Read Kalanga Jeremiya 9 Bible Online

Jeremiya 9 - Kalanga bible

Jeremiya 9

¹Ungati nsholo wangu ungabe uli vula, ne mesho angu ali nsenya we mishodzi! Ndabe ndowolila siku ne sikati, ngekwe kubulawa kwe nkololokadzi we bathu bangu!

²Ungati mu tjilambanyika ndingabe ndina ng'umba ye bezi, kuti ndisiye bathu bangu, ndiyende kule nabo, ngoti bose ba phombgwe, i goko le bathu be batjebeli.

³Banolulwamisa malimi abo se matati kuleba manyepkhwa abatokunda nge lebeswa mu shango, ngoti banodwa pa bubi benoti ku gumwe, abatondiziba, koleba Yahwe.

⁴Ibeni nge njele nge bazwalani benyu, musigalebgwe hama dzenyu, ngoti hama imwe ne imwe i bhitipiti, ne nzwalani mmwe ne mmwe ntjebeli.

⁵Nzwalani unotjebela nzwalani uwe, akuna unoleba lebeswa, bakadiya ndimi dzabo kuleba manyepkhwa, banozwinyadza ngotjinya.

⁶Bugalo gugo gupakati kwe bupitipiti, mu bupitipiti gwenyu molamba kundiziba, koleba Yahwe.

⁷Ndizo wali, koleba Yahwe Masimbawose bakati, “Bonani, ndowobakuyunga ha balika, ngoti ini kakale tjandingathama ngekwe bathu bangu?

⁸Malimi abo misebe yakabangalala, anoleba butjebeli, Mmwe ne mmwe unoleba mbakiso nge mmwe naye, koga mu moyo uwe enlukila gwanga.

⁹Apa ndisibalobele shamu ikoku kene?” Kojalo Yahwe. “Apa ndisibgwilizile ikoku, mu itjaba tjinonga itjetji kene?”

¹⁰“Ndowolilila matombo abe mu buyendasi nge kwawo, ndimba lumbo gwe tjililo ngekwe mafulilo e tjilambanyika, ngoti akathukudziwa kuti kushete waapalama, ne kulila kwe ng'ombe akutjahwika. Nyuni dze zhuzhugwi ne phuka dzakatizha dzakayenda.

¹¹Ndowothama Jerusalema duluthulu le matongo, bugalo gwe phungubgwe, ndowothama mizi mikulu ye Juda kuti ithukudzike, kushaye bagali muili.”

¹²Nthu wakatjenjela unohwisisa izwezwi ndiani? Ndiyani wakati nlomo wa Yahwe ukalebeleka naye, kuzibisa kuti ndinge kutini shango yakalashika kakale yakatjinyika se tjilambanyika kwainopelela kusina ungaipalama kene?

¹³Yahwe bakati, “Ndi ngekuti bakalasha nlayo wangu wandakabiga mbeli kwabo, bakasindihwilile kene kutobela nlayo wangu.

¹⁴Koga bakatobela bukomba gwe mimoyo yabo, bakatobela bo Bhaale sa bobatategulu babo bakabadiya.

¹⁵Ndizo wali, koleba Yahwe Masimbawose Ndzimu we Iziraela beti, Bonani, ndowojisa bathu ibaba zojiwa zwinobaba abapa vula ina nti unobulaya kuti baing'we.

¹⁶Ndowobapaladza nge zwitjaba zwisakati zwilipo zwikazibgwa ndi bobatategulu babo, ndowobatatamila nge thumo kudzina ndabalobesa.”

¹⁷Yahwe Masimbawose bakati, “Yelani njele, danani bakadzi be tjililo kuti bazhe, tumilani nyambi dze bakadzi kuti dzizhe,

¹⁸tjinyolotjo ngabazhe bashobe lumbo gwe tjililo nge kwedu, kuti ndizo mesho edu awunge mishodzi, ne hwope dzedu dzibe misenya ye vula.

¹⁹Ngoti nsindo we tjililo unohwika mu Ziyoni uti, ‘Takakolomogwa seni! Tobhakhwa ne shoni hwulu seni, ngoti takasiya shango yedu, ngoti bakaliga magalo edu.’ ”

²⁰Imwi bakadzi, hwililani dama la Yahwe, zebe dzenyu ngadziamutjile dama le nlomo uwe, diyani bakololokadzi benyu koshoba lumbo gwe tjililo, diyanani lumbo gwe tjililo.

²¹Ngoti lufu gwangina ne mafesitere edu, gwangina mu ng'umba dzedu dze bumambo, kubulaya bana mu dzizila, ne bazhuzha mu mashanganilo.

²²Lebeleka uti, “Yahwe bakati, ‘Zwitumbu zwe bathu zowoandama pasi, se ndobe yakaandama mu shango, se mashanga shule kwe nvuni avuna, akuna ungazwikubunganya.’ ”

²³Yahwe bakati, “Ntjenjedu ngaasizwikudze nge butjenjedu gugwe, kene nlume wakasima kazwikudza ngosima kukwe, kene nlume wakafuma kazwikudza nge fumwa iye,

²⁴koga unozwikudza ngaazwikudze na yetji, kuti unondihwisisa kakale undiziba, kuti ndimi Yahwe, imi ndinothama mahwilongoni, ne kutambunuka ne ndulamo mu shango, ngoti ikoku ndokushathila,” koleba Yahwe.

²⁵“Bonani misi yaswika koleba Yahwe, kunowoti aloba shamu bose ibabo bakathumbigwa ne basakathumbigwa,

²⁶bo Egipiti ne Juda ne Edomu ne Amoni ne Moabu na bose banogala mu tjilambanyika ku magalo akule banothubula theswi dze mavudzi. Ngoti zwitjaba zose izwezo ne Baiziraela bose bana mimoyo isakathumba.”