Read Kalanga Jeremiya 5 Bible Online

Jeremiya 5 - Kalanga bible

Jeremiya 5

¹Tizhilani yeno na yeno mu dzizila dze Jerusalema! Lingani kumupoteleka ngono muzwibonegwe. Shakani ku matengeselo awe mubone, ha kuna nthu wamunowowana, iye unothama tjakatambunuka iye unoshaka lebeswa, kuti ndizo ndinzwiibhatigwe.

²Nenguba beti, “Na Yahwe banotjila,” koga betuna manyepkhwa.

³Imwi Yahwe apa mesho enyu aatolinga lebeswa kene? Makabaphobola, koga abazohwa zogwadza, makabapeleledza, koga bakalamba kutjemegwa. Bakathama njiso dzabo dzikasima kupinda bgwe, bakalamba kushandukila matjinyo.

⁴Ipapo ndakati, “Ibaba ate bali betjimwe, zwilengwe abana mikumbulo, ngoti abatoziba zila ya Yahwe, nlayo we Ndzimu wabo.

⁵Ndowoyenda ku bahwola, ndowonolebeleka nabo. Nge malebeswa banoziba zila ya Yahwe, nlayo we Ndzimu wabo.” Koga bose naibo bakavuna jokwi, bakathubula mitjili.

⁶Ndizo shumba inodwa mu ishaka inowobabulaya, phele inodwa mu tjilambanyika inowobalobesa. Ngwe inowobalalila mu mizi yabo mikulu, mmwe ne mmwe unobhudila kuzhe unowopalulanyiwa kabe zwitibhutibhu, ngoti bupanduki gwabo gunjinji, bakathama zwithu zwinjinji zwisina kugalikamoyo.

⁷“Ndingamuzwiibhatigwa tjini wali? Bana benyu bakandifupatila, bakatuna ne midzimu isi midzimu. Ndakati ndibapa zwinojiwa bakaguta, bakathama bupombgwe bakakubungana mu ng'umba dze fukula.

⁸Banonga mbizi ndume dzakakola dzishashala, imwe ne imwe ililila hadzi ye imwe.

⁹Apa andingabalobele zwithu izwezwi kene?” Kojalo Yahwe. Apa andingazwibgwilizile, mu zwitjaba zwinonga izwezwi kene?

¹⁰Palamani minda yayo mukolomole, koga musi ikolomole yose, pululani thabi dzayo, ngoti adzitedzili dza Yahwe.

¹¹Ngoti be ng'umba ya Iziraela ne ng'umba ya Juda bakandishayila bugalimoyo kwakapelela dumbu kojalo Yahwe.

¹²Bakaleba manyepkhwa ngekwa Yahwe beti, “Abangathame tjimwe! Akuna tjakabipa tjinowotiwila, atingafe tabona thumo kene bhamba.

¹³Balebesambeli banowobe phepo yoga, dama alitowobe mu bali. Ikoku kowobashingikalila!”

¹⁴Ndizo Yahwe Ndzimu Masimbawose bakati, “Ngoti bathu bakaleba matama iyawa, bona, ndothama matama angu mu nlomo uwo kube moto, bathu ibaba kube hwuni, moto unowobaja.

¹⁵Bonani, ndozhisa mu muli itjaba tjikule kubhayana nawe ng'umba ye Iziraela, kojalo Yahwe. Itjaba tjakasima, itjaba tja ntolo tjose, itjaba tje lulimi gwamusingazibe, kene gwamungahwa tjabanoleba.

¹⁶Wobhodo dze misebe yatjo inonga ikumbu tjakaashama, bose koga babhayani bakasima.

¹⁷Banowoja zwe minda dzenyu ne zojiwa zwenyu, banowoja bakololo ne bakololokadzi benyu, banowoja mbudzi ne pkhwizi dzenyu ne ng'ombe dzenyu, banowoja zhambi dzenyu ne phaya dzenyu, mizi yenyu ye matizhilo yamunogalabgwe muili, inowokolomogwa nge thumo.”

¹⁸“Koga ne mu mazhuba iyawo, kojalo Yahwe, anditomupeleledza.

¹⁹Ngono ha bathu bebhuzwa beti, ‘Ini Yahwe Ndzimu wedu bathama zwithu zwakajali mu tili?’ Ngono unowoti kubali, ‘Koga sekwa makandifupatila mukashingila midzimu ipoga mu shango yenyu, ndizo namwibo mowoshingila bataya mu shango isi yenyu.’ ”

²⁰Zibisa woku mu ng'umba ya Jakubo, ukulebe mu Juda:

²¹“Ihwani woku imwi zwilengwe imwi bathu basina mikumbulo, bana mesho koga musingabone, bana zebe koga musingahwe.

²²Apa amutonditja kene? Kojalo Yahwe. Apa motetema mbeli kwangu kene? Ndakathama nsetje kube n'gathu we gungwa, tjidzibilidzi tjatjose tjagusingake gukatjuluka, kene mapundu e vula angapitukana agungatubule, zwingabomba koga azwingagutjuluke.

²³Koga bathu ibaba bana bukomba ne moyo we bupanduki, bakapambuka bakazwiyendila ntome.

²⁴Mu mimoyo yabo abatozwidwa beti, ‘Ngatitjeni Yahwe Ndzimu wedu, ibo banotipa vula ye zhizha ne ye nsewulo nge tjibaka tjayo, ibo banogadzabgwe misi ye kuvuna.’

²⁵Matjinyo enyu akapambusa zwithu izwezwi, zwibi zwenyu zwakadzibila ndulamo.

²⁶Ngoti bathu babiibi banowanika pakati kwe bathu bangu, banolalila bathu sa ibabo banobhatshila nyuni.

²⁷Se mazongondo azhele nyuni, ng'umba dzabo dzizhele butjebeli, ndizo batjibe ne masimba batjifuma,

²⁸bakatjikola banokwidzima. Banozwikudza ne mishingo yabo yakabipa isina tjilizanyo, banosumikilisa kusakatambunuka, ndebo dze siyang'wa kuyita kuti dzisibhudilile, abatolebelekela fanilo dze banosheta.

²⁹Apa andizofanila kubalobela zwithu izwezwi kene? Kojalo Yahwe, apa andizofanila kuzwibgwilizila mu zwitjaba zwakajali kene?”

³⁰Tjithu tjinotjenamisa kakale tjakabipa tjashingikala mu shango,

³¹balebesambeli banolebeselambeli manyepkhwa, bapirisiti banoshinga nge simba labo ngono bathu bangu banoda kwakajalo, koga mowothama tjini ha bhelelo latjiswika kene?