Read Kalanga Jeremiya 46 Bible Online

Jeremiya 46 - Kalanga bible

Jeremiya 46

¹Dama la Yahwe lakazha kuna Jeremiya nlebesambeli ngekwe zwitjaba.

²Ngekwe Egipiti, lakalingisana ne babhayani ba Faro Neko, mambo we Egipiti, bakakundiwa ku Karikhemishi pa Gwizi gwe Yufuratesi ndi Nebukadineza mambo we Bhabhiloni mu gole le bunna le mbuso wa Jehoyakimu nkololo wa Josiya mambo we Juda liti,

³“Lulwamisani zwivikisi zwikulu ne zwitukunu, mutshambe makazwilulwamisila ngwa!

⁴Sungani mbizi dzenyu, mudzitathe imwi bataswi be mbizi! Imani zubuyanana makaambala hwutshe dze ngwa, kuswani mathumo enyu, ambalani zwivikisi zwenyu zwe ifuba!

⁵Ndobonelani ikoku? Batemeka mafupa, babgwilila shule. Babhayani babo bakundiwa, batizha tjinyolotjo, basingatjebuke shule, lutjo gumu mbizho dzose! Koleba Yahwe.

⁶Unalubilo angatubule kutizha, mbhayani aangatubule kusiya, ku bunandzwa ku Gwizi gwe Yufuratesi, bakuthiwa bakawa.

⁷“Ndiani iwoyu unosuma se Naili, se gwizi gwakatuta matanda kene?

⁸Egipiti inosuma se Naili, se gwizi gwakatuta matanda. Inoti, ‘Ndowomilika, ndowofukidza shango, ndowokolomola mizi mikulu ne bagali bayo.

⁹Endilani mbeli imwi mbizi, labukani makasima imwi koloyi dze ngwa! Tshambilani mbeli imwi babhayani, balume be Khushi ne Puti bakabhata zwivikisi, balume be Ludi nyambi dze matati.’

¹⁰“Zhuba ilelo i zhuba la She Yahwe Masimbawose, zhuba le kubgwilizila, be zwibgwilizilila ku zwita zwabo. Thumo lowoja kudzina lagutshika, likang'wa malopa kudzina laguta malopa abo. Ngoti Yahwe Ndzimu Masimbawose bakabhata tjibhayilo, ku shango ye bunandzwa pa Gwizi gwe Yufuratesi.

¹¹Tathila ku Giliyadi unotola nyonje, iwe mwanadi we Egipiti! Wakashingisila suli miti minjinji, auna bhodzo.

¹²Zwitjaba zwakahwa ngekwe shoni dzidzo, shango izhele tjililo tjitjo, ngoti mbhayani wakabhayana ne mbhayani, ngono bakanowa bubili gwabo.”

¹³Dama la Yahwe labakaleba kuna Jeremiya nlebesambeli ngekwe kuzha kwa Nebukadineza mambo we Bhabhiloni kunginilila Egipiti ndelinoti,

¹⁴“Leba mu Egipiti kakale uzibise ku Migidolo, zibisa ku Memifisi ne Tahefanesi, uti, ‘Imani muzwilulwamise, ngoti thumo lawoja kumupoteleka.’

¹⁵Ini bakasima babo baligwa kene? Abatotubula kuma ngoti Yahwe babaliga.

¹⁶Babaliga nge bunji, banowa, banowilana pezhugwi. Banodwana beti, ‘Milikani, ngatibgwilileni ku bathu bedu, ku shango yatakazwaligwa, titizhe thumo le ntshambilidzi.’

¹⁷Ikoko banowomimila beti, ‘Faro mambo we Egipiti ba nsindo we ngwa koga ngono baleya tjibaka tjakalingisana.’

¹⁸“Nge malebeswa anditjatjila, koleba Mambo, be zina labo linoyi Yahwe Masimbawose, se Tabori pakati kwe matombo, se Karimeli pa gungwa mmwe unowozha.

¹⁹Lulwamisani zwitolombaje zwenyu kutapiwa, imwi bagali be Egipiti! Ngoti Memifisi inowothukudziwa, akabe dongo lisina bagali.

²⁰“Egipiti i ng'ombe yakanaka kwazo, ngoti thuzi ye ng'ombe kudwa ku bunandzwa yaswika ku ili.

²¹Ne babhayani babe bakahiriwa bayapo pakati kwayo, banonga phulu dzakakodziwa, na ibobo bashanduka batizhabo, abazotubula kuma, ngoti zhuba le mbatsha labawila, tjibaka tje kulobgwa shamu kwabo.

²²“Egipiti inothama nsindo unonga we nyoka itizha, ngoti zwita zwizwe zotshamba zwakasima, zozha kubhayana naye nge mashathu, sa ibabo banotema miti,

²³banowotema miti yayo. Koleba Yahwe, kene ikabe yakamandana kwakatini, ngoti banjinji kupinda phashu, abatobalika.

²⁴Nkololokadzi we Egipiti unowobhatisiwa shoni, kalongwa mu maboko e bathu banodwa ku bunandzwa.”

²⁵Yahwe Masimbawose Ndzimu we Iziraela bakati, “Bonani, ndabe pejo ne loba shamu Amoni ndzimu we Thebesi na Faro ne Egipiti ne midzimu yayo na bomambo bayo, na Faro na bose banogalabgwe mu nli.

²⁶Ndowobalonga mu maboko aibabo banoshaka kubabulaya, mu maboko a Nebukadineza mambo we Bhabhiloni ne makulukota awe. Shule kwa ipapo Egipiti inowogagwa koga se mu misi ya ntolo,” kojalo Yahwe.

²⁷“Koga usitje, iwe Jakubo nlanda wangu, kene ili kutemeka mafupa, iwe Iziraela, ngoti nge lebeswa ndowokutjidza uli kulekule, ne bana babo baku shango ye kutapiwa kwabo. Jakubo unowobe ne mbakiso ne kubakililika kakale, akuna unowon'thama kuti atje.

²⁸Usitje iwe Jakubo nlanda wangu, koleba Yahwe, ngoti ndinawe. Ndowozhisa bhelelo lizhele ku zwitjaba zose, zwandakakutatila ku zwili, koga nge kuko anditowozhisa bhelelo lizhele. Ndowokutjemela koga nge kwakatambunuka, anditowokuletja koga ndisakuloba shamu.”