Read Kalanga Ezekiele 11 Bible Online

Ezekiele 11 - Kalanga bible

Ezekiele 11

¹Meya ikandimilidza ikandiyisa ku nkoba we ku bhezhuba we ng'umba ya Yahwe wakalinga ku bhezhuba. Kwakabe kuna balume bali makumi mabili ana bashanu (25) ipapo pa bunginilo gwe nkoba, pakati kwabo ndakabona Jaazaniya nkololo wa Zuri na Pelatiya nkololo wa Bhenaya batungamili be bathu.

²Yahwe bakabe beti kundili, “Nkololo we nthu, balume ibaba ndibo banolunganya jinyo bebe bepa ikumbuludzo tjakabipa mu nzi nkulu iwoyu,

³banoti, ‘Tjibaka ate tjili pejo tje kubaka ng'umba, nzi nkulu iwoyu i hali inobhika, iswi ti nyama.’

⁴Ndizo wali lebesambeli nge kwabo, lebesambeli nkololo we nthu.”

⁵Ipapo meya ya Yahwe ikadelukila mu ndili ngono ikati ku ndili, “Uti Yahwe bakati, ikoku ndiko kwamunokumbula imwi bathu be Iziraela, ndoziba zwithu zwinozha mu mikumbulo yenyu.

⁶Makabulaya bathu banjinji mu nzi iwoyu, mukazhadza zila dzawo nge zwitumbu.

⁷Ndizo wali She Yahwe bakati, zwitumbu zwamakalashila muuli ndizo nyama, nzi nkulu iwo i hali inobhika koga imwi mowodusiwa muuli.

⁸Motja thumo, ngono thumo ndilo landinowozhisa mu muli, kojalo She Yahwe.

⁹Ndowomudusa mu nzi iwoyu ngono amulonga mu maboko e bataya ngono amuloba shamu.

¹⁰Mowofa mu bulawa nge thumo, amusumikilisa pa n'gathu we Iziraela. Ngono mowoziba kuti ndimi Yahwe.

¹¹Nzi nkulu iwoyu autowobe hali inomubhika, kakale amutowobe nyama muuli, ndowomusumikilisa pa n'gathu we Iziraela.

¹²Ipapo mowoziba kuti ndimi Yahwe wamakalamba kutobela milayo iye ne milawana iye mukalamba kuilondolodza, koga makashinga kunoyendidzana ne milayo ye njudzi idzedzi dzakamupoteleka.”

¹³Kwakati ipapo nditjalebesambeli, Pelatiya nkololo wa Bhenaya kafa. Ipapo awila pasi nge buso ngono alilila pezhugwi, ati, “She Yahwe, apa mowolobesa malimbelimbe e Iziraela kene?”

¹⁴Ipapo dama la Yahwe likazha kundili likati,

¹⁵“Nkololo we nthu, hama dzidzo, ludzi gugo dumbu, ludzi gose gwe Iziraela, bose koga ndibo ibaba bakati bagali be Jerusalema bakati, ‘Bakayendila kule na Yahwe, iswi shango iyeyi takaipiwa kube yedu.’

¹⁶“Ndizo wali lebeleka uti, ‘She Yahwe bakati, nenguba ndakabatatila kule pakati kwe zwitjaba, abapaladza nge shango, koga ndakabe bugalo gwabo gwakayengemala mu shango dzabakayenda ku dzili.’

¹⁷Ndizo lebeleka uti, ‘She Yahwe bakati, ndowomukubunganya kudwa mu zwitjaba, kudwa mu shango dzamakabe mapaladzigwa kudzili ngono ndowomubgwilizila shango ye Iziraela.’

¹⁸Banowoti bebuya bakadusa muili zwamwi ne zwimwe zose zwinoshimika.

¹⁹Ndowobapa moyo nng'ompela ngono alonga mu bali meya tshwa, ndowodusa moyo wabo we bgwe mu bali ngono alonga moyo we nyama,

²⁰ndizo banowotobela milayo yangu bakaihwa ngono bakailondolodza. Ipapo banowobe bathu bangu ngono imi abe Ndzimu wabo.

²¹Koga ngekwa ibabo be moyo yakasala shule zwamwi zwabo ne zwinoshimika zwabo, ndowobasengesa mija yabo, koleba She Yahwe.”

²²Ipapo dzikherubhu dzikamilidza mapapilo adzo makumbgwana adzo ali mu hwunde yadzo, ngono tjedza tje Ndzimu we Iziraela tjili pezhugwi kwadzo.

²³Tjedza tja Yahwe tjikamilika kudwa pakati kwe nzi nkulu tjikanoma pezhugwi kwe dombo liku bhezhuba kwe nzi nkulu.

²⁴Meya ikandimilidza ikandiyisa ku Khaladiya ku batapiwa ndili mu mbono yandapiwa nge Meya ye Ndzimu. Ipapo mbono yandakabe ndabona ikandisiya.

²⁵Ngono abudza batapiwa zwithu zose Yahwe zwabandilakidza.