Read Kalanga Ezekiele 1 Bible Online

Ezekiele 1 - Kalanga bible

Ezekiele 1

¹Mu gole le bumakumi matatu, mu mwedzi we bunna, mu zhuba le bushanu le mwedzi ndili pakati kwe batapiwa pa gwizi gwe Kheba, kudzimu kwakazhuka ngono abona mbono dzinodwa ku Ndzimu.

²Mu zhuba le bushanu le mwedzi kwakabe kuli gole le bushanu la Mambo Jehoyakini ali mu butapiwa,

³dama la Yahwe lakazha ku mpirisiti Ezekiele nkololo wa Bhuzi, mu shango ye Khaladiya pa gwizi gwe Kheba. Simba la Yahwe lakabe linaye.

⁴Ndakalinga bonani, abona dutu lidwa ku bunandzwa, abona gole gulugulu lina tjedza kulipoteleka ne lupenyo gwe moto gudwa mulili ngono pakati kwe moto kuna tjinolingika se bgwe linoyi tjibilo tjinothuta.

⁵Pakati kwawo kwakabe kuna tjinolingika se zwibumbiwa zwinna zwinotjila. Ngono mbumbiko yazo ilingika seye nthu,

⁶koga tjimwe ne tjimwe tjazo tjina njiso dzili nna ne mapapilo ali manna.

⁷Makumbo azo akatambunuka, matshambo azo enga thozo dze phulu epenya se phangula ya kuyungiwa.

⁸Kusi kwe mapapilo mu mbizho nna dzazo zwakabe zwina maboko e nthu. Ngono zose bunna zwakabe zwina njiso ne mapapilo.

⁹Mapapilo azo akabe ekuthana. Tjimwe ne tjimwe tjazo tjiyenda mbeli tjakatambunuka ha zwiyenda tjisingabuyile ntome.

¹⁰Njiso dzazo dzakabe dzilingika sahwoku, Tjimwe ne tjimwe tje zwibumbiwa izwezwi zwinna tjakabe tjina buso gwe nthu, ku lubizho gwe luji tjina buso gwe shumba, ku lumeshwe tjina buso gwe ng'ombe, shule tjina buso gwe dzu.

¹¹Njiso dzazo dzakabe dzakajalo. Mapapilo azo akabe akatambunukila pezhugwi, tjimwe ne tjimwe tjina mapapilo mabili, bhapilo limwe ne limwe likutha le tjimwe tjibumbiwa ngono mapapilo mamwe mabili akazwimba mbili watjo.

¹²Tjibumbiwa tjimwe ne tjimwe tjakabe tjiyenda tjakatambunukila mbeli. Kumwe ne kumwe meya kwayakabe iyenda, zwakabe zwiyendako zwisingatendebuke ha zwiyenda.

¹³Pakati kwe zwibumbiwa izwezwi zwinotjila kwakabe kuna tjinolingika se masimbe e moto anothuta kene se mavone e yenda yeno na yeno, moto wakabe upenya lupenyo gwe vula gudwa muuli.

¹⁴Zwibumbiwa izwezwi zwinotjila zwakabe zwilabukila mbeli na shule se lupenyo gwe vula.

¹⁵Ndakati ndilinga zwibumbiwa izwezwi zwinotjila abona gumbgwana pasi pawunde ye tjibumbiwa tjimwe ne tjimwe tjinotjila, tjimwe ne tjimwe tjazo tjina njiso dzili nna.

¹⁶Ndingiko ne mbumbiko ye makumbgwana yakabe ilingika sahwoku, akabe epenya se dayimani, efanana nge mbumbiko, kuthamiwa kwawo kulingika se gumbgwana lili mu limwe gumbgwana.

¹⁷Zwakabe zwiti ha zwiyenda zwiyendila ku lubizho gumwe ne gumwe kwakalinga njiso dzazo zwisingabuyile ntome.

¹⁸Matantane azo akabe akakulila pezhugwi etjenamisa, matantane wose bunna akabe alizhele mesho pamwe ne pamwe pawo.

¹⁹Zwibumbiwa zwinotjila zwakabe zwiti ha zwiyenda, makumbgwana eyendabo akazwibapisa, ha zwibumbiwa zwimilika kudwa mu shango makumbgwana anomilikabo.

²⁰Kumwe ne kumwe meya kwayakabe iyenda, zwakabe zwiyendabo, ngono makumbgwana akabe emilika nazo ngoti meya ye zwibumbiwa zwinotjila yakabe ili mu makumbgwana.

²¹Zwibumbiwa zwakabe zwiti ha zwingayenda, makumbgwana eyendabo, ha zwingama, naiwo emabo, ha zwibumbiwa zwingamilika kudwa mu shango, naiwo emilikabo nazo, ngoti meya ye zwibumbiwa ili mu makumbgwana.

²²Pezhugwi kwe misholo ye zwibumbiwa zwinotjila kwakabe kuna tjinolingika se denga linopenya se makaa e vula lakaangila pezhugwi kwe misholo.

²³Ipapo kusi kwe denga mapapilo azo akabe akatambunudziwa e tjimwe ne tjimwe akalingisana ne e tjimwe, ngono tjimwe ne tjimwe tje zwibumbiwa tjina mamwe mapapilo mabili atjakazwimba mbili watjo ndiwo.

²⁴Ndakahwa nsindo we mapapilo azo ha zwiyenda, unga nsindo we vula njinji, unga nsindo wa Masimba Wose, kufanana ne phipiti ye ngwa. Ha zwima zoliga mapapilo azo.

²⁵Ngono kukazha hwi lidwa pezhugwi kwe denga lipezhugwi kwe misholo yazo, izo zwama zwaliga mapapilo azo.

²⁶Pezhugwi kwe denga pezhugwi kwe misholo yazo kwakabe kuna tjinolingika se tjigalo tje bushe, tjilingika se bgwe linoyi safire, pezhugwi kwe tjigalo kuligele tjinolingika se nthu.

²⁷Kutangisa pakabe pelingika se thunji dzidze kuyenda pezhugwi kwakabe kupenya se tjibilo, kunga moto kupoteleka, ngono kudwa ipapo kuyenda pasi kulingika se moto, tjedza tjinopenya tjakampoteleka.

²⁸Lupenyo gwakampoteleka gunga nlalabungu mu gole mu zhuba le vula ina. Bubuya kumpoteleka gwakabe gulingika saikoku. Iyeyi ndiyo ndingiko inofanana nge tjedza tja Yahwe. Ndakati ndiyibona awila pasi nge buso ngono ahwa hwi le mmwe elebeleka.