Read Kalanga Jeremiya 48 Bible Online

Jeremiya 48 - Kalanga bible

Jeremiya 48

¹Ngekwe Moabu. Yahwe Masimbawose, Ndzimu we Iziraela bakati, “Yee mme wee wapalala iwe Nebo ngoti unowobe dongo. Kiriyathayimu yabhatisiwa shoni yatogwa, dizhilo labhatisiwa shoni kakale laligwa,

²gudzo le Moabu alitjipo. Mu Heshibhoni banon'lukila bubi beti, ‘Izhani ngatin'peleledzeni kuti asibe itjaba!’ Na webo, iwe Madimeni unowonyaladziwa, thumo lowokutatamila.

³“Nsindo we buyendasi unodwa ku Horonayimi uti, ‘Kuthukudzika ne golomodzo gulu!’

⁴Moabu yakolomogwa, siyang'wa dzayo dzolila.

⁵Dzotathila nge zila ye Luhiti, dzilila kwakabangalala dzili mu zila, mu zila inodelukila ku Horonayimi, kulila kunopalusa moyo ngekwe golomodzo kohwika.

⁶Tizhani! Muzwitjidze! Munge denjana mu tjilambanyika!

⁷Se mugalabgwe mishingo yenyu ne fumwa yenyu, namwibo mowotogwa, Khemoshi unowotapiwa, kose ne bapirisiti babe ne makulukota.

⁸Nkolomodzi unowozha mu nzi nkulu mmwe ne mmwe, ngono akuna nzi nkulu unowosiya, nkuku unowoloba, ne tjibata tjowokolomogwa, Koga sekwa kaleba Yahwe.

⁹“Ipani Moabu mapapilo, kuti ndizo awulukile kule, mizi mikulu iye inowothukudziwa, ikasala isina bagali muili.

¹⁰“Bhiso ngalibe mu nli una butjapa mu nshingo wa Yahwe! Bhiso ngalibe mu nli unodziba thumo lile kutebula lopa!

¹¹“Moabu yagala ili gele khenyenye kudwa mu butjetjana gwayo, yakadzikama se madzongwe mu saka, aizodusila madzongwe mu tjimwe tjija, kene kuli kutapiwa, ndizo igele sekwa yakabe ili iko, kunohwa kwayo akuzoshanduka.

¹²“Ndizoke, bonani, mazhuba aswika, kojalo Yahwe, andinoti ayitumila balume banoswina nkumbi we zhambi, banowoyiswina, bakatebula zwithu zwayo, bakapkhwanya hali dzayo.

¹³Ipapo Moabu inowobhakhwa nge shoni ngekwa Khemoshi koga se ng'umba ye Iziraela yakatongo bhakhwa nge shoni pabakagalabgwe Bhetele.

¹⁴“Ini ungati, ‘Bangayi bakundi ne balume bakasima be ngwa kene?’

¹⁵Nkolomodzi we Moabu ne mizi yayo mikulu wazha, bazhuzha bayo bakashalugwa banobulawa, kojalo Mambo, ibo zina labo linoyi Yahwe Masimbawose.

¹⁶Kuwa kwe Moabu kwasendela, mbatsha dzoizhila tjinyolotjo.

¹⁷Mu ililile imwi banogala kuipoteleka, imwi munoziba tjilumbi tjayo, muti, ‘Swimbo ye bumambo yavunika, ludozo gwe gudzo gwavunika seni!’

¹⁸“Deluka kudwa mu gudzo lilo, ubuye wogala pasi pakakwakwalala, iwe n'gali we Diboni! Ngoti nkolomodzi we Moabu unobhayana nawe, wakolomola matizhilo awo.

¹⁹Mila ntome ulingilile, iwe n'gali we Aroeri! Bhuzwa watizha kene wasiya, uti, ‘Kwashingikalani?’

²⁰Moabu yabhatisiwa shoni ngoti yapkhwanyiwa, mimilani mulile! Budzani be Arinoni, kuti Moabu yathukudzika.

²¹“Kusumikilisiwa kwazha ku shango yakawala ne ku Holoni ne ku Jaza ne ku Mefaati

²²ne ku Diboni ne ku Nebo ne ku Betidibilatayimu

²³ne ku Kiriyathayimu ne ku Betigamuli ne ku Betimeyoni

²⁴ne ku Keriyoti ne ku Bhozira ne mizi mikulu yose ye shango ye Moabu ipejo ne ikule.

²⁵Simba le Moabu la lashigwa kutjena, ne luboko gwayo gwathubuligwa kutjena, kojalo Yahwe.

²⁶“Unlaladzise ngoti akazwikudza kupinda Yahwe, kuti ndizo Moabu ibumbuluke mu matho ayo, ngaibe tjithu tje madado koga.

