Read Kalanga Ezekiele 19 Bible Online

Ezekiele 19 - Kalanga bible

Ezekiele 19

¹“Iwe lila ulilila babusi be Iziraela

²uti, “ ‘Mme benyu bakabe bali shumbakadzi yakwako pakati kwe shumba njinji. Bakabe belala pakati kwe shumbana belela bana babo.

³Bakalela imwe ye shumbana dzabo ikabe shumba yakasima. Ikazwidiya kumwaulanya tjainobhata ngono ikaja bathu.

⁴Njudzi dzikahwa nge kwayo ngono ikabhatshigwa nge bhuzhu ladzo. Bakaikwebela ku Egipiti nge zwihweko.

⁵“ ‘Ngono mayi bakati bebona kugalabgwe kwabo kusazhadzisika ne yemula dzabo dzatjinyika, bakatola imwe ye shumbana dzabo bakaithama shumba yakasima.

⁶Ikayendayenda pakati kwe dzimwe shumba ngoti yakabe yabe shumba yakasima. Ikazwidiya kumwaulanya tjainobhata ngono ikaja bathu.

⁷Ikaliga mbako dzabo dzakasima ikakolomodza mizi yabo. Shango naibo bose bamu ili bakalobgwa nge ana ha behwa kubomba kwayo.

⁸Ipapo njudzi dzikashangana kugwa nayo, bose kudwa ku mituthu yakapoteleka. Bakaiwalila gwanga gwabo ngono ikabhakhwa mu bhuzhu labo.

⁹Bakaikweba nge zwihweko bakailonga mu zongondo, ngono bakaizhisa kuna mambo we Bhabhiloni, bakailonga mu ng'umba ye busungwa, ndizo tjibombo tjayo tjikasitjahwike kakale pezhugwi kwe matombo e Iziraela.

¹⁰“ ‘Mme benyu bakabe benga nzhambi mu nnda wenyu we zhambi wakadzwagwa pawunde ne vula wakabe uzwala mitjelo una thabi njinji ngoti una vula njinji.

¹¹Thabi dzawo dzakabe dzakasima dzakalizanila kuthama ludozo gwe bumambo. Wakabe wakakulila pezhugwi una thabi dzakalobana, uboneka nge bulefu gwawo nenge thabi dzawo njinji.

¹²Koga wakasimugwa nge bushongola bukulu ukalashigwa pasi, phepo ye kubhezhuba ikauwomesa. Mitjelo yawo ikapulugwa, thabi dzawo dzakasima dzikawoma ngono moto ukadzipisa.

¹³Ngwenu watjidzwagwa mu tjilambanyika, mushango yakawoma isina vula.

¹⁴Moto ukanyengela udwa mu gumwe gwe thabi dzawo hwulu, ngono ukapisa mitjelo yawo, akuna lutabi gwakasima gwasala muuli gwakalizanila kuthama ludozo gwe bumambo.’ “Ikoku lumbo gwe tjililo, ngakutogwe ili tjililo.”