Read Kalanga Jeremiya 8 Bible Online

Jeremiya 8 - Kalanga bible

Jeremiya 8

¹“Mu tjibaka tjetjo, koleba Yahwe, mafupa a bomambo be Juda ne mafupa e makulukota abo ne mafupa e bapirisiti ne mafupa e balebesambeli ne mafupa e bagali be Jerusalema anowodusiwa mu zwikumbu zwabo,

²ngono anowopaladziwa mu zhuba ne mwedzi ne mu zwedza zose zwe zhuzhugwi izo zwabakada ne kuzwishingila, izo zwabakatobela izo zwabashaka bakazwinamata. Abatowokubunganyiwa kene kubiganyiwa, banowosala benga nthudze mu nnda.

³Koga malimbelimbe anowobe asala ebe lutshinga igogu gu biibi banowoyemula lufu pa butjilo mu magalo wose andinowobe ndabatatila ku ali, kojalo Yahwe Masimbawose.

⁴“Ubadwe uti, Yahwe bakati, Apa bathu ha bewa abatomuka kene? Ha mmwe epambuka mu zila, apa atoshanduka kene?

⁵Ini ngono bathu ibaba bakapambuka? Ini bakadwilila ngopambukila mbeli kene? Bakabhatilila mu butjebeli, banolamba kushanduka.

⁶Ndakateedza kwazo, koga akuna tjabanoleba tjakalulwama. Akuna unoshandukila bubi gugwe eti, ‘Ndakathamani?’ Mmwe ne mmwe unodwilila nge zila iye se mbizi yakashingayilila kugwa.

⁷Ne hanganlobe dumbu ye zhuzhugwi inoziba tjibaka tjayo ne njiba ne nyenganyenga ne twiyitwiyi dzotjengeta tjibaka tjadzo, koga bathu bangu abatoziba nlayo wa Yahwe.

⁸“Ini mungati, ‘Takatjenjela, ne nlayo wa Yahwe tinawo’? Koga bonani pena ye manyepkhwa ye bakwali yakuthama manyepkhwa.

⁹Balume bakatjenjela banowobhatisiwa shoni, banowotemeka mafupa bakatogwa, ngoti bakalasha dama la Yahwe, ngono bana butjenjedu gupi mu bali?

¹⁰Ndizo ndowokobela bakadzi babo bamwe balume, ne minda dzabo bobatetshi batshwa, ngoti kudwa ku ntukunu kunoti ku nkulukulu mmwe ne mmwe i govu le kuzwiwanigwa tjisakalulwama, kudwa mu nlebesambeli kunoti ku mpirisiti, mmwe ne mmwe unothama butjebeli.

¹¹Bakabangayidza kupodza mabanga e bathu bangu, beti, ‘Kunyalala, kunyalala,’ koga kunyalala kusipo.

¹²Apa bakabe bebhakhwa nge shoni abethama zwinoshimisa? Aa, bakabe basina shoni ndodwa, bakabe basina hanya. Ndizoke banowowa ne banowa, andibaloba shamu, banowoligwa, koleba Yahwe.

¹³“Ndowokubunganya, koleba Yahwe, akutobe ne zhambi mu mizhambi, kene kukabe ne phaya mu mipaya, kose ne mazhani anowobuna, tjandakabe ndabapa banowotjitolegwa.”

¹⁴Ini tiligele takadzikama kene? Kubunganani, ngati tizhileni ku mizi ye matizhilo tinofila ko ngoti Yahwe Ndzimu wedu babhayana naswi kutilobesa, batipa vula inobulaya kuti ting'we, ngoti takatjinyila Yahwe.

¹⁵Takashaka kunyalala ngono akuna tjibuya tjakazha, nge tjibaka tjekupodza bonani, kwazha zogwadza.

¹⁶Bundula kwe mbizi dzabo kohwika kudwa mu Dani, nsindo we kulilila kwe mbizi ndume, shango yose inotetema. Dzazha kuwoja shango ne tjimwe ne tjimwe tjimuili, nzi nkulu nabose banogala muuli.

¹⁷Ngoti bonani, ndotumila nyoka pakati kwenyu, thumbi dzisina ungadziangulanya, ngono dzowomuluma, Koleba Yahwe.

¹⁸Buyendasi gwangu gukule ne kunyaladzika, moyo wangu unotimbama.

¹⁹Teedzani tjililo tje bathu bangu, kudwa ku shango ikulekule: “Apa Yahwe abate bali mu Ziyoni kene, apa Mambo wayo ate ali muili kene?” “Ini bakanditanga kuti ndizhale bushongola ngekwe midzimu yabo yakabezhiwa ne midzimu yabo ipoga kene?”

²⁰“Kuvuna kwapinda, tjilimo tjapela, ngono atizotjidziwa.”

²¹Ngoti mabanga e nkololokadzi we bathu bangu, buyendasi gwangu, ndolila, temeka mafupa kwakandiambala.

²²Apa akuna nti mu Giliyadi kene? Apa akuna ng'anga ko kene? Ngono ini mamuko e nkololokadzi we bathu, asathu kapodziwa kene?