Read Kalanga Ezekiele 18 Bible Online

Ezekiele 18 - Kalanga bible

Ezekiele 18

¹Dama la Yahwe likazha kundili liti,

²“Apa mobe mudwani ha muleba gungulupeswa eli ngekwe shango ye Iziraela? “ ‘Botate bakaja zhambi dzinoshababa, ngono meno e bana akapuma?’

³“Nge malebeswa se nditjila, koleba She Yahwe, amutjawobgwilulula gungulupeswa ileli mu Iziraela kakale.

⁴Nge kuti mmwe ne mmwe unotjila nge wangu, tate ne nkololo, kofanana koga bose nge bangu. Nthu unotjinya ndiye unofa.

⁵“Ngatiti kuna nthu wakalulwama unotjila akatambunuka,

⁶asingaje pezhugwi kwe dombo kene kuli kuthigamila midzimu ye zwifano zwe bathu be Iziraela, asingatemapadze nkadzi we mbakidzani uwe kene kuwalilana ne nkadzi ali mu misi iye.

⁷Aatotshambilidza nthu, unobuza tjaakaadzima kagadzabgwe kutjibgwiliza. Aatotolela, koga unopa banazhala zojiwa zwizwe kaswingidza banoyenda mbujo.

⁸Aatoshaka mmwiso muna tjaaadzima nthu kene kuli kushaka mmwiso wakapindilila. Unozwidziba mu kuthama tjisiitjo kasumikilisa nge ndizandizanyo pakati kwe nthu ne nthu.

⁹Unotobela zila dzangu kalondolodza milayo yangu nge njele. Nlume iwoyu wakalulwama unowotjila.

¹⁰“Ngatiti nthu iwoyu una nkololo, we tjilalume unobulaya bathu, unothama tjimwe ne tjimwe tje zwakajalo,

¹¹nenguba tate babe basakatongo thama zwakajalo. Iye unoja zwe midzimu pezhugwi kwe dombo. Unotemapadza nkadzi we mbakidzani uwe.

¹²Unotshambilidza bashayi ne basheti. Unotolela. Aatobgwiliza tjaakaadzima. Unonamata midzimu ye zwifano. Unothama zwithu zwinoshimika.

¹³Unoadzima ebe eshaka mwiso wakapindilila. Apa nthu wakajali ungatjila kene? Ha angatjile! Nge kuti wakathama zwithu zose izwezwi zwinoshimika, nge malebeswa unowofa, ngono malopa awe anowobe pezhugwi kwe nsholo uwe.

¹⁴“Koga ngatiti nlume iwoyu una nkololo unobona zwibi izwezwi zose zwakashingwa ndi tate babe, ebe ekumbula, ngono ebe asingashinge sekwakashinga tate babe.

¹⁵Asingaje pezhugwi kwe dombo zwe midzimu, asinganamate midzimu ye bathu be Iziraela ye zwifano. Asingatemapadze nkadzi we mbakidzani uwe.

¹⁶Asina waanotshambilidza kene kuli kushaka mwiso muna tjaaadzima mmwe. Asingatolele, koga ekobana zojiwa zwizwe ne bana zhala, kakale eswingidza banoyenda mbujo.

¹⁷Ezwidziba mu kuthama tjibi asingashake mwiso muna tjaaadzima mmwe kene mmwiso wakapindilila. Elondolodza milayo yangu kakale eyenda mu zila dzangu. Aatowofa efila tjibi tja tate babe, nge malebeswa unowotjila.

¹⁸Koga tate babe banowofa befila tjibi tjabo, nge kuti bakathama tjisakalulwama, bakatolela ikamu tjabo, ngono bakashinga tjisakalulwama pakati kwe bathu bakanyi kwabo.

¹⁹“Koga mutjabhuzwa muti, ‘Ini nkololo asingakobane na tate babe nlandu wabo?’ Se nkololo akashinga tjakalulwama tjakatambunuka, kabe ne njele kulondolodza milayo yangu, nge malebeswa unowotjila.

²⁰Nthu unotjinya unowofa. Nkololo aatowobe ne gobe mu jinyo la tate babe, tate nayibobo abatowobe ne gobe mu jinyo le nkololo wabo, ndulamo ye wakalulwama inowobe iye, mbipo ye wakabipa inowobe iye.

²¹“Koga ha babiibi beshandukila zwibi zwabo zwabakathama bebe belondolodza milayo yangu yose bethama tjimu nlayo tjakalulwama, nge malebeswa banowotjila, abatowofa.

²²Akuna tjimwe tje zwibi zwaakathama tjinowokumbugwa kakale. Se ashinga zwakalulwama, unowotjila.

²³Apa ndina tjimwe tjinondishathisa mu lufu gwe mbiimbi kene? Apa anditoshathisiwa nge kubona eshandukila zila dzidze ebe etjila kene?

²⁴Koga ha nlulwami eshandukila ndulamo iye ebe ethama tjibi ngono ethama zwakabipa zwinofana ne zwinothamiwa ne mbiimbi, unowotjila kene? Akuna tjimwe tje zwithu zwaakashinga zwakalulwama tjinowokumbugwa. Ngekwe kusagalikamoyo kukwe unlandu nge zwibi zwaakathama, ngono unowofa.

²⁵“Koga ne kwakajalo imwi moti, ‘Zila ya She aizolulwama.’ Ihwani imwi bathu be Iziraela, Apa zila yangu aizolulwama kene? Apa ate dzili dzenyu zila dzisakalulwama kene?

²⁶Ha nlulwami eshandukila ndulamo iye ebe ethama tjibi unowotjifila, se akathama tjibi unowofa.

²⁷Kakale ha mbiimbi eshandukila bubi gugwe gwaakathama ebe ethama tjakalulwama tjakatambunuka unowozwitjidza.

²⁸Se ekumbula zwibi zose zwaakathama ebe ezwishandukila, nge malebeswa unowotjila, aatowofa.

²⁹Nenguba kwakajalo bathu be Iziraela bakati, ‘Zila ya She aizolulwama.’ Apa zila dzangu adzizolulwama kene imwi bathu be Iziraela? Ate dzilidzenyu kene zila dzisakalulwama?

³⁰“Ndizowali imwi bathu be Iziraela, ndowomusumikilisa, mmwe ne mmwe ndowonsumikilisa kuyendidzana nge mishingo iye.” Koleba She Yahwe. “Muzwibone nlandu mushandukile zwibi zwenyu, ipapo tjibi atjitowobe bhelelo lenyu.

³¹Lashilani kutjena namwi zwibi zwenyu zose zwamakandithamila, mu amutjile moyo ntshwa ne meya mitshwa. Mungafilani wali bathu be Iziraela?

³²Kana akuna tjinondishathisa mu lufu gwe unofa, koleba She Yahwe. Shandukani mu tjile.”