Read Kalanga Jeremiya 7 Bible Online

Jeremiya 7 - Kalanga bible

Jeremiya 7

¹Dama lakazha kuna Jeremiya lidwa kuna Yahwe liti,

²“Ima pa nkoba we ng'umba ya Yahwe ngono ulebe dama ileli uti, ‘Ihwani dama la Yahwe imwi mose balume be Juda banongina nge mikoba iyeyi kunamata Yahwe.

³Yahwe Masimbawose Ndzimu we Iziraela bakati, “Lulwamisani zila dzenyu ne zwiyito zwenyu ngono ndowomuletja mukagala mu bugalo igogu.”

⁴Musigalebgwe matama iyawa anotjebela anoti, “Iyeyi i Ng'umba ya Yahwe, Ng'umba ya Yahwe, Ng'umba ya Yahwe.”

⁵“‘Ngoti nge malebeswa ha mungalulwamisa zila dzenyu ne zwiyito zwenyu, nge malebeswa ha muthamila bamwe ndulamo,

⁶ha musinga tshambilidze bataya ne siyang'wa kene tjilikadzi kene mutebula lopa lisina nlandu mu bugalo igugo kakale ha musingatobele midzimu ipoga kuzwikubadza,

⁷ipapo ndowomuletja mukagala mu bugalo igogu mu shango yandakapa ntolo bobatategulu benyu ne kusingapele kose.

⁸“‘Bonani, mogalilabgwe matama e butjebeli suli.

⁹Apa munga kwiba ne kubulaya ne kuthama bupongwe ne kutuna manyepkhwa ne kupisila Bhaale motsha ne kutobela midzimu ipoga yamusakatongo ziba,

¹⁰mube muti mungazha muma mbeli kwangu mu ng'umba iyeyi inodang'wa nge zina langu muti, “Takatjidziwa!” Koga mudwilila muthama zwithu izwezwi zwinoshimisa kene?

¹¹Apa ng'umba iyeyi iyo inodang'wa nge zina langu yatjibe guwu le batoleli mu mesho enyu kene? Bonani, imi ne kwangu ndakakubona ikoku, kojalo Yahwe.

¹²Yenda ngwenu ku bugalo gwangu gwakabe guli ku Shilo, iko kwandakathama kuti zina langu ligaleko kutanga, ngono ubone kuti ndakaguthama tjini ngekwe bubi gwe bathu bangu Baiziraela.

¹³Ngono ngwenu ngekuti mathama zwithu izwezwi zose, kojalo Yahwe, nenguba ndakalebeleka namwi ndiphaphulula amuzoteedza, ndakati ndimudana amuzodabila,

¹⁴ndizoke ndowothamila ng'umba inodang'wa nge zina langu, iyo yamunogalabgwe, bugalo igo gwandakamupa na bobatategulu benyu tjandakathama ne Shilo.

¹⁵Ngono ndowomudusa mbeli kwangu sekwa ndakadusa hama dzenyu dzose izo zwizekugwana zwa Ifureimi.

¹⁶“‘Koga iwe Jeremiya, usitembezelele bathu ibaba kene kumilidzila tjililo kene ntembezelo nge kwabo, usibakumbilile kundili ngoti anditokuteedza.

¹⁷Unobona kuti banothamani mu mizi mikulu ye Juda ne mu dzizila dze Jerusalema kene?

¹⁸Bana banoshaka hwuni, botate bakabhatidza moto, bomme banovanga bgwisa gwe tjiwunga kuthama makhekhe a shekadzi we kudzimu, banodusila midzimu ipoga tjipo tje tjing'o kunditanga kuti ndigwadze moyo.

¹⁹Apa ndimi wabanotanga kene? Kojalo Yahwe. Apa abatozwithamila kuzwibhatisa shoni kene?

²⁰Ndizoke, kojalo She Yahwe, bonani, kugwadzamoyo kwangu ne bushongola gwangu zowotebukila mu bugalo igugo, pezhugwi kwe bathu ne ng'ombe, pezhugwi kwe miti ye shango ne mitjelo ye minda, zowopisa ngono akuna ungazwidzima.’”

²¹Yahwe Masimbawose Ndzimu we Iziraela bakati, “Shanganyani zwibhayilo zwenyu zwinopisiwa ne zwipo muje nyama.

²²Ngoti mu zhuba landakabadusa mu shango ye Egipiti, andizolebeleka tjimwe na botate benyu kene kubalaya ngekwe zwibhayilo zwinopisiwa ne zwipo.

²³Koga ndaulo yandakabapa ndakati, ‘Bhulutanani hwi langu ngono ndowobe Ndzimu wenyu imwi mowobe bathu bangu, yendani mu zila yandinomudwa, kuti ndizo kumululwamile.’

²⁴Koga abazoteedza kene kubhulutana koga bakatobela zwikumbuludzo zwabo ne bukomba gwabo gwe mimoyo mibiibi, bakayenda ne tjashule pana kuyendila mbeli.

²⁵Kudwa mu zhuba la botate benyu labakabhuda mu shango ye Egipiti kunoti nasi, ndakatumila balanda bangu balebesambeli ndipaphulula ku bali zhuba ne zhuba,

²⁶ne kwakajalo abazonditeedza kene kundibhulutana koga bakawomeledza mitshibha yabo. Bakathama kunonyanya kupinda botate babo.

²⁷“Ndizo wakafanila leba matama iyawa wose ku bali, koga abatowokuteedza. Unowobadana ngono abatowokudabila.

²⁸Unobadwa uti, ‘Igogu ludzi gusakatongo teedza hwi la Yahwe Ndzimu wabo, gwakalamba tjemegwa. Lebeswa lakapela, lakafuluka mu milomo yabo.

²⁹“ ‘Teselani mavudzi enyu mualashile kutjena shobani lumbo gwe tjililo mu matombo akathukudzika, ngoti Yahwe balasha bakafupatila tjizekugwana tje bushongola gwabo.’

³⁰“Ngoti bakololo be Juda bakathama bubi mu mesho angu, kojalo Yahwe, bakabiga zwithu zwabo zwinoshimisa mu ng'umba inodang'wa nge zina langu kuitemapadza.

³¹Bakabaka bugalo gwakatuthumala gwe Tofeti gumu nkuku we Hinomu kupisa bakololo babo ne bakololokadzi babo nge moto tjithu tjandisakabadwa kuti batjithame kene tjakatongobe mu nkumbulo wangu.

³²Ndizoke, bonani, mazhuba aswika kojalo Yahwe, pagunowobe gusingatjadang'we Tofeti kene nkuku we nkololo wa Hinomu koga gowodang'wa nkuku we Kubhaya, ngoti banobiganya bafi mu Tofeti kuswikilila kusheteka pa bangababiganya.

³³Zwitumbu zwe bathu ibaba zowobe zojiwa zwe nyuni dze phepo ne zwibandana zwe shango ngono akuna unowozwipalusa moyo.

³⁴Ndowozhisa bhelelo ku misindo ye kushatha ne mipululu ne ku mahwi e nlongo ne nloboli mu mizi ye Juda ne mu dzizila dze Jerusalema ngoti shango inowothukudzika.