Read Kalanga Jeremiya 47 Bible Online

Jeremiya 47 - Kalanga bible

Jeremiya 47

¹Dama la Yahwe lakazha kuna Jeremiya nlebesambeli ngekwe Bafilisitiya Faro asathu katapa nzi we Gaza liti,

²“Yahwe bakati, ‘Bonani vula inopubuka idwa ku bunandzwa, ngono inowobe nkuku wakasizikana, inowosizikana mu shango ne pamwe ne pamwe kwayo, mu mizi mikulu na ibabo banogala muili. Bathu banowomimila, ne bagali bose be shango banowolila.

³Ku misindo ye kutshamba kwe mbizi ndume dzakalabuka, mu kulabuka kwe koloyi dzidze dze ngwa, mukupitukana kwe makumbgwana adzo, botate abatowoshanduka bakalinga bana babo, maboko abo anotetema koga,

⁴ngekwe zhuba laswika kuwolobesa Bafilisitiya bose, ne kubulaya kudwa mu Tire ne Sidoni babhatshi bose bakasala. Ngoti Yahwe banolobesa Bafilisitiya, limbelimbe le tjekelo dze gungwa dze Khafithori.

⁵Gaza yatjibe bhalo loga, Ashikeloni yalobesiwa. Iwe limbelimbe le nkuku wabo, unowozwitjeka kuswikila lini kene?

⁶“ ‘Yee mme wee thumo la Yahwe! Lowotola tjibaka tjingapani kuti linyaluluke kene? Bgwilila mu gobhodo lilo, nyaluluka udzikame!’

⁷Koga linga nyaluluka tjini wali, apa Yahwe bakalidwa, bakali laula kuti linginilile Ashikeloni ne gungwa kene?”