Read Kalanga Ezekiele 13 Bible Online

Ezekiele 13 - Kalanga bible

Ezekiele 13

¹Dama la Yahwe likazha kundili liti,

²“Nkololo we nthu, lebesambeli ngekwe balebesambeli be Iziraela banolebesambeli, uti kunaibabo banolebesambeli beleba zwe mikumbulo yabo, ‘Ihwani dama la Yahwe!

³She Yahwe bakati, Yee mme wee Mapalala imwi balebesambeli be zwilengwe banotobela zwe meya yabo kusina tjababona!

⁴Balebesambeli babo iwe Iziraela banonga phungubgwe dzimu matongo.

⁵Amuzotongo tathila pezhugwi ku mabuli kene kululwamisa guma kuti ndizo bathu be Iziraela batubule kuzwivikilila mu ngwa mu zhuba la Yahwe.

⁶Banoleba mbono dze manyepkhwa ne kukandila kwe manyepkhwa beti, “Yahwe bakati.” Koga Yahwe basabatuma bebe bemilila kuzhadzisika kwe matama abo.

⁷Apa amuzobona mbono ye manyepkhwa pamakabe muti, “Yahwe bakati.” Nenguba imi kusina tjandaleba kene?

⁸“ ‘Ndizo wali She Yahwe bakati, Nge kuti makaleba manyepkhwa mukabona mbono dze manyepkhwa, ndobhayana namwi. Koleba She Yahwe.

⁹Ndowobulayisa maboko balebesambeli be manyepkhwa bana mbono dze manyepkhwa ne kukandila manyepkhwa, abatowobe mu nshangano we bathu bangu kene kukwalisiwa mu lukwalo gwe bathu be Iziraela. Abatowongina mu shango ye Iziraela, ipapo mowoziba kuti ndimi She Yahwe.

¹⁰Nge kuti bakatungamilila bathu bangu ntome beti, “Kunyalala.” Koga ipapa kusina kunyalala, kakale nge kuti bathu ha bebaka guma lisakasima, balebesambeli ibaba banolidzulula nge suko.

¹¹Idwa ibabo banolidzulula nge suko uti lowowa. Kowona vula njinji ina tjivulamabgwe tjikulu ne dutu gulu lowotutudza.

¹²Apa guma alitoti liwa bathu bakabhuzwa beti, “Suko ingayi yamakalidzulula nayo kene?”

¹³Ndizo wali She Yahwe bakati, Mu kugwadzamoyo kwangu ndowozhulila phepo inotutudza ina tjivulamabgwe tjina bushongola tjikolomodza.

¹⁴Ndowotshindika guma lamakadzulula nge suko, ndowoliligila pasi, kunowoti thiwa dzalo dzikasala dzili patjena. Lowoti liwa, namwibo mukaloba mukati kwalo ngono mukaziba kuti ndimi Yahwe.

¹⁵Ndizo wali ndowoshingisa bushongola gwangu kukolomodza guma na ibabo bakalidzulula nge suko. Ngono ndowoti kumuli, “Guma alitjipo kose naibabo bakalidzulula nge suko,

¹⁶balebesambeli be Iziraela bakalebesambeli ngekwe Jerusalema be bona mbono dze kunyalala muili koga kusina kunyalala. Koleba She Yahwe.” ’

¹⁷“Ngwenu nge kuko nkololo we nthu, lingisana ne bakololokadzi be bathu bakanyi kwenyu banolebesambeli ngekwe zwinodwa mu mikumbulo yabo, lebesambeli ngekwabo

¹⁸uti, She Yahwe bakati, ‘Yee mme wee mapalala imwi bakadzi banothumila zwitshweku zwe mishonga mu maboko enyu wose mube muthama zwisitilo zwe misholo yenyu zwinosiyana nge ndizanyo kuti mubhatshile bathu. Apa mowolonga butjilo gwe bathu bangu mu mbatsha imwi mu bakilila gwenyu kene?

¹⁹Makandilengudza pakati kwe bathu bangu ngekwe bhali isiingapani nenge zwikwamu zwe tjiwunga, mubulaya bathu basakafanilofa, mutjidza bathu basakafanilotjila munyepela bathu bangu banohwilila manyepkhwa.

²⁰“Ndizo wali tjinoleba She Yahwe ndietji, ‘Ndolambana ne zwitshweku zwenyu zwe miti zwamunoteya bathu ndizo se munoteya nyuni. Ngono ndowozwimwawula ndizwidusa mu maboko enyu, ndowosunungula bathu ibaba bamunoteya se nyuni.

²¹Ndowopalula zwisitilo zwenyu ndibe ndisunungula bathu bangu mu maboko enyu ngono abatowofa babhakhwa nge simba lenyu kakale. Ngono ipapo mowoziba kuti ndimi Yahwe.

²²Nge kuti makanyadzamoyo balulwami nge manyepkhwa, nenguba imi ndisakabanyadzamoyo, kakale makasimisa babi kuti basisiye zila dzabo mbiimbi kuti batjidziwe,

²³ndizo wali amutjowobona mbono dze manyepkhwa kene mukakandila. Ndowosunungula bathu bangu mu maboko enyu. Ngono ipapo mowoziba kuti ndimi Yahwe.’ ”