Read Kalanga Jeremiya 6 Bible Online

Jeremiya 6 - Kalanga bible

Jeremiya 6

¹Tizhani imwi bathu be Bhenjamini! Tizhani mu Jerusalema! Lidzani lunyanga mu Tekowa, milidzani tjilakidzo ku Bhetehakeremu, ngoti mbatsha dzakaangama kudwa ku bunandzwa, ne golomodzo gulu.

²Ndowokolomola nkololokadzi we Ziyoni iye wakanaka unozwida.

³Balisi ne ngubi dzabo banowon'nginilila, banowobaka mishasha yabo kumpoteleka, mmwe ne mmwe unowofudzila mu magalo awe.

⁴“Lulwamisani ngwa kubhayana naye, ngati n'nginilileni zhuba lili pa thongomana!” “Yee mme wee! Tapalala ngoti zhuba lotjimila, mitutshi ye matewuko yotjikula.”

⁵“Milikani, ngatibanginilileni busiku, tikolomole ng'umba dzidze dze bushe!”

⁶Ngoti Yahwe Masimbawose bakati, “Temani miti yayo, mubake matathilo nge vu kupoteleka Jerusalema. Ndiwo nzi nkulu wakafanila lobgwa shamu, akuna tjimwe kuzhe kwe kutshambilidza koga muuli.

⁷Koga se tshime libhata vula yalo mbuyanana, ndizo unozwibigila vula mbuyanana mu bubi gugwe. Ngwa ne golomodzo zohwika muuli, bugwele ne mabanga zogala zwili mbeli kwangu.

⁸Tjenjela iwe Jerusalema, kuyita kuti ndisitongodwa ndikufupatila, ndikadwa ndikuthama kuti uthukudzike, ube shango isina bagali.”

⁹Yahwe Masimbawose bakati, “Kubunganyani limbelimbe le Iziraela kwazo se zhambi, se ntjeli we zhambi yisani maboko enyu ku thabi dzawo.”

¹⁰Ndiani wandakafanila lebeleka naye kuti ndintjejedze, iye ungateedza kene? Bona zebe dzabo dzakazhaligwa kuti basiteedze, bona, dama la Yahwe ntukano kubali, abatobona shatho mu lili.

¹¹Ndizo ndizhele bushongola gwa Yahwe, ndonyala nge kulibhatilila. “Gutebulilani pezhugwi kwe bana mu dzizila, na pezhugwi kwe makubungano wose e bazhuzha, balume ne bakadzi banowobe mugulibo, kose ne bawola ne sholotjena.

¹²Ng'umba dzabo dzowokobegwa bamwe, kose ne minda dzabo kose ne bakadzi babo, ngoti ndowotambunudza luboko gwangu, aloba bagali be shango,” kojalo Yahwe.

¹³“Kudwa mu ntukununu kunoti nkulukulu, mmwe ne mmwe uzhele bugovu gwe kushaba nge kusakalulwama, kudwa mu nlebesambeli kunoti ku mpirisiti, mmwe ne mmwe unothama bupitipiti.

¹⁴Bakapodza mabanga e bathu bangu kutukununu, beti, ‘Kunyalala, kunyalala,’ koga akuna kunyalala.

¹⁵Apa bakabe bana shoni abethama zwinoshimisa kene? Aa, bose koga abana shoni, abatolobgwa ne hana. Ndizo banowofabo koga sa ibabo bakafa, nge tjibaka tjandinobe ndibaloba shamu, banowolobesiwa,” kojalo Yahwe.

¹⁶Ngoti Yahwe bakati, “Imani hwunde ye zila mubone, ngono bhuzwisisani ngekwe zila hwulukugwi, iko kuna zila yakalulwama kwayiko, ngono muyende muili, muwane kunyaluluka kwe meya dzenyu. Koga banoti, ‘Atingayende muili.’

¹⁷Ndakamubigila balindi kumutjengeta nditi, ‘Bhulutanani kulila kwe lunyanga!’ Koga banoti, ‘Atingabhulutane.’

¹⁸Ndizo ke teedzani, imwi zwitjaba, zibani imwi gubungano kuti banowoshingikaligwa ngeni.

¹⁹Teedzani imwi shango, bonani, ndozhisa bubi mu bathu ibaba, igo ntjelo we mikumbulo yabo, ngoti abazobhulutana matama abo, koga ngekwe nlayo wangu, bakaulasha.

²⁰Apa ndoshathila motsha unodwa ku Sheba, kene pkhwe dzinodwa ku shango dzikule kene? Zwibhayilo zwenyu zwinopisiwa hazwitoamutjilika, ne zwipo zwenyu azwitondishathisa.

²¹Ndizo Yahwe bakati, ‘Bonani ndobiga mbeli kwe bathu ibaba, bgwe linokutha linowobakutha, botate kose ne bakololo, mbakidzani ne nkwinya banowoloba.’ ”

²²Yahwe bakati, “Bonani, bathu baswika kudwa ku shango ye bunandzwa, shango hwulu inodzonga kudwa phelelo dze shango.

²³Bakazwilulwamisa ne matati ne misebe, bakasima mimoyo kakale abana ngoni, nsindo wabo unonga wekuwona kwe gungwa, banotatha mbizi, bakalongoloka se balume banoyenda ku ngwa kuwokunginilila iwe nkololokadzi we Ziyoni!”

²⁴Takahwa mbiko ngekwako, tikatemeka mafupa tisina simba, zogwadza zwakati ambadza, zogwadza zwinonga nkadzi ali mu zwibhayo.

²⁵Musibhudile kuzhe ku minda, kene kuyenda mu dzizila, ngoti tjita tjina thumo, lutjo gumu mabizho wose.

²⁶Iwe nkololokadzi we bathu bangu, ambala zwiambalo zwe saka, ubumbuluke mu nlota, ulile se unolilila nkololo uwo uyega, tjililo tjinogwadza, ngoti tjinyolotjo nkolomodzi unodwa ezha mutili.

²⁷“Ndakakuthama nliki we phangula ne bathu bangu, kuti ndizo ulingisise kakale ulike zila dzabo.

²⁸Bose koga zwikomba zwe bapanduki, bakanoyenda yenda beleba bung'wa, bakasima se phangula kene butale, bose koga banotjinya.

²⁹Vutho lothuta kwazo, ntodo unojiwa nge moto, kukuyunga kwakadwilila suli, ngoti babi abatosukika.

³⁰Bo tjidang'wa siliva yakalashiwa, ngoti Yahwe bakabalasha.”