Read Kalanga Ezekiele 21 Bible Online

Ezekiele 21 - Kalanga bible

Ezekiele 21

¹Dama la Yahwe lakazha kundili liti,

²“Nkololo we nthu, lingisana ne Jerusalema usumikile ngekwe ng'umba ye Ndzimu. Lebesambeli ngekwe shango ye Iziraela

³uti ku ili, ‘Yahwe tjabanoleba etji, bakati, Imi ndobhayana nawe. Ndowoshomola mu ikhata tjalo ngono mu muli abulaya balulwami ne babi.

⁴Se ndowobulaya balulwami ne babi, thumo langu lowoshomolegwa mmwe ne mmwe kudwa mu burwa kuyenda ku bunandzwa.

⁵Ipapo bathu bose banowoziba kuti imi Yahwe ndashomola thumo langu ku ikhata tjalo ngono andingaligwilize kakale.’

⁶“Ndizo wali susuthika mbeli kwabo iwe nkololo we nthu nge moyo umu kuhwa zogwadza kukulu.

⁷Ngono ha bekubhuzwa beti, ‘Unolililani?’ Iwe ubadwe uti, ‘Ndolidziwa nge thawu dzinozha. Moyo mmwe ne mmwe unowolobgwa nge hana, luboko gumwe ne gumwe gowotuthuka, mmwe ne mmwe unowotimbama ne tjidwi tjimwe ne tjimwe tjowotetema.’ Bonani, dzaswika ngono dzowozhadzisika. Koleba She Yahwe.”

⁸Dama la Yahwe likazha kundili liti,

⁹“Nkololo we nthu, lebesambeli uti, ‘Tjinoleba She etji, “ ‘Thumo, thumo, lakakuswiwa likakuyungiwa

¹⁰Lakakuswigwa kubulaya, likakuyungigwa kupenya se lupenyo gwe vula. “ ‘Apa tingashathila swimbo ye nkololo wangu kene? Thumo lokunda kose.

¹¹Thumo lokuyungiwa kubhakhwa nge maboko, lokuswiwa likakuyungiwa, lilulwamisigwa luboko gwe mbulayi.

¹²Lila ubokolele nkololo we nthu, nge kuti lobhayana ne bathu bangu, lakalingisana ne makomba wose e Iziraela. Babhayiwa nge thumo, kose ne bathu bangu. Ndizo bhata lutibatiba gugo.

¹³“ ‘Kulikwa kowozha nge malebeswa, ngono kowobe tjini ha swimbo inokuligwa nge thumo isingadwilile? Koleba Yahwe.’

¹⁴“Ndizo wali nkololo we nthu lebesambeli, ngono ulobe phande. Thumo ngalibhaye kabili kene katatu. I thumo le kubulaya, thumo le kubulaya kukulukulu, lobakomba midzibo yose.

¹⁵Kobe kuthama kuti moyo itimbame, ngono banjinji bakawa. Ndabiga thumo pa mikoba yabo yose kubulaya.

¹⁶Bhaya ku lubizho gwe luji, ushandukile kuna gwe lumeshwe, kumwe ne kumwe theswi kwayalinga.

¹⁷Namibo ndowoloba phande, bushongola gwangu gowogutshika. Kwaleba imi Yahwe.”

¹⁸Dama la Yahwe likazha kundili liti,

¹⁹“Nkololo we nthu, tjwaya zila mbili dzinowotobegwa ndi mambo we Bhabhiloni ezha ne thumo lile, dzose dzitangise mu shango ing'ompela. Ubige tjilakidzo zila painopambuka ilinga ku nzi nkulu.

²⁰Tjwaya zila inowotogwa nge thumo linobhayana ne Rabha nzi nkulu we Baamoni, imwe ibe inotobegwa nge thumo linobhayana ne Juda ne nzi nkulu wakasima Jerusalema.

²¹Nge kuti mambo we Bhabhiloni umile pa phalalano dze zila, pa phandana dze zila mbili kukandila. Unowokandila nge misebe, unowobhuzwa midzimu iye ye zwifano ebe elingisisa tjilopa.

²²Akata yawila ku lubizho gwe luji ngeye Jerusalema kwaanoyisa nyundo dzinokatsha ebe edusa ndaulo ye kubulaya, kumimila mima ye ngwa, kubiga nyundo dzinopkhwanya kulingisana ne mikoba, kubaka matuluthulu ne ngolo kuupoteleka.

²³Koga ku bathu be Jerusalema ngowonga kukandila kwe manyepkhwa ngekwe tjidumano tjabakathama, koga unowobakumbuludza nlandu wabo ebuya ebatapa.”

²⁴Ndizo wali Yahwe Masimbawose bakati, “Imwi bathu se makumbula nlandu wenyu nge kupanduka kwenyu, mu zwimbunula tjibi tjenyu mu tjimwe ne tjimwe tjamunothama. Se mathama ikoku, mowotapiwa.

²⁵“Iwe gombgwa le Iziraela biibi, wapelegwa nge mazhuba, tjibaka tje kulobgwa kuko ndiwo iyawa,

²⁶tjinolebgwa ndi She Yahwe ndietji, Ambula tjiala, ambula hwutshe ye bumambo. Zwithu azwitowodwilila zwigala sekwa zwigele. Bapasi banowomilidziwa, bapezhugwi bakayisiwa pasi.

²⁷Dongo! Dongo! Ndouthama kuti ube dongo! Autowomusiwa kuswikila ezha iye wakalingisana nge kuti ube uwe, ngono iye ndowompa iwo.”

²⁸“Ngono iwe nkololo we nthu lebesambeli uti, ‘Tjinolebgwa ndi She Yahwe ngekwe Baamoni ne masapa abo ndi etji, “ ‘Thumo, thumo, lashomolegwa kubulaya, lakuyungigwa kulobesa ne kupenya se lupenyo gwe vula!

²⁹Lisina tjimwe nge mbono dze manyepkhwa ngekwenyu ne manyepkhwa e kukandila ngekwenyu, lowobigwa mu mitshibha ye babi banowobulawa, mazhuba abo azha, tjibaka tje kulobgwa kwabo nditjo itjetji.

³⁰Bgwiliza thumo mu ikhata tjalo. Mu magalo amakabumbigwa, mu shango ya botate benyu, ndiko kwandinowo musumikilisilako.

³¹Ndiko kwandinowo shingisa bushongola gwangu mumuliko, ndiko kwandinowo mulakidza bushongola gwangu gunopisa se moto. Ndowomulonga mu maboko e zwilalume, balume bana bunyambi gwe kukolomodza.

³²Mowobe hwuni dzinothutisa moto, malopa enyu anowotebuligwa mu shango yenyu, amutjawo kumbugwa kakale, nge kuti imi Yahwe ndalebeleka.’ ”