Read Kalanga Ezekiele 20 Bible Online

Ezekiele 20 - Kalanga bible

Ezekiele 20

¹Mu gole le butendeka, mu mwedzi we bushanu mu zhuba le bugumi le mwedzi, bamwe be sholotjena dze Iziraela bakazha kubhuzwa Yahwe ngono bakagala pasi mbeli kwangu.

²Ngono dama la Yahwe likazha kundili liti,

³“Nkololo we nthu, lebeleka ne sholotjena dze Iziraela ubadwe uti, ‘Tjinolebgwa ndi She Yahwe etjetji, apa mazha kuwobhuzwa tjimwe mu ndili kene? Nge malebeswa se nditjila anditowomudumila kundibhuzwa tjimwe. Koleba She Yahwe.’

⁴“Apa ungabasumikilisa kene? Ungabasumikilisa kene nkololo we nthu? Ndizo ubalingisanye ne zwakathamiwa ndi botate babo zwinoshimika

⁵ube ubadwa uti, ‘Tjinolebgwa ndi She Yahwe ndi etji, Mu zhuba landakashalula Iziraela ndakamilidza luboko gwangu atuna ku ludzi gwa Jakubo ngono ha bazwilakidza mu Egipiti amilidza luboko abadwa ati, “Ndimi Yahwe Ndzimu wenyu.”

⁶Mu zhuba ilelo ndakatuna ku bali nditi ndowobadusa mu Egipiti ndibayisa ku shango yandakabashakila, shango inowunga nkaka ne butji, yakanaka padzimwe shango.

⁷Ngono abadwa ati, “Mmwe ne mmwe wenyu ngaalashe zwifano zwakabipa zwamunonamata, musizwitemapadze nge midzimu ye zwifano ye Egipiti. Ndimi Yahwe Ndzimu wenyu.”

⁸“ ‘Koga bakandipandukila ngono bakasitongo nditeedza, bakasitongo lasha midzimu ye zwifano yabanonamata kene kuli kulasha midzimu ye zwifano ye Egipiti. Ndizo ndakati ndowobagwadzila moyo ashingisa bushongola gwangu mu bali mu Egipiti.

⁹Koga ndakathama ikoku ngekwe zina langu, ndakathama tjinothama kuti zina langu lisilengudziwe nge njudzi dzabakatjila pakati kwadzo, dzandakazwilakidza mu Baiziraela nge kubadusa mu Egipiti dzakalinga.

¹⁰Ndizo ndakabatungamila kudwa mu Egipiti abayisa ku tjilambanyika.

¹¹Ndakabapa milayo yangu abazibisa iyo, ngoti nthu unoihwa unowotjila ndiyo.

¹²Abapa na bo Sabata bangu kube tjilakidzo pakati kwangu nabo kuti bazibe kuti imi Yahwe ndimi ndakabayengemadza.

¹³“ ‘Koga bathu be Iziraela bakandipandukila mu tjilambanyika. Abazolondolodza milayo yangu koga bakayilamba, iyo inowotjidza wailondolodza ngono bakasiyengemadze bo Sabata bangu. Ndizo abe nditi ndowobagwadzila moyo abalobesa mu tjilambanyika.

¹⁴Koga ndakalinga zina langu athama tjakathama kuti lisilengudziwe nge njudzi dzakabe dzakalinga ndibadusa mu Egipiti.

¹⁵Pezhugwi kwaikoku ndakamilidza luboko gwangu atuna ku bali mu tjilambanyika nditi andingabakotose mu shango yandakabapa iyo, shango inowunga nkaka ne butji, yakanaka padzimwe shango dzose.

¹⁶Ndathamisiwa ikoku ngobe bakalamba milayo yangu bakasiyilondolodze kakale bakasiyengemadze bo Sabata bangu. Bakazwipa mu midzimu yabo ye zwifano.

¹⁷Koga ndakabalinga nge ngoni asibalobese mu tjilambanyika.

¹⁸“ ‘Ndakadwa bana babo mu tjilambanyika ati, “Musitongo tobela mipanga ya botate benyu kene kulondolodza milayo yabo kene mukazwitemapadza nge midzimu yabo ye zwifano.

¹⁹Ndimi Yahwe Ndzimu wenyu tobelani zila dzangu mulondolodze milayo yangu nge njele.

²⁰Muyengemadze bo Sabata bangu kuti babe tjilakidzo pakati kwangu namwi, kuita kuti muzibe kuti ndimi Yahwe Ndzimu wenyu.”

²¹“ ‘Koga bana bakandipandukila. Abazotongo tobela zila dzangu kene kuli kulondolodza milayo yangu nge njele, iyo inoti unoyilondolodza katjidziwa ndiyo. Abazoyengemadza bo Sabata bangu. Ipapo akumbula kubagwadzila moyo ne kushingisa bushongola gwangu mu bali mu tjilambanyika.

²²Koga ndakazwidziba, ngono ngekwe zina langu ndakathama tjakathama kuti lisilengudziwe mu njudzi dzakabe dzakalinga ndibadusa mu Egipiti.

²³Naikobo amilidza luboko gwangu atuna ku bali mu tjilambanyika ati ndowobapaladza nge njudzi abaandamisa nge shango,

²⁴nge kuti abazohwa milayo yangu koga bakailamba ngono bakasiyengemadze bo Sabata bangu, ngono bana nyota ye midzimu ya botate babo ye zwifano.

²⁵Ngono ndakabapa milayo isakalulwama yabasingake bakatjila ndiyo.

