Read Kalanga Ezekiele 2 Bible Online

Ezekiele 2 - Kalanga bible

Ezekiele 2

¹Kati kundili, “Nkololo we nthu, milika ume nge makumbo ngono ndowolebeleka nawe.”

²Ngono kati elebeleka nami, meya ikangina mu ndili ikandimisa nge makumbo ngono anhwa elebeleka nami.

³Kandidwa kati, “Nkololo we nthu, ndokutuma ku bathu be Iziraela, ku itjaba tjizhele bupanduki bakandipandukila, ibo na botate babo bakandipandukila kuswikila lino zhuba.

⁴Ludzi gwe misholo inopanda guna bukomba. Ndokutuma ku bali ngono ubadwe uti, ‘Koleba She Yahwe.’

⁵Kene banohwa kene banolamba, ngoti ba itjaba tje bupanduki, koga banowoziba kuti nlebesambeli wakatongobe pakati kwabo.

⁶Koga iwe nkololo we nthu usibatje, ne matama abo usiatje. Usitongo tja kene zwishosho ne mihwa zwili pamwe ne pamwe kukupoteleka ugala pakati kwe phani, usitongotja matama abo kakale usitemiwe mafupa nge sekwa banolinga ngoti ba itjaba tje bupanduki.

⁷Koga iwe leba matama angu ku bali behwilila kene belamba, ngoti ba itjaba tje bupanduki.

⁸Koga iwe nkololo we nthu hwilila tjandinoleba nawe, usibe mpanduki se itjaba itjetji tje bupanduki, zhula nlomo uwo uje tjandinokupa.”

⁹Ndakati ndilinga, bonani, abona tjiazha tjakatambunudzigwa ku ndili ngono mutjili kuna lukwalo gwakakwagwa.

¹⁰Kaguzhula mbeli kwangu ngono gwakabe gwakakwagwa mukati na kuzhe matama e tjililo ne e guwo ne e kuhwazogwadza.