Read Kalanga Jeremiya 50 Bible Online

Jeremiya 50 - Kalanga bible

Jeremiya 50

¹Dama lakalebgwa ndi Yahwe ngekwe Bhabhiloni nenge shango ye Bakhaladiya ndi Jeremiya nlebesambeli likati,

²“Lebani pakati kwe zwitjaba kakale muzibise! Misani tjilakidzo mulizibise, musilisumbike ngono muti, Bhabhiloni yatogwa, Bheli wabhatisiwa shoni, Merodaki watemeka mafupa.

³Ngoti kwadwa itjaba ku bunandzwa tjawon'nginilila, tjawothukudza shango iye. Akutjina ungagala muili, kose bathu ne phuka banowotizha.

⁴“Mu mazhuba iyawo, nge tjibaka itjetjo,” koleba Yahwe, “bathu be Iziraela ne bathu be Juda banowoshangana, banowotebula mishodzi kushaka Yahwe Ndzimu wabo.

⁵Banowobhuzwa zila inoyenda ku Ziyoni, ngono bakashanduka bakalinga ku ili. Banowozha bakazwipa kuna Yahwe, mu tjidumano tjisingapele, tjisowofa tjakanganika.

⁶“Bathu bangu babe bali pkhwizi dzakalashika, balisi badzo bakadzitungamilila ntome, bedzishandusa kulimwe dombo bedziyisa kulimwe, dzakapungayila kudwa mulimwe dombo kunoti ku matuthu, dzakakangang'wa danga ladzo.

⁷Bose bakadziwana bakadzija, zwita zwabo zwakati, ‘Atina nlandu, ngoti bakatjinyila Yahwe, bugalo gwabo gwe lebeswa, Yahwe ibo kugalabgwe kwa bobatategulu babo.’

⁸“Tizhani mudwe mu Bhabhiloni, bhudani mu shango ye Bakhaladiya, munge mbudzi ndume dzakatungamila ngubi.

⁹Bonani ndowodzonga azhisa nshanganyila we zwitjaba zwikulu kudwa ku shango ye bunandzwa, kuwobhayana ne Bhabhiloni. Banowomazubuyanana nge magalo abo kubhayana nayo, zowodwa ku bunandzwa ngono zowoitola. Misebe yabo inowobe inga nyambi dze babhayani, basingabgwilile bakalembedza maboko.

¹⁰Ndizo Khaladiya inowotolegwa, bose banoitolela banowotola bakagutshika,” koleba Yahwe.

¹¹“Nenguba mungashatha, nenguba mungapululudza, imwi munotola thaka yangu, nenguba mungatamba tamba se phulu mu bushwa, mukafula se mbizi ndume,

¹²mme benyu banowobhakhwa nge shoni kwazo, iye wakamuzwala unowolengudzika. Unowobe ntukununu mu zwitjaba, kabe ikaka, shango yakawomelela, tjilambanyika.

¹³Ngekwe bushongola gwa Yahwe aitowogagwa, koga inowobe yakathukudzika kwazo. Bose banopinda paili banowokaabala, bakazunguza misholo ngekwe mabanga ayo wose.

¹⁴“Imani zubuyanana kupoteleka Bhabhiloni, imwi mose makabhata matati. Muipose! Musitjibe misebe, ngoti yakatjinyila Yahwe.

¹⁵Muipose kudwa mbizho dzose, yamilidza maboko, matizhilo ayo awa, makuma ayo apkhwanyika. Ngoti ikoko ndiko kuzwibgwilizila kwa Yahwe, muibgwilizile, muithamile tjayakathama ku bamwe.

¹⁶Peleledzani badzwali be Bhabhiloni, ne ntjeli wakabhata sikili mu nsi we kuvuna. Ngekwe thumo le ntshambilidzi, mmwe ne mmwe ngaabgwilile ku bathu bakanyi kukwe, mmwe ne mmwe ngaatizhile ku shango iye.

¹⁷“Iziraela i ngubi yakapalala, iyo yakatatiwa ne shumba. We kutanga kuija, yakabe ili mambo we Asiriya, we bupelo kupupuna mafupa ayo, yakabe ili Nebukadineza mambo we Bhabhiloni.”

¹⁸Ndizo Yahwe Masimbawose, Ndzimu we Iziraela bakati, “Ndowoloba shamu mambo we Bhabhiloni ne shango iye, koga sekwa ndakaloba shamu mambo we Asiriya.

¹⁹Koga ndowobgwiliza Iziraela ku mafulo ayo, unowofula mu Karimeli ne Bhashani, Yemula iye inowogutshika, mu matombo e Ifureimi ne Giliyadi.

²⁰Mu mazhuba iyawo, nge tjibaka itjetjo,” koleba Yahwe. “Kowoshakiwa nlandu we Iziraela, ngono unowosheteka, ngekwe tjibi tje Juda, akuna tjinowowanika, ngoti ndowozwiibhatigwa iye wandinosiya ali limbelimbe.

²¹“Nginililani shango ye Merathayimu, na ibabo banogala mu Pekodi. Ubabhaye, ubapeleledze tjose, kojalo Yahwe. Thama tjimwe ne tjimwe tjandakudwa.

²²Nsindo we ngwa umu shango, ne golomodzo gulugulu!

²³Yavunika kakale yathubugwa seni, hamuli ye shango yose! Bhabhiloni yathukudzika seni, pakati kwe zwitjaba!

