Read Kalanga Ezekiele 23 Bible Online

Ezekiele 23 - Kalanga bible

Ezekiele 23

²“Nkololo we nthu, kwakabe kuna bakadzi babili bali bana be nkadzi,

³bebe beyenda bufukula ku Egipiti, bakatangisa bufukula bali batjetjana, ikoko mazhamu abo akabhakhwabhakhwa ngono bakalashikigwa nge buanadi gwabo.

⁴Hwola wakabe edang'wa kuyi Ohola, ntjetjana eyi Oholiba. Bakabe bali bangu ngono bakawana bakololo ne bakololokadzi. Ohola i Samariya, Oholiba i Jerusalema.

⁵“Ohola wakabe fukula atjiwangu, eyemula badiwa babe Baasiriya, babhayani

⁶bakaambala zwiambalo zwe mbala we gova, babusi ne batungamili be ngwa, bose koga bali bazhuzha babuya bakatatha mbizi.

⁷Kangina mu bufukula nabo bose be mamo be Asiriya ngono kazwitemapadza nge midzimu yose ye baakadana nabo.

⁸Aazolasha bufukula gugwe gwaakatangisa ku Egipiti kwaakati atji ntjetjana balume bakalala naye bakabhatabhata buanadi bakafukula naye.

⁹Ndizo wali ndakanlonga mu maboko e badi babe Baasiriya ibo baakabe eshaka.

¹⁰Bakambula bakasiya ali mbujo, bakatola bakololo ne bakololokadzi babe, bakambulaya nge thumo. Wakabe tjiyeye pakati kwe bakadzi ngono kalobgwa shamu.

¹¹“Nnung'una uwe Oholiba kakubona ikoku, koga iye bufukula gugwe gukanyanya kupinda gwe nkulu uwe.

¹²Naiyebo kasalana shule ne Baasiriya, balauli ne batungamili be ngwa ne babhayani bamu tjiambalo tje bubhayani bakatatha mbizi, bose bali bazhuzha babuya.

¹³Ngono naiyebo ndakabona kuti wakazwitemapadza, bose bubili bakatobela zila inofanana.

¹⁴Koga wakanyanyisa bufukula gugwe. Wakabona balume bakanyembiwa mu guma, zwifano zwe Bakhaladiya zwakanyembiwa nge bushaba,

¹⁵bakasunga thunji dzabo nge mimwandabula, bakaambala zwiala zwakanaka mu misholo yabo, bose be lingika se makulukota e Bhabhiloni, bazwagwa be Khaladiya.

¹⁶Wakati ebabona kabayemula ngono katuma batumwa ku bali mu Khaladiya.

¹⁷Ngono Babhabhiloni bakazha kunli mu bulalo gwe ludo ngono bakantemapadza nge ludo gwabo gusiigo, ngono shule kwe asinozwitemapadza ndibo, kabashandukila kabashima.

¹⁸Wakati bufukula gugwe eguthama patjena ezwiambula mbujo iye, ndakanshandukila nge kushima koga sekwa ndakashandukila nkulu uwe.

¹⁹Nenguba kwakajalo wakapaphidza bufukula gugwe, ekumbula mazhuba e butjetjana gugwe paakabe ali fukula mu Egipiti.

²⁰Ngono ikoko kasalana shule ne zwamba zwizwe zwina bulume gwazo gunonga gwe madonki ne kutebula kwazo kunonga kwe mbizi.

²¹Ndizo wali wakabe ne nyota ye bufukula gwe butjetjana gugo Baegipiti pabakabe bebhatabhata buanadi gugo, bebhatabhata mazhamu awo.

²²“Ndizo wali Oholiba, She Yahwe bakati, Ndowothama kuti badi babo babhayane nawe, ibo ibaba bawakashandukila ngoshima, ndowobazhisa kubhayana nawe bedwa mu mbizho dzose,

²³Babhabhiloni ne Bakhaladiya bose ne balume be Pekodi nebe Showa nebe Kowa bana Baasiriya bose ne bazhuzha babuya bose balauli ne batungamili be ngwa ne makulukota ne balume be mamo apezhugwi bose bakatatha mbizi.

²⁴Banowokunginilila nge zwibhayano ne koloyi dze ngwa ne dzimwe koloyi dzabanoyenda nadzo, banowobe bana bathu banjinji, banowokukomba bakabhata zwiviko zwikulu ne zwitukununu bakaambala hwutshe dze ngwa. Ndowokulonga mu maboko abo kuti ulobgwe shamu ngono banowokuloba kuyendidzana nge zwilizanyidzo zwabo.

