Read Kalanga Ezekiele 22 Bible Online

Ezekiele 22 - Kalanga bible

Ezekiele 22

¹Dama la Yahwe lakazha kundili liti,

²“Ngono iwe nkololo we nthu, apa ungausumikilisa kene? Apa unowousumikilisa kene nzi nkulu iwoyu uzhele kutebula malopa? Ndizo uulingisanye nge mishingo yawo inoshimika

³ube uti, ‘Etji nditjo tjinoleba She Yahwe, Nzi nkulu unotebula malopa muuli, uzwitemapadza nge kuthama midzimu ye zwifano, tjibaka tje kulobgwa kwawo tjaswika.

⁴Wawang'wa nlandu ngekwe malopa awakatebula ngono ukazwitemapadza nge midzimu ye zwifano yawakathama. Wazhisa mazhuba awo ku bhelelo ne makole awo apela. Ndizo wali ndowokuthama tjiyeye mu njudzi ne kube tjidzwee mu shango dzose.

⁵Shango dzikule ne dzipejo nawe dzowokukuwelela, iwe nzi uzhele mbipo, uzhele ne kudzongeka.

⁶“ ‘Bona makombgwa e Iziraela bamukuli mmwe ne mmwe wabo nge masimba awe unoashingisa kutebula malopa.

⁷Mukuli tate na mme banolengudziwa, nzhi wakabaka mukuli unodziidziwa, mukuli siyamwa ne tjilikadzi abatobhakhwa zubuyanana.

⁸Wakalengudza zwithu zwangu zwakayengemala ukasiyengemadze bo Sabata bangu.

⁹Mukuli kuna banyepi banonyepa kuti malopa atebugwe, mukuli kuna banojila pezhugwi kwe dombo kunonamatigwa midzimu ye zwifano bethama bufukula mukati kuko.

¹⁰Mukuli bayapo banowalilana ne bakadzi ba botate babo kukawanika ne banokombeledza bakadzi bamu mwedzi kuwalilana nabo.

¹¹Mukuli nlume unothama bupombgwe ne nkadzi we mbakisani uwe, mmwe ewalilana ne nlongo we nkololo uwe, mmwe mukuli kakale unowalilana ne azwadzi iye, nkololokadzi wa tate babe dumbu.

¹²Bamwe mukuli banotengwa kutebula malopa, motola nshalu mukabuya mukadana mwiso wakapindilila mube muwana mbuyilo nge kutolela babakidzani namwi. Ngono makandikangang'wa, kojalo She Yahwe.

¹³Bonani, ndalobela phande mbuyilo yawawana ngo tjebela ne malopa akatebugwa mukuli.

¹⁴Apa zhuba landinowobe ndinginikana nawe unowosima moyo ne maboko awo anowosima kene? Imi Yahwe ndakuleba kakale ndowokushinga.

¹⁵Ndowokuandamisa nge njudzi, akupaladza nge shango ngono ndowodusa mbipo iyo mukuli.

¹⁶Mowoti malengudzika mu njudzi dzimwe mukaziba kuti ndimi Yahwe.’ ”

¹⁷Dama la Yahwe likazha kundili liti

¹⁸“Nkololo we nthu, bathu be Iziraela banofanana ne malala kundili. Bose koga banonga malala e phangula ne e matale ne e ntodo ne e thini asala papisiwa. Banonga malala asala pabe pevuthigwa tshipi.

¹⁹Ndizo wali She Yahwe bakati, Ngono mose se mabe malala, ndowomukubunganya mu Jerusalema.

²⁰Se bathu beti bakakubunganya siliva ne phangula ne dale ne ntodo ne thini mu vutho kuzwinyausa nge kupisa kwe moto, saikoko ndowo mukubunganya nge kugwadzamoyo ndimulonga mu nzi nkulu ngono mowonyaukila muuli.

²¹Ndowomukubunganya ngono amufulila nge moto we bushongola gwangu ngono mowonyawukila muuli.

²²Se siliva inyawusiwa mu vutho, mowo nyausiwabo muuli saikoko, ngono mowoziba kuti imi Yahwe ndimi ndalakidza bushongola gwangu kumuli.”

²³Dama la Yahwe likazha kundili liti,

²⁴“Nkololo we nthu, idwa shango iyeyi uti, ‘Iwe ushango isakatongo tjenapadziwa, isakaniwa nge vula kuswikila zhuba le kugwadzamoyo liswika.’

²⁵Makombgwa ayo amuili anonga shumba ibombokota imwaulanya tjayabhata, bakabulaya bathu, bakatola fumwa ne zwakanaka, bakathama tjilikadzi dzikabe njinji muili.

²⁶Bapirisiti bayo banomukila nlayo wangu bebe basingayengemadze zwithu zwangu zwakayengemala, abatothubukanya tjakayengemala ne tjisakayengemala. Banodiya kuti akutothubukana nge tjimwe kwakatemapala ne kusakatemapala, banozwikangang'wisa kulondolodza bo Sabata bangu, ndizo wali ndolengudziwa pakati kwabo.

²⁷Makulukota ayo amuili anonga phele dzimwawulanya zwadzabhata, banotebula malopa bebulaya bathu kuwana mbuyilo isakalulwama.

²⁸Balebesambeli bayo banozwimbanyidza mishingo yabo nge mbono dze manyepkhwa ne kukandila kunonyepa. Banoti, ‘Ikoku ndiko kwalebgwa ndi She Yahwe,’ koga Yahwe ibo basatongo lebeleka.

²⁹Bathu be shango iye banothama bupitipiti bebe betjebela, banotshambilidza bashayi ne basheti bebe basingabhate bazhi zubuyanana belamba ne tjakabalingisana.

³⁰Ndakashaka nthu pakati kwabo ungamusa guma ileli ebe ema mbeli kwangu pa buli emilila shango iyeyi kuti ndisiyilobese, koga akuna wandakawana.

³¹Ndizo ndowobalakidza bushongola gwangu abalobesa nge moto we kugwadzamoyo kwangu ndibatilika nlandu we tjimwe ne tjimwe tjabakathama. Koleba She Yahwe.”