²⁴Ndakakubigila bhuzhu iwe Bhabhiloni, ngono wakabhatshigwa usathu waziba, wakang'wa ukasungwa, ngoti wakanyanyayidzana na Yahwe.

²⁵Yahwe bazhula ng'umba ye babulayi babo, badusa zwibhayano zwe kugwadzamoyo kwabo, ngoti She Yahwe Masimbawose bana nshingo wabakafanila kuwoshinga, mu shango ye Bakhaladiya.

²⁶Mun'kubunganile kudwa mbizho dzose, Pkhwanyani muzhule matula ayo, muakubunganye muthame matuluthulu e mathunde. Muikolomole tjoselele, musiisiyile ndodwa ne limbelimbe.

²⁷Bulayani mikono yayo, ngaiyende kunobhayiwa! Yee mme wee bapalala ngoti zhuba lazha, tjibaka tjabo kuti balobgwe shamu.

²⁸Hwililani batizhi ne basiya kudwa mu Bhabhiloni, bazha ku Ziyoni banobika beti, ‘Yahwe Ndzimu wedu babgwilizila, babgwilizila ngekwe Ng'umba yabo.’

²⁹“Danani babhayani be misebe bapose Bhabhiloni, ibabo banopeta matati. Ikombeni yose, kushete wapudzumuka. Ngailipile mishingo yayo, muithame koga sekwa yakathama. Ngoti yakazwikudza mbeli kwa Yahwe, Nyengemali we Iziraela.

³⁰Ndizo bazhuzha bayo banowowa mu dzizila, babhayani bayo bose banowolobesiwa mu zhuba ilelo,” kojalo Yahwe.

³¹Bona ndobhayana nawe, iwe unozwikudza, kojalo She Yahwe Masimbawose, ngoti zhuba ilelo lazha, zhuba landinowokuloba shamu.

³²Unozwikudza unowokuthiwa kawa, kukasheta ungammilidza, ndowobhatidza moto mu mizi iye mikulu, ngono unowoja kose kwakaipoteleka.

³³“Yahwe Masimbawose bakati, “Bathu be Iziraela bakatshambilidziwa, kose ne bathu be Juda bo, bose bakabatola bakabasunga, banolamba kubaletja bakayenda.

³⁴Koga Ndzutunuli wabo nde wakasima, Yahwe Masimbawose ndilo zina labo. Nge malebeswa unowobalebelekela, kuti ndizo azhise kunyaluluka mu shango yabo, koga azhise kusanyaluluka ku bagali be Bhabhiloni.

³⁵“Thumo ngali bhayane ne Bakhaladiya,” kojalo Yahwe, “Libhayane ne bagali be Bhabhiloni, libhayane ne makulukota ne balume bayo bakatjenjela!

³⁶Thumo ngalibhayane ne balebesambeli bayo be manyepkhwa, kuti ndizo babe zwilengwe. Thumo ngalibhayane ne babhayani bayo, kuti ndizo babulawe!

³⁷Thumo ngalibhayane ne mbizi nenge koloyi dzayo dze mbizi, ngalibhayane ne be njudzi dzipoga pakati kwayo, kuti ndizo basale benga bakadzi, Thumo ngalibhayane ne thundu yayo, kuti ndizo itogwe.

³⁸Kuwomelela kube mu vula dzidze, kuti ndizo dzipkhwe! Ngoti i shango ye zwifano, banoshanganyiwa misholo ne midzimu yakabezhiwa.

³⁹“Ndizo phuka dze shango ne phele dzowogala ko, fukumudzi dzowogala muili, Akutjowofa kwabe ne nthu nge kusingapele, tjizekugwana kuyenda ku tjizekugwana akuna unowogala ko.

⁴⁰Kowonga tjibaka Ndzimu pawakakolomola Sodoma ne Gomora, kose nenge mizi mikulu yakabe yakabapoteleka,” koleba Yahwe.

⁴¹“Bonani, bathu banodwa ku bunandzwa, itjaba tjikulu na bomambo banjinji, badzongeka mikumbulo kudwa ku phelelo dze shango.

⁴²Bamile zubuyanana nge matati ne makanu, bakasima mimoyo abana ngoni. Nsindo wabo unonga kusuma kwe gungwa, bakatatha mbizi, banozha se balume bakazwilulwamisila ngwa, kubhayana nawe, iwe nkololokadzi we Bhabhiloni!

⁴³Mambo we Bhabhiloni wahwa mbiko ngekwabo, ngono watemeka mafupa, kupaluka moyo kwan'kulila, zogwadza zwinonga zwe nkadzi ali mu zwibhayo zwe kutshibama.

⁴⁴“Bonani koga se shumba idwa mu ishaka tje Jorodani, izha kuwobhata pkhwizi mu danga lakasima, ndowotata Bhabhiloni mu shango yayo tjinyolotjo. Ndiani wakashalugwa wandingabigila ikoku kene? Ndiani unonga imi kakale ndiani ungalingisana nami kene? Nlisi ndiani ungama kalingisana nami kene?

⁴⁵Ndizo ke ihwani Yahwe tjabalongolosela Bhabhiloni, tjabaalakana kutjithamila shango ye Bakhaladiya, Zwitjetjana zwe mbudzi ne pkhwizi zowotogwa, unowothukudza mafulo abo ngekwabo.

⁴⁶Nge nsindo wekuwa kwe Bhabhiloni shango inowotetema, tjililo tjayo tjowohwika pakati kwe zwitjaba.”