²⁵Ndowokulakidza kugwadzamoyo kwangu kuna fupa ngono banowoshinga nawe nge bushongola bukulu. Banowothubula tjimilo tjitjo ne zebe dzidzo ngono ibabo benyu banowobe basala banowobulawa nge thumo. Banowotola bakololo ne bakololokadzi babo ngono banowobe basala benyu banowopisiwa nge moto.

²⁶Banowomumbula zwiambalo zwenyu bakamutolela minakiso yenyu yakanaka.

²⁷Ndizo ndowomisa bupombgwe ne bufukula gwawakatangisa ku Egipiti. Zwithu izwezwi autjowozwilinga nge kushuba kene kuli kukumbula Egipiti kakale.

²⁸“Ngoti She Yahwe bakati, Ndowokulonga mu maboko e bathu baunobenga ibabo baunoshima.

²⁹Banowoshinga nawe nge lubengo bakatola tjimwe ne tjimwe tjawakashingila. Banowokusiya uli mbujo wakati piti ngono shoni dze bufukula gugo dzowolakidziwa. Bupombgwe gugo ne bufukula gugo

³⁰zwazhisa ikoku mukuli nge kuti wakayemula njudzi ngono ukazwitemapadza nge midzimu yabo ye zwifano.

³¹Wakatobela zila ye nkulu uwo, ndizo ndowolonga bhepe lile mu maboko awo.

³²She Yahwe bakati, “Unowong'wa mu bhepe le nkulu uwo bhepe bhabi gulu, unowodadigwa ne kugongobogwa nge kuti lizhele.

³³Unowolaladza ukalingika wakashoba bhepe le kukolomoka ne kuthukudzika bhepe le nkulu uwo Samariya.

³⁴Unowoung'wa mulili ukakunika unowolipkhwanya likabe zwikambgwa ukamwaulanya mazhamu awo. Ngoti imi ndikajalo.” Koleba She Yahwe.

³⁵“Ndizo wali She Yahwe bakati, ‘Se wakandikangang'wa ukandifupatila, wakafanila usengane ne mbhayilo we bupombgwe gugo ne bufukula gugo.’

³⁶“Yahwe bakandidwa bakati, ‘Nkololo we nthu, apa ungasumikilisa Ohola na Oholiba kene? Ngono ubabudze mishingo yabo inoshimisa.

³⁷Kana bakathama bupombgwe ne malopa amu maboko abo. Bakathama bupombgwe ne midzimu yabo ye zwifano, bakabuya bakadusa bana babo babakandizwalila zwibhayilo zwe zojiwa.

³⁸Tjimwe tjabakandithamila ndietji, Nge tjibaka itjetjo bakatemapadza bugalo gwangu gwakayengemala, bakatemapadza bo Sabata bangu.

³⁹Mu zhuba ilelo labakadusa bana babo zwibhayilo ku midzimu yabo ye zwifano, bakangina mu bugalo gwangu gwakayengemala bakagutemapadza. Ikoku ndiko kwabakathama mu ng'umba yangu.

⁴⁰Bakabuya bakatuma batumwa kunokoka balume kudwa kulekule, bakati baswika ukangula ukanyemba mesho awo ukazwinakisa nge zwinakiso,

⁴¹ukagala pa tjigalo tjakanaka tjina tafuli yakabigwa mbeli kwatjo kuna motsha wangu ne mafuta angu.

⁴²Zhoba ye goko lisina anya yakabe yakampoteleka, kwakabe kuna balaladzi basina mazwiibhato bedwa ku tjilambanyika ngono bakambadza bakadzi maseka mu maboko ne zwiala zwakanaka mu misholo yabo.

⁴³“Ipapo ngekwe wakashakadziwa nge bupombgwe abe nditi, ‘Ngabashingise iye se fukula ndiko kwakanfanila.’

⁴⁴Ngono bakawalilana naye, se nthu ungabe ewalilana ne fukula, ndizo bakawalilana na Ohola na Oholiba fukula dze bakadzi.

⁴⁵Koga balume bakalulwama banowobapa nlandu we bupombgwe newe kutebula malopa nge kuti baphombgwekadzi ne malopa amu maboko abo.

⁴⁶“Ngoti She Yahwe bakati, ‘Ubadanile mbunga unobatjisa ukabatapila thundu.

⁴⁷Mbunga unowobakikithidza nge mabgwe, ukabanginilila nge mathumo ukabulaya bakololo ne bakololokadzi babo ngono ukapisa ng'umba dzabo.

⁴⁸Ndiyo zila yandinowopedza bupombgwe ndiyo mu shango iyeyi kuti ndizo bakadzi bose babone batjenjele basitongo idzelela imwi.

⁴⁹Mowouwana mbayilo we bupombgwe gwenyu mukaamutjila mbuyilo ye zwibi zwenyu zwe kunamata midzimu ye zwifano. Ipapo mowoziba kuti ndimi She Yahwe.’ ”