²⁷Apa Iziraela aizobe tjithu tje madado kukuli kene? Apa yakawanika ili pakati kwe mbava, kwakabe kuyita kuti uti ulebeleka nge kwazo uzunguze nsholo uwo kene?

²⁸“Siyani mizi mikulu munogala pakati kwe shongwe, imwi bagali be Moabu! Ibeni se njiba dzi mu mashaka, dzi ku lubizho kwe guwu.

²⁹“Takahwa kuzwikudza kwe Moabu, kuti inozwikudza kwazo, nge kuzwitolela pezhugwi kwayo ne kuzwida ne kuzwibona, ne kube mashungwa ndibongwe kwayo.

³⁰Ndoziba bushongola gwayo ne kuzwiloba ifuba kwayo kuti madatha, kojalo Yahwe. Kuzwiloba ifuba kwayo atetjimwe koga.

³¹Ndizo ndolilila pezhugwi ngekwe Moabu, ndolilila Moabu yose koga, ngoti balume be Kiriheresi ndi mu buyendasi nge kwabo.

³²Ndomulilila kupinda Jazeri, iwe nzhambi we Sibima! Imwi matabi akapasulila ku gungwa, kunoti ku gungwa gwe Jazeri. Nkolomodzi wawila pezhugwi kwe mitjelo ne zhambi dzenyu dzakabidwa.

³³Kushatha ne mpululu azwitjipo, kudwa mu minda dze mitjelo ne minda dze Moabu. Ndakamisa kuwunga kwe nkumbi we zhambi, kudwa mu maswinilo, akuna unowoswina nge kushatha, Nenguba kuna misindo, ate misindo ye kushatha.

³⁴“Misindo ye tjililo tjabo inokulila pezhugwi, kudwa mu Heshibhoni kunoti ku Elealehi ne ku Jahazi, kudwa mu Zoari kunoti ku Horonayimi ne ku Egilati Shelishiya, ngoti ne vula dze Nimirimu dzakapkhwa.

³⁵Ku Moabu ndowozhisa bhelelo, kuna ibabo banodusa zwipo mu magalo a pezhugwi, bepisila motsha midzimu yabo, kojalo Yahwe.

³⁶Ndizo moyo wangu unolilila Moabu se nyele, unolila se nyele ulilila balume be Kirihareseti. Fumwa yabakashaba yakapela.

³⁷Nsholo mmwe ne mmwe wakatesegwa, ndedu dzose dzakathubugwa, luboko gumwe ne gumwe gwakatjekiwa, thunji dzose dzakapombiwa nge jila le saka.

³⁸Mu matenga wose mu Moabu ne ku zwibata, akuna tjimwe kuzhe kwe tjililo koga, ngoti ndavunilila Moabu, se jegwa lisina unolishaka, koleba Yahwe.

³⁹Yapaladziwa seni! Banolila seni! Moabu wakalonga nsholo seni nge shoni! Moabu watjibe tjithu tje madado, tjithu tjino tjisa kuna bose bakan'poteleka.”

⁴⁰Ngoti Yahwe bakati, Bonani, tjita tjowowuluka se dzu, tjikafukidza mapapilo atjo pezhugwi kwe Moabu.

⁴¹Keriyoti inowotogwa, ne matizhilo ayo anowotogwa. Mu zhuba ilelo mimoyo ye babhayani be Moabu, inowonga moyo we nkadzi umu zwibhayo zwe kutshibama.

⁴²Moabu inowokolomogwa ikasitjibe itjaba, ngoti yakazwikudza mbeli kwa Yahwe.

⁴³Paluka moyo ne gomba ne bhuzhu zwakamulinda imwi bathu be Moabu, kojalo Yahwe.

⁴⁴Iye unotizha kupaluka moyo, unowila mu gomba, iye unobhuda mu gomba, unowobhapkhwa nge bhuzhu, ngoti ndowozhisila Moabu gole le kulobgwa shamu, kojalo Yahwe.

⁴⁵Mu ntutshi we Heshibhoni, batizhi banowoma basina simba, ngoti moto wapubuka mu Heshibhoni, bhuba kudwa pakati kwe Sihoni, lopisa phazha dze Moabu, ne zwipepe zwe bavanganyi.

⁴⁶Yee mme wee wapalala iwe Moabu! Bathu be Khemoshi balobesiwa, bakololo babo batapiwa ne bakololokadzi babo batolegwa ku busungwa.

⁴⁷“Nenguba kwakajalo ndowobgwiliza fumwa ye Moabu, mu mazhuba anozha, kojalo Yahwe.” Ipapa ndipo panopelela kusumikilisiwa kwe Moabu.