Read Kalanga Zwililo 2 Bible Online

Zwililo 2 - Kalanga bible

Zwililo 2

¹She bafukidza nkololokadzi we Ziyoni nge gole le kugwadzamoyo kwabo kungapani kene! Kudwa kudzimu bakalashila pasi tjedza tje Iziraela mu shango, abazokumbula tjigalo tje makumbo abo mu zhuba le kugwadzamoyo kwabo.

²She bakakolomola basina ngoni magalo wose a Jakubo, mu bushongola gwabo bapkhwanyila pasi matizhilo e nkololokadzi we Juda, baligila pasi mu mavu mibuso yayo ne makulukota ayo kunobhatisa shoni.

³Mu kugwadzamoyo kukulu balobesa babhayani bakasima be Iziraela. Bakabgwiliza shule luboko gwabo gwe luji mukuswika kwe zwita zwabo, bakathuta se bhuba le moto kuna Jakubo kupisa tjimwe ne tjimwe tjakaupoteleka.

⁴Bakalulwamisa dati labo se tjita luboko gwabo gwe luji gwakazwilulwamisila kuposa. Se tjita bakabulaya mmwe ne mmwe ne bazhuzha bakasima dumbu, bakatebulila bushongola gwabo gunonga moto mu nshasha we nkololokadzi we Ziyoni.

⁵She botjinga tjita, bakolomola Iziraela. Bakolomola ng'umba dzayo dzose dze bumambo, matizhilo ayo asala ali matongo, Bawatsha buyendasi ne tjililo zwe nkololokadzi we Juda.

⁶Bakolomola nshasha wabo se nnda we mizhambi, bugalo gwe bushanganilo gwe mizano yakabigwa gwakasala guli dongo. Yahwe bazhisa bhelelo ku Ziyoni ngekwe mizano yayo yakabigwa na bo Sabata bayo, ngono mukugwadzika kwabo kukulu bafupatila mambo ne mpirisiti.

⁷She bakafupatila tjibeso tjinopisigwa zwibhayilo tjabo, bakalamba bugalo gwabo gwakayengemala. Bakalonga mu maboko e tjita makuma e ng'umba dzayo dza bomambo, nsindo ukahwika mu Ng'umba ya Yahwe se zhuba le nzano wakabigwa.

⁸Yahwe bakazwimisila kusiya ali matongo makuma e nkololokadzi we Ziyoni, bakaitjwaya nge nsungo abazodziba luboko gwabo mukukolomola, bakathama makuma anotathila ne makuma kuti zwibe mu tjililo, zolilidzana!

⁹Mikoba yayo ilele pasi, bakapkhwanya bakavuna makwasayile ayo. Mambo wayo ne makulukota ayo apakati kwe zwitjaba, akuna nlayo, balebesambeli bayo abatowana mbono inodwa kuna Yahwe.

¹⁰Sholo tjena dze nkololokadzi we Ziyoni dzigele pasi dzakati hwuu, dzakazwilonga hwuluba mu misholo yadzo dzakaambala jila le saka,[1] baanadi be Jerusalema bakatshinatila misholo yabo pasi.

¹¹Mesho angu ashakadziwa ngolila, ndakadzipikana mukati kwangu, Moyo wangu unolashigwa pasi ngekwe golomodzo le bathu basingake bakazwiyita tjimwe, bana ne ngawana banotimbama ku mabala e matengeselo e nzi nkulu.

¹²Banolilila bomayi beti, “Tjiwunga ne nkumbi we zhambi zwingayi?” Betimbama se nlume wakakubala mu dzizila dze nzi nkulu, se matjilo abo etebugwa mu maboko a bommeyabo.

¹³Ndingaleba nditini nge kuko wali? Ndingakufanidzanya ngeni wali iwe nkololokadzi we Jerusalema? Ndingati unofanana neni wali kuti ndikunyaladze kene iwe mwanadi, nkololokadzi we Ziyoni? Ngoti kolomogwa kuko kukulu se gungwa, apa ndiani ungakubgwiliza mu tjimo tjekutanga wali?

¹⁴Balebesambeli babo bakabonelambeli nge kuko mbono dze manyepkhwa ne butjebeli, abazodusila jinyo lilo patjena, kubgwiliza kubhudilila kuko. Koga matama abakakubudza manyepkhwa kakale anolasha.

¹⁵Bose banopinda ne zila banokulobela phande bekulinga ngokaabala kakale bezunguzila misholo yabo nkolololokadzi we Jerusalema: “Apa ndiwo nzi nkulu wakabe udang'wa, bubuya gwakapelela, ne kushatha kwe shango yose kene?”

¹⁶Zwita zwizo zose zokugongobola, zokulinga zwilobanya meno azo zwiti, “Tankolomola! Ileli ndilo zhuba latagala takalindila taliwana, talibona!”

¹⁷Yahwe bakathama tjabakabe balongolosa kutjithama, bashingikadza dama labo labakaleba kale ntolo. Bakupitulila kutjena basina ngoni, bakathama kuti zwita zwishathe mukukolomoka kuko, bakakudza simba le zwita zwizo.

¹⁸Lilila kuna She iwe nkololokadzi we Ziyoni. Mishodzi yenyu ngaiwunge se gwizi siku ne sikati, usinyaluluke, usiyite kuti mishodzi iyo ime.

¹⁹Milika, longa guwo busiku ha balindi be busiku betangisa, tebulila zwipa moyo uwo se vula mbeli kwa She! Milidzila maboko awo ku bali, ngekwe matjilo e bana babo, ibo bakanengetela nge zhala, pakati kwe zila imwe ne imwe.

²⁰Lingani imwi Yahwe mubone! Apa ndiani wamakatongo bhata saikoku kene? Apa bakadzi baje bana babo kene? Ibo bana babanotjengeta kene? Apa bapirisiti ne balebesambeli babulawe mu bugalo gwakayengemala gwa She kene?

²¹Mu hwuluba ye dzizila kulele bahwola ne batjetjana, baanadi bangu ne bazhuzha bangu bakabulawa nge thumo, mu zhuba le kugwadzamoyo kwenyu makababulaya, mubabhaya musina ngoni.

²²“Se ungati makabadanila zhuba le nzano wakabigwa kutja kwangu ku mu mbizho dzose kakale mu zhuba le kugwadzamoyo kwa Yahwe akuna ungasiya kene katjila, ibabo bandakabe ndida kakale ndakabalela, tjita tjangu tjabalobesa.”