lebeleka ne bathu bose matama wose a Yahwe Ndzimu wabo, tjimwe ne tjimwe Yahwe tjabakabe bantuma kubabudza,

²Azariya nkololo wa Hoshaya na Johanani nkololo wa Kareya ne balume bose be misholo inopanda bakadwa Jeremiya bakati, “Unonyepa! Yahwe Ndzimu wedu abazokutuma kuti ulebe uti, ‘Amuzofanila yenda ku Egipiti kunogala ko.’

³Koga Bharuku nkololo wa Neriya ndiye unofulila kuti usitongodumana naswi kuti utilonge mu maboko e Bakhaladiya kuti ndizo batibulaye kene batitapile ku Bhabhiloni.”

⁴Ndizo Johanani nkololo wa Kareya ne batungamili be balauli be babhayani bose ne bathu bose bakasiteedze hwi la Yahwe kuti bagale mu shango ye Juda.

⁵Koga Johanani nkololo wa Kareya ne batungamili be balauli be babhayani bakatola malimbelimbe wose e Juda bakabe bashanduka kuwogala mu shango ye Juda bedwa ku zwitjaba zose zwabakabe batatigwa kuzwili.

⁶Bakatola bakadzi ne bana ne bakololokadzi ba mambo ne nthu mmwe ne mmwe iye Nebuzaradani ntungamili we balindi baakabe asiya na Gedaliya nkololo wa Ahikamu, nkololo wa Shafani na Jeremiya we nlebesambeli na Bharuku nkololo wa Neriya.

⁷Ndizo bakayenda ku shango ye Egipiti ngoti abazoteedza hwi la Yahwe. Ngono bakanoswika ku Tahefanesi.

⁸Dama la Yahwe lakazha kuna Jeremiya bali ku Tahefanesi liti,

⁹“Tola mabgwe makulukulu, uabumbile ne vu uwalile ne daka pa nkoba unongina ku ng'umba ye bumambo ya Faro ku Tahefanesi, uthame Bajuta bakakulinga.

¹⁰Ipapo ubadwe uti, ‘Yahwe Masimbawose Ndzimu we Iziraela bakati, “Bonani, ndowotuma Nebukadineza mambo we Bhabhiloni, nlanda wangu, ngono unowobiga tjigalo tje bumambo pezhugwi kwe mabgwe iyawa andasumbika ngono unowowala denga lile le bumambo pezhugwi kwabo.

¹¹Unowozha kanginilila shango ye Egipiti, ezhisa bugwele kuna ibabo balingisanyiwa ne bugwele, kutapiwa kuna bakalingisanyiwa ne kutapiwa ne thumo kuna bakalingisanyiwa ne thumo.

¹²Unowopisa nge moto ng'umba dze kunamata dze midzimu ye Egipiti, unowopisa ng'umba dzabo dze kunamata katapa midzimu yabo. Koga se nlisi unozwipomba nge hazu, unowozwipomba ne Egipiti ngono kadwa ipapo ali mu mbakiso.

¹³Ikoku ku ng'umba inonamatigwa zhuba mu Egipiti unowokolomola phanda dzakayengemala kapisa ng'umba dzinonamatigwa midzimu ye Egipiti.” ’ ”