²⁶Ndakabaletja bakatemapadziwa nge zwipo zwabo, tjibhayilo tje mbano imwe ne imwe, kuita kuti ndibazhadze nge kutja kuti ndizo bazibe kuti ndimi Yahwe.’

²⁷“Ndizo wali nkololo we nthu, lebeleka ne bathu be Iziraela ubadwe uti, ‘Tjinolebgwa ndi She Yahwe ndi etji, Muna ikoku botate benyu bakandituka nge kusagalikabgwe kwabo.

²⁸Ndakati ndabakotosa mu shango yandakatuna kubapa iyo bebe bebona duthu lefu kene nti una mazhani manjinji, bebe bethamila zwibhayilo zwabo ipapo beisa zwibhayilo zwabo zwinondigwadzisa moyo, bepisa motsha wabo unonuhwilila betebula zwipo zwe zwing'o.

²⁹Ipapo abadwa ati, Magalo iyawa akatuthumala amunoyenda kuali ngeeni?’ ” Anodang'wa Bhama na ngwenu.

³⁰“Ndizo idwa bathu be Iziraela uti, ‘Tjinoleba She Yahwe etji, Apa mowozwitemapadza sekwakathama botate benyu kene mutebelela zwifano zwabo zwinoshimika?

³¹Mozwitemapadza ngodusa zwipo zwili bana benyu mu bapisa mu moto, mutjazwitemapadza nge midzimu ye zwifano nanasi kose. Apa ndingaduma mundibhuzwa tjimwe kene Baiziraela? Se nditjila andinga mudumile kundibhuzwa tjimwe. Koleba She Yahwe.

³²“ ‘Tjamunozwidwa mu mikumbulo yenyu atjitoshingikala. Mozwidwa muti, “Ngatifananeni ne njudzi dzimwe, ngatifananeni ne bathu be shango dzimwe tinamate midzimu yakabezhiwa ne ye mabgwe.”

³³“ ‘Nge malebeswa se nditjila, ndowomubusa nge masimba ngekwakasima mu kugwadza moyo kwangu. Koleba She Yahwe.

³⁴Ndowomudusa mu njudzi amukubunganya kudwa mu shango dzamakapaladzigwa mu dzili nge masimba ngekwakasima mu kugwadza moyo kwangu.

³⁵Ndowomuyisa mu tjilambanyika tje njudzi ngono ndowolingisana namwi ikoko amusumikilisa amubona nlandu.

³⁶Ndowomusumikilisa sekwa ndakasumikilisa botate benyu mu tjilambanyika tje Egipiti. Koleba She Yahwe.

³⁷Ndowothama kuti mupinde musena swimbo ndimulonga mu misungo ye tjidumilano.

³⁸Ndowodusa banondipandukila mu muli naibabo banonditjinyila, ndowobadusa mu shango yabanogala, abatowongina mu shango ye Iziraela. Ngono ipapo mowoziba kuti ndimi Yahwe.

³⁹“ ‘Ngono ngekwenyu Baiziraela, She Yahwe bakati, yendani munoshingila midzimu yenyu ye zwifano, mmwe ne mmwe wenyu. Koga shule kwe tjibaka nge malebeswa mowondihwilila mukasitjalengudze zina langu lakayengemala nge zwipo zwenyu nenge midzimu yenyu ye zwifano.

⁴⁰Nge kuti pezhugwi kwe dombo langu lakayengemala, dombo lakakula le Iziraela, Baiziraela banowondishingilako, bose mu shango, ikweno ndiko kwandinowobaamutjila. Ikweno ndiko kwandinoshaka zwipo zwenyu ne zwinodika ne zwibhayilo zwenyu zose zwakayengemala. Koleba She Yahwe.

⁴¹Ndowomuamutjila se nnuhwo unozipa ha ndimudusa mu njudzi ndimukubunganya kudwa ku shango dzose dzamakabe mapaladzigwa kudzili, ngono ndowozwilakidza ku njudzi kuti ndakayengemala ndili pakati kwenyu.

⁴²Ngono mowoziba kuti ndimi Yahwe ha ndimuzhisa mu shango ye Iziraela, shango yandakamilidza luboko ndituna kuipa botate benyu.

⁴³Ipapo mowokumbula mazwiibhato enyu ne mishingo yenyu yose yamakazwitemapadza ndiyo, ngono mowozwishima ngekwe bubi gose gwamakashinga.

⁴⁴Mowoziba kuti ndimi Yahwe nge zila yandinomubhata ndiyo ngekwe zina langu, kusingayendidzane nge zila dzenyu mbiimbi nenge mishingo yenyu yakabipa, imwi bathu be Iziraela. Koleba She Yahwe.’ ”

⁴⁵Dama la Yahwe likazha kundili liti,

⁴⁶“Nkololo we nthu, linga ku burwa, sumikila ngekwe burwa ulebesembeli ngekwe shango ye ishaka mu Negebu.

⁴⁷Idwa ishaka tje Negebu uti, ‘Ihwa dama la Yahwe. She Yahwe bakati, Bonani ndabe pejo nge kukulonga moto, ngono unowopisa miti iyo yose, minyolo ne yakawoma. Nthuto unowobe ubilima autowodzimiwa ngono unowobaba buso gumwe ne gumwe kudwa ku burwa kunoti ku bunandzwa.

⁴⁸Mmwe ne mmwe unowobona kuti imi Yahwe ndimi ndaubhatidza, autowodzimiwa.’ ”

⁴⁹Ipapo abe nditi, “She Yahwe, bathu banoti nge kwangu, ‘Apa aatoleba epesa koga wali kene?’ ”