Read Kalanga Zwililo 4 Bible Online

Zwililo 4 - Kalanga bible

Zwililo 4

¹Golide yatundubala seni, golide mbuyanana yashanduka kwakatini! Mabgwe akayengemala atjipalala ku phelelo dze zijana.

²Bakololo babuya be Ziyoni bakabe betolegwa pezhugwi se golide, botjitogwa se hali dzakabumbiwa nge ntapkhwi, dzithamiwa nge maboko e mbumbi.

³Ne phungubgwe dumbu dzomwisa bana badzo mazhamu, koga bathu bangu bana mimoyo mikukutu, banonga phowu mu tjilambanyika.

⁴Nge nyota malimi e ngawana akanamatila bgwasha, bana banokumbila tjiwunga, koga akuna unobapa itjo.

⁵Ibabo bakabe beja zojiwa zwakatini, bo bulawa nge zhala mu dzizila. Ibabo bakakula beambala zwiambalo zwe mbala we bushaba gwakabondelela, babe gele mu zwizhalanlota.

⁶Lobgwa shamu kwe bathu bangu kukulu kupinda kwe Sodoma, iyo yakakolomogwa tjinyolotjo, kusina ne ng'ompela ungabhatsha.

⁷Bakololo be bushe bakabe bepenya kupinda kapuku bali batjena kupinda nkaka, mibili yabo ili mishaba kupinda thakwala, mavudzi abo enga safire.

⁸Koga ngwenu babe batematema se masitu, akuna unoziba kuti ndiboani mu dzizila. Ganda labo lakanamatila mafupa abo, lakawomelela se lukuni.

⁹Bakabulawa nge thumo banoyita, muna ibabo banobulawa nge zhala, ibabo banothukudzika ngoshaya zojiwa mu minda.

¹⁰Maboko e bakadzi bana mahwilo ngoni, akabhika bana babo, bakabathama zojiwa zwabo, ha bakanyi kwangu belobesiwa.

¹¹Yahwe bakazhulila bushongola gwabo, bakatebula gwadzamoyo kwabo kunopisa, bakabhatidza moto mu Ziyoni ukaja thiwa dzayo.

¹²Bomambo be shango bakasidume, nanga ibo bathu be shango, kuti zwita kene babulayi bangangina ne mikoba ye Jerusalema.

¹³Koga kwakashingikala ngekwe zwibi zwe balebesambeli bayo, ne ngekwe milandu ye bapirisiti bayo, ibo bakatebula malopa e balulwami pakati kwayo.

¹⁴Bolungayila se mapofu mu dzizila, bakatemapadziwa nge malopa, kusina iye ungakutha zwiambalo zwabo.

¹⁵Bathu banobamimilila beti, “Kutjena naswi! Makatemapala! Kutjena naswi! Kutjena naswi! Musitongotikutha!” Abetizha bebe bebe zwitendeleki ne balungaili, bathu pakati kwe zwitjaba banoti, “Abangatja gale naswi kakale!”

¹⁶Yahwe ndibo bakabapaladza, abatjina hanya. Abatokudza bapirisiti, abatoteta sholotjena.

¹⁷Mesho edu anonyala, akalingilila suli kubhatshiwa, mu thungamakole takalingilila itjaba tjisingake tjikatitjidza.

¹⁸Zwita zwedu zwakativima pamwe ne pamwe patinotshamba, kuti ndizo tisiyendayende mu dzizila dzedu. Bhelelo ledu lasendela, mazhuba edu mashomanana, ngoti bhelelo ledu latjiswika.

¹⁹Batatamili bedu banovirima kupinda madzu ku zhuzhugwi, bakatitatamila pezhugwi kwe matombo, bakatilalila mu tjilambanyika.

²⁰Meya ye bupenyu gwedu iye Nzhodziwa wa Yahwe iye wakabe ali iye kugalabgwe kwedu, bakambata nge mapuzhu abo, takabe tikumbula titi, “Kusi kwe ntutshi uwe towotjila pakati kwe zwitjaba.”

²¹Shatha upembele iwe nkololokadzi we Edomu, iwe n'gali mu shango ye Uzi, koga nawebo bhepe lowopinda pakuli, unowong'wa ukalaladza ukazwiambula zwiambalo.

²²Iwe nkololokadzi we Ziyoni, lobgwa shamu kuko kowopela, abatjokugadza mu butapiwa, koga ngekwe nlandu uwo iwe nkololokadzi we Edomu, banowokuloba shamu, banowodusila jinyo lilo pa tjena!