Read Kalanga Zwililo 3 Bible Online

Zwililo 3 - Kalanga bible

Zwililo 3

¹Imi ndimi nthu wakabona kudziyidzika, mu shamu ye bushongola gwabo,

²Bakandikweba bakandiyisa ku lima lisina tjedza,

³nge malebeswa banomilidza luboko gwabo bendiloba be paphulula kanjinji zhuba lose.

⁴Bakathama kuti nyama yangu ne ganda langu zwishakale, mafupa angu bakaavuna vuna.

⁵Bakandikomba bakandipoteleka nge bushungu ne mang'oni.

⁶Bakathama kuti ndigale mu zhalima se nfi wa ntolo.

⁷Bakandibakilila nge bhakasa kuti ndizo ndisitongo siya bakalonga ketani dzinolema mundili.

⁸Nenguba ndidana ndikumbila bhatsho, abatoteedza ntembezelo wangu,

⁹bakazhalila zila dzangu nge mabgwe akabezhiwa, bakathama kuti zila dzangu dzikombame.

¹⁰Se bhira yakalalila bakandisala shule se shumba imu zwimba,

¹¹bakandidzibilidza mu zila dzangu, bakandipalula abe zwitibhu tibhu bakandisiya ndili mu zhuba.

¹²Bakapeta dati labo bakalingisana nami, bakathama kuti ndibe unoposiwa nge misebe yabo.

¹³Bakabhaya moyo wangu nge misebe ye gobhodo labo.

¹⁴Ndatjibe tjiseko ku bathu bose, kundidadila kwabo kwatjibe lumbo gwe zhuba lose.

¹⁵Bakandigutsha nge zwinobaba, bakanding'wisa ndulu inobaba.

¹⁶Bakathama kuti meno angu apupune mabgwana bakandivukidza mu hwuluba.

¹⁷Ndakadzibigwa mbakiso, ndakakangang'wa kuti bhudilila kodwiwani.

¹⁸Ndizo nditi, “Gudzo langu lakapela, na zose zwandakabe ndakazwilingilila kudwa kuna Yahwe.”

¹⁹Kumbulani kudziyidzika ne lungaila kwangu, ne mbabashulo ne ndulu zwinobaba.

²⁰Nkumbulo wangu unogala wakakualakana, ngono kondidzonga nkumbulo.

²¹Koga ikoku ndowokulonga mu moyo, ndizo nditjina kugalabgwe.

²²Ludo gusingazunguzike gwa Yahwe agutoma, mahwilo ngoni abo aatopela,

²³matshwa mangwanana mamwe ne mamwe, kukulu kugalikamoyo kwenyu.

²⁴Yahwe ndibo gobe langu, ndozwidwa ndiyijalo, ndizo ndowogalabgwe mu bali.

²⁵Yahwe bakalulwama kuna banogalabgwe mu bali, kuna ibabo banobashaka.

²⁶Kwakanaka kulindila nge moyonlefu jidzo la Yahwe.

²⁷Kwakanaka kuti nthu asenge jokwi atji ntjetjana.

²⁸Ngaagale ali ega akanyalala, ngoti Yahwe ndibo batilika ntolo mu nli.

²⁹Ngaavukidzile buso gugwe mu hwuluba, pamwe swiyo kungabe kutjina kugalabgwe.

³⁰Ngaape lushaya gugwe kuna unonloba, agute masapa awe.

³¹Ngobe She abangatilashile tjose.

³²Nenguba bangazhisa zogwadza, kudwapo banolakidza mahwilo zogwadza, kuyendidzana nge bukulu gwe ludo gwabo gusingazunguzike.

³³Ngoti abatoloba kene kuzhisa zogwadza mu bana be bathu nge mwaza.

³⁴Kutshamba nge makumbo basungwa bose mu shango,

³⁵kulambila nthu tjakanlingisana, mbeli kwe Upezhugwi zhugwi,

³⁶kudzibila nthu ndulamo, Yahwe abatodumana ne zwithu zwakajali!

³⁷Ndiani ungalebeleka kukashingikala, kuzhe kwe kuti She babe balaula kuti kujalo kene?

³⁸Apa ate nlomo we Upezhugwi zhugwi, unodwa zogwadza zose ne zwithu zwibuya kene?

³⁹Ini nthu unotjila angang'ongola haelobgwa shamu ye zwibi zwizwe kene?

⁴⁰Ngati shakisiseni zila dzedu kakale tidzilike, ngono tishandukile kuna Yahwe.

⁴¹Ngatizhuleni mimoyo yedu timilidzile maboko edu ku Ndzimu u kudzimu titi,

⁴²“Takatjinya tikapanduka, ngono amuzowotizwiibhatigwa.

⁴³“Makazwifukidza nge gwadzamoyo mukatitatamila mukatibulaya musina ngoni.

⁴⁴Makazwifukidza nge gole, kuti kushete ntembezelo ungaswika kumuli.

⁴⁵Makati thama tikabe shambgwa ne malala pakati kwe zwitjaba.

⁴⁶“Zwita zose zwedu zwakati zhulila milomo yazo zotituka.

⁴⁷Lutjo ne bhuzhu zwimbeli kwedu, paladziwa ne golomodzo zwakatilingisana.”

⁴⁸Misenya ye mishodzi inowunga kudwa mu mesho angu, ngoti bathu bakanyi kwangu balobesiwa.

⁴⁹“Mesho angu anowowunga mishodzi nge kusingapele, asina kunyaluluka,

⁵⁰kudzina Yahwe belinga pasi bali pezhugwi kubona tjinoshingikala.

⁵¹Zwandinobona zondizhisila buyendasi mu moyo wangu, ngekwe kudziyila kwe bakololokadzi be nzi wangu nkulu.

⁵²“Zwita zwangu zwakabe zwakandibengela suli, zwakabe zwindivima se nyuni.

⁵³Zwakagwisa kupedza butjilo gwangu nge kundilashila mu gomba, zwikandikikithidza nge mabgwe,

⁵⁴vula ikandima pa thong'omana ngono azwidwa nditi ndafa tjose.

⁵⁵“Ndakadana zina lenyu imwi Yahwe, ndili pasi pasi mu gomba.

⁵⁶Makahwa kukumbila kwangu, musizwine zebe dzenyu andililila kumuli ndikumbila bhatsho.

⁵⁷Makasedzela pandili pandakabe ndimudana, ngono makati kundili ‘Usitje!’

⁵⁸“Imwi She makatola ndebo yangu, makadzutunula butjilo gwangu.

⁵⁹Yahwe makabona kuti ndakasundigwa nlandu tjini, sumikilisani ndebo yangu.

⁶⁰Makabona kuti bakabe bali zhele kubgwilizila kungapani ne njanga dzabakandilukila.

⁶¹“Imwi Yahwe makahwa masapa azo, ne kundilukila njanga kwazo,

⁶²milomo ne mikumbulu ye zwita zwangu dzobhayana nami zhuba lose koga.

⁶³Tongobonani koga, abegala kene bema, tjabo hwundidadila koga nge njimbo dzabo.

⁶⁴“Muzwibgwilizile itjo tjakazwilingisana imwi Yahwe, kuyendidzana ne tjazwakathama.

⁶⁵Tundubadzani mimoyo yazo, bhiso lenyu liwile muzwili.

⁶⁶Muzwitatamile nge bushongola muzwilobese, mu zhuzhugwi la Yahwe.”