Read Kalanga Ezekiele 12 Bible Online

Ezekiele 12 - Kalanga bible

Ezekiele 12

¹Dama la Yahwe lakazha ku ndili liti,

²“Nkololo we nthu, ugele pakati kwe bathu be bapanduki, bana mesho kubona ndiwo koga abatobona, bana zebe kuhwa ndidzo koga abatohwa,

³nge kuti bapanduki. Ngono iwe, nkololo we nthu, sunga mitolo iyo se ntizhi ngono ukuthame masikati bakakulinga. Ube umilika mu magalo awo uyende ku mamwe magalo bekubona. Pamwe banowohwisisa nenguba bali bapanduki.

⁴Uduse mitolo iyo masikati bekubona, ili mitolo ye ntizhi. Kuti mu madekwana iwe ubhude se ntizhi bakakulinga.

⁵Pubula guma bakalinga ubhude nge buli ilelo.

⁶Upike mitolo bakakulinga uyisenge mu zhalima. Uzwimbe buso gugo kuti usitongo bona shango ngoti ndakuthama tjilakidzo mu bathu be Iziraela.”

⁷Ngono ndakathama koga sekwa ndakadwiwa. Masikati ndakadusa mitolo yangu yakasungigwa kutizha. Mu madekwana apubula guma nge maboko angu adusa mitolo yangu nge buli ilelo kwati zwititi ayipika bakalinga.

⁸Tjimuka mangwanana dama la Yahwe likazha kundili liti,

⁹“Nkololo we nthu, apa bathu ibaba be Iziraela, ludzi igogu gwe bupanduki, abazokubhuzwa beti, ‘Unothamani kene?’

¹⁰“Ubadwe uti, ‘She Yahwe bakati, Bulebesambeli igogu tjilakidzo ku mbusi we Jerusalema ne bathu bose be Iziraela bamuili.’

¹¹Ubadwe uti, ‘Ndi tjilakidzo ku muli, tjandakathama mukuli nditjo tjandinowothama mubali banowotapiwa.’

¹²Mbusi upakati kwabo unowopika mitolo iye mu mathudzi awe ebhuda eyenda kwati zwititi, unowobhuda kayenda ngono unowopubula buli mu guma kadusa mitolo iye ndilo. Unowozwimba buso gugwe kuyita kuti asitongobona shango nge mesho awe.

¹³Ndowontandila nge gwanga gwangu ngono unowobhatshigwa mu dati langu, ngono ndowonzhisa ku Bhabhiloni, shango ye Bakhaladiya, koga aatowoyibona. Unowofila ikoko.

¹⁴Bose bakampoteleka ndowobapaladza nge mbizho dzose, babhatshi babe ne babhayani babe bose, ngono ndowobatobela nge thumo.

¹⁵Ngono banowoziba kuti ndimi Yahwe, ha ndibakobanya nge njudzi ndibapaladza nge shango.

¹⁶Koga ndowoletja bashomanana babo bakaleyiwa nge thumo ne bhamba ne bugwele kuti ndizo balebe ngekwe mbipo yabo pakati kwe njudzi dzabayenda kudzili. Ipapo banowoziba kuti ndimi Yahwe.”

¹⁷Dama la Yahwe likazha kundili liti,

¹⁸“Nkololo we nthu, ija zojiwa zwizo uzhazhama, ung'we vula iyo utetema ulizhele kutja,

¹⁹ngono udwe bathu bamu shango iyeyi uti, ‘She Yahwe banolebeleka ngekwe bagali be Jerusalema mu Iziraela beti, Banowoja zojiwa zwabo balizhele kutja, bakang'wa vula yabo bakanyala moyo ngoti shango yabo inowotolegwa zose zwimuili ngekwe kumukilana kwe bagele muili.

²⁰Mizi mikulu igegwe inowothamiwa matongo ne shango inowothukudziwa. Ipapo banowoziba kuti ndimi Yahwe.’ ”

²¹Dama la Yahwe likazha kundili liti,

²²Nkololo we nthu, kusuma ikoku kwamunako mu shango ye Iziraela kodwani kwamunoti, “Mazhuba anodwilila eyenda mbeli, mbono imwe ne imwe ayitodwa tjinoshingikala”?

²³Ubadwe uti, “She Yahwe bakati, Ndowopedzisa kusuma ikoku, abatjowokushingisa kakale mu Iziraela.” Koga uti ku bali, “Mazhuba apejo ne kuzhadzisika kwe mbono imwe ne imwe kupejo.

²⁴Ngoti akutjowobe kwabe ne mbono ye manyepkhwa kene kukandila kunolasha mu bathu be Iziraela.

²⁵Koga imi Yahwe ndowoleba dama landinowoleba ngono lowozhadzisika. Akutowobe kutjanonoka, koga kowobe mu mazhuba enyu, imwi ludzi gwe bapanduki. Ndowoleba dama ndibe ndili zhadzisa. Koleba She Yahwe.”

²⁶Dama la Yahwe likazha kundili liti,

²⁷“Nkololo we nthu, bathu be Iziraela banoti, ‘Mbono yaanobona inozha shule kwe makole manjinji ambeli, unolebelambeli makole akule.’ ”

²⁸“Ndizo ubadwe uti, She Yahwe banolebeleka bakati, ‘Akuna dama langu linowononosiwa, koga dama landinoleba lowozhadzisika, kojalo She Yahwe.